Divya Pahuja; ಗುರ್ಗಾಂವ್ ಹೋಟೆಲ್ ನಲ್ಲಿ ಕೊಲೆಯಾಗಿದ್ದ ಮಾಡೆಲ್ ಶವ ಕಾಲುವೆಯಲ್ಲಿ ಪತ್ತೆ

Team Udayavani, Jan 13, 2024, 12:27 PM IST

ಹೊಸದಿಲ್ಲಿ: ಕಳೆದ ವಾರ ಗುಂಡಿನಿಂದ ಹತ್ಯೆಯಾಗಿದ್ದ ಮಾಡೆಲ್ ದಿವ್ಯಾ ಪಹುಜಾ ಅವರ ಮೃತ ದೇಹ ಪತ್ತೆಯಾಗಿದೆ. ಗುರ್ಗಾಂವ್ ಹೋಟೆಲ್ ನಲ್ಲಿ ಹತ್ಯೆಯಾಗಿದ್ದ ದಿವ್ಯಾ ಅವರ ಮೃತದೇಹ ಹರ್ಯಾಣದ ಕಾಲುವೆಯೊಂದರಲ್ಲಿ ಪತ್ತೆಯಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಪಂಜಾಬ್ ನ ಭಖ್ರಾ ಕಾಲುವೆಗೆ ಮೃತದೇಹವನ್ನು ಎಸೆಯಲಾಗಿತ್ತು, ಆದರೆ ದೇಹವು ಪಕ್ಕದ ರಾಜ್ಯಕ್ಕೆ ಹರಿದು ಹೋಗಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.

ಹರ್ಯಾಣದ ತೊಹ್ನಾದಲ್ಲಿ ಗುರ್ಗಾಂವ್ ಪೊಲೀಸರ ತಂಡವು ಮೃತದೇಹವನ್ನ ಪತ್ತೆ ಮಾಡಿದೆ. ಪೊಲೀಸರು ಮೃತದೇಹದ ಫೋಟೊಗಳನ್ನು ಪಹುಜಾ ಕುಟುಂಬಿಕರಿಗೆ ಕಳುಹಿಸಿದ್ದಾರೆ. ಅವರು ಗುರುತು ಪತ್ತೆ ಮಾಡಿದ ಬಳಿಕ ಮೃತದೇಹವನ್ನು ಶವಪರೀಕ್ಷೆಗೆ ಕಳುಹಿಸಲಾಗಿದೆ.

ಜನವರಿ 3ರಂದು ಮೃತದೇಹವನ್ನು ಪಂಜಾಬ್ ಕಾಲುವೆಯಲ್ಲಿ ಎಸೆದಿರುವುದಾಗಿ ಪ್ರಕರಣದ ಆರೋಪಿಗಳಲ್ಲಿ ಓರ್ವ ಶುಕ್ರವಾರ ಹೇಳಿಕೊಂಡಿದ್ದ. ಜನವರಿ ಎರಡರಂದು ಮಾಡೆಲ್ ದಿವ್ಯಾ ಪಹುಜಾ ಕೊಲೆಯಾಗಿತ್ತು.

ನಿನ್ನೆ ಸಂಜೆ ಕೋಲ್ಕತ್ತಾ ವಿಮಾನ ನಿಲ್ದಾಣದಿಂದ ವಿಮಾನ ಹತ್ತಲು ಪ್ರಯತ್ನಿಸುತ್ತಿದ್ದಾಗ ಬಂಧನಕ್ಕೊಳಗಾದ ಬಾಲರಾಜ್ ಗಿಲ್, ಗುರುಗ್ರಾಮ್‌ನಿಂದ ಸುಮಾರು 270 ಕಿಲೋಮೀಟರ್ ದೂರದಲ್ಲಿರುವ ಪಟಿಯಾಲಾದಲ್ಲಿನ ಕಾಲುವೆಯಲ್ಲಿ ಮಾಜಿ ಮಾಡೆಲ್ ಶವವನ್ನು ವಿಲೇವಾರಿ ಮಾಡಿರುವುದಾಗಿ ವಿಚಾರಣೆ ವೇಳೆ ಪೊಲೀಸರಿಗೆ ತಿಳಿಸಿದ್ದಾರೆ.

ಜನವರಿ 2 ರಂದು ಗುರ್ಗಾಂವ್ ಹೋಟೆಲ್‌ ನಲ್ಲಿ ದಿವ್ಯಾ ಪಹುಜಾ ಅವರನ್ನು ಕೊಲ್ಲಲಾಯಿತು, ಕೊಲೆಗಾರರು ಆಕೆಯ ದೇಹವನ್ನು ಹೋಟೆಲ್‌ ನಿಂದ ಕಾರ್‌ ಗೆ ಎಳೆದುಕೊಂಡು ಹೋಗುತ್ತಿರುವು ದೃಶ್ಯಾವಳಿಗಳು ಸಿಸಿಟಿವಿಯಲ್ಲಿ ದಾಖಲಾಗಿತ್ತು.

27 ವರ್ಷದ ದಿವ್ಯಾಳನ್ನು ಐವರು ಪುರುಷರು ಹೋಟೆಲ್ ಕೋಣೆಗೆ ಕರೆದೊಯ್ದರು. ಹೋಟೆಲ್ ಮಾಲೀಕನ ಅಶ್ಲೀಲ ಚಿತ್ರಗಳೊಂದಿಗೆ ಬ್ಲ್ಯಾಕ್ ಮೇಲ್ ಮಾಡುತ್ತಿದ್ದಾಳೆ ಎಂದು ಆರೋಪಿಸಿ ಆಕೆಯ ತಲೆಗೆ ಗುಂಡು ಹಾರಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ದಿವ್ಯಾ ಪಹುಜಾ 2016 ರಲ್ಲಿ ತನ್ನ ಆಗಿನ ಗೆಳೆಯ ಮತ್ತು ಗುರುಗ್ರಾಮ್ ಗ್ಯಾಂಗ್‌ಸ್ಟರ್ ಸಂದೀಪ್ ಗಡೋಲಿಯ ನಕಲಿ ಎನ್‌ ಕೌಂಟರ್‌ ನಲ್ಲಿ ಭಾಗಿಯಾಗಿದ್ದಕ್ಕಾಗಿ ಜೈಲಿನಲ್ಲಿದ್ದಳು. ಕಳೆದ ವರ್ಷ ಜೂನ್‌ನಲ್ಲಿ ಆಕೆಗೆ ಜಾಮೀನು ನೀಡಲಾಗಿತ್ತು.