ದಿನಾ ಕುಡಿಯುವ ಹೇಮಾ ಆತ್ಮಹತ್ಯೆ ಮಾಡ್ಕೊಂಡಿದ್ದಾರಾ?

Team Udayavani, Apr 15, 2017, 3:50 AM IST

ನವದೆಹಲಿ:  “ಬಿಜೆಪಿ ಸಂಸದೆ ಹೇಮಾಮಾಲಿನಿ ದಿನಾ ಕುಡೀತಾರೆ. ಆದ್ರೂ ಅವರೇಕೆ ಆತ್ಮಹತ್ಯೆ ಮಾಡಿಕೊಂಡಿಲ್ಲ?’ ಮಹಾರಾಷ್ಟ್ರದ ಪಕ್ಷೇತರ ಶಾಸಕರೊಬ್ಬರು ಇಂಥ ಅಸಂಬದ್ಧ ಹೇಳಿಕೆ ನೀಡಿ ಪೇಚಿಗೆ ಸಿಲುಕಿದ್ದಾರೆ.

ರೈತರ ಆತ್ಮಹತ್ಯೆಗೆ ಸಂಬಂಧಿಸಿ ಮಾತನಾಡುತ್ತಿದ್ದ ಶಾಸಕ ಬಚ್ಚಾ ಕಾಡು, “ರೈತರು ಮದ್ಯಪಾನ ಮಾಡುವುದರಿಂದ ಆತ್ಮಹತ್ಯೆಗೆ ಶರಣಾಗುತ್ತಾರೆ ಎಂಬ ವಾದ ಸರಿಯಲ್ಲ. ಸಿನಿಮಾದವರು, ಪತ್ರಕರ್ತರು, ಶಾಸಕರು, ಸಂಸದರು ಎಲ್ಲರೂ ಕುಡಿಯುತ್ತಾರೆ. ನಟಿ ಹೇಮಾಮಾಲಿನಿ ಪ್ರತಿ ದಿನ ಮದ್ಯಪಾನ ಮಾಡುತ್ತಾರೆ. ಅವರೇನಾದರೂ ಆತ್ಮಹತ್ಯೆ ಮಾಡಿಕೊಂಡಿದ್ದಾರಾ?’, ಎಂದು ಪ್ರಶ್ನಿಸಿದ್ದಾರೆ.

ಅಚಲ್‌ಪುರ್‌ ಕ್ಷೇತ್ರದಿಂದ ಸತತ ಆರು ಬಾರಿ ಶಾಸಕರಾಗಿ ರುವ ಬಚ್ಚಾ ಕಾಡು, ಈ ಹಿಂದೆ ಸರ್ಕಾರಿ ಅಧಿಕಾರಿ ಮೇಲೆ ಹಲ್ಲೆ ನಡೆಸಿ ಜೈಲು ಸೇರಿದ್ದರು. ವಿಶೇಷವೆಂದರೆ ಹೇಮಾ ಮಾಲಿನಿ ಅವರ ಸೂಪರ್‌ಹಿಟ್‌ “ಶೋಲೆ’ ಚಿತ್ರದಿಂದ ಪ್ರೇರಿತರಾಗಿದ್ದ ಬಚ್ಚಾ, 2006ರಲ್ಲಿ ನೀರಿನ ಟ್ಯಾಂಕ್‌ ಏರಿ ಮೇಲಿಂದ ಹಾರುವುದಾಗಿ ಬೆದರಿಸಿ, ಕೃಷಿಕರ ಆತ್ಮಹತ್ಯೆ ಬಗ್ಗೆ ಸರ್ಕಾರದ ಗಮನ ಸೆಳೆಯಲು ಯತ್ನಿಸಿ ಸುದ್ದಿಯಾಗಿದ್ದರು.