Kharga; ನಿಖರ ಕಣ್ಗಾವಲು ನಡೆಸುವ ‘ಖರ್ಗ’ ಡ್ರೋನ್‌ ಅಭಿವೃದ್ಧಿ

Team Udayavani, Dec 10, 2024, 6:46 AM IST

ಹೊಸದಿಲ್ಲಿ: ನಿಖರವಾಗಿ ಗುಪ್ತಚರ ಮತ್ತು ಕಣ್ಗಾವಲು ಕಾರ್ಯ ನಡೆಸಬಲ್ಲ ಹೊಸ ಖರ್ಗ ಕಮಿಕೇಜ್‌ ಡ್ರೋನ್‌ ಅನ್ನು ಭಾರತೀಯ ಸೇನೆಯು ಅಭಿವೃದ್ಧಿಪಡಿಸಿದೆ. ಈ ಡ್ರೋನ್‌ ಅತೀ ವೇಗದ ಮತ್ತು ಕಡಿಮೆ ತೂಕದ ವೈಮಾನಿಕ ವಾಹನವಾಗಿದ್ದು, ಪ್ರತೀ ಸೆಕೆಂಡಿಗೆ 40 ಮೀಟರ್‌ ವೇಗ ಹಾರಾಟ ನಡೆಸುವ ಸಾಮರ್ಥ್ಯವನ್ನು ಹೊಂದಿದೆ ಎಂದು ಅಧಿಕಾ­ರಿಗಳು ತಿಳಿಸಿದ್ದಾರೆ.

ಜಿಪಿಎಸ್‌ ವ್ಯವಸ್ಥೆಯನ್ನು ಹೊಂದಿರುವ ಈ ಡ್ರೋನ್‌ 700 ಗ್ರಾಂ ವರೆಗೂ ಸ್ಫೋಟಕವನ್ನು ಹೊತ್ತೂಯ್ಯಬಲ್ಲದು. ಹೈ ಡೆಫಿನಿಷನ್‌ ಕೆಮರಾ ಜತೆಗೆ, ವೈರಿ ರಾಷ್ಟ್ರಗಳ ಎಲೆಕ್ಟ್ರೋಮ್ಯಾಗ್ನಿಟಿಕ್‌ ಸ್ಪೆಕ್ಟ್ರಂ ಬೇಧಿ­ಸುವ ವ್ಯವಸ್ಥೆ ಕೂಡ ಹೊಂದಿದೆ. ಡ್ರೋನ್‌ ಕಾರ್ಯಾಚರಣೆಯ ವ್ಯಾಪ್ತಿ ಸುಮಾರು ಒಂದ­ರಿಂದ ಒಂದೂವರೆ ಕಿ.ಮೀ.ನಷ್ಟಿದೆ. ಸುಸೈಡ್‌ ಡ್ರೋನ್‌ ಎಂದು ಕರೆಲಾಗುವ ಈ ಸಾಧನವು ವೈರಿಗಳ ರಾಷ್ಟ್ರಗಳ ಗುರಿಯನ್ನು ಸರಳವಾಗಿ ನಾಶ ಮಾಡಬಲ್ಲದು. ವಿಶೇಷ ಎಂದರೆ ಇದು ರೇಡಾರ್‌ ವ್ಯಾಪ್ತಿಗೂ ಸಿಗುವುದಿಲ್ಲ! ಇದೀಗ ಇವು ಭಾರತದ ಬತ್ತಳಿಕೆ ಸೇರಲಿವೆ.