ಕೊಳಕು ಪ್ರವಾಸಿಗರಿಂದ ಗೋವಾ ಹರಿಯಾಣ ಆಗುತ್ತಿದೆ: ಸಚಿವ

Team Udayavani, Feb 10, 2018, 3:44 PM IST

ಪಣಜಿ : “ಉತ್ತರ ಭಾರತದ ಪ್ರವಾಸಿಗರು ಗೋವೆಯನ್ನು ಕೊಳಕು ಮಾಡುತ್ತಿದ್ದಾರೆ. ಅವರಿಗೆ ಗೋವೆಯ ಶುಚಿತ್ವ, ನೈರ್ಮಲ್ಯದ ಬಗ್ಗೆ ಕಾಳಜಿಯೇ ಇಲ್ಲ; ಅವರು ಗೋವೆಯನ್ನು ಹರಿಯಾಣ ಮಾಡಲು ಹೊರಟಿದ್ದಾರೆ’ ಎಂದು ಗೋವೆಯ ಪಟ್ಟಣ ಮತ್ತು ಗ್ರಾಮೀಣ ಯೋಜನಾ ಸಚಿವ ವಿಜಯ್‌ ಸರ್‌ದೇಸಾಯ್‌ ಹೇಳಿದ್ದಾರೆ ಮತ್ತು ಆ ಮೂಲಕ  ಹೊಸ ವಿವಾದವನ್ನು ಹುಟ್ಟುಹಾಕಿದ್ದಾರೆ.

ಗೋವೆಯನ್ನು ಸಂದರ್ಶಿಸುವ ಹೆಚ್ಚಿನ ದೇಶೀಯ ಪ್ರವಾಸಿಗರು ಈ ಭೂಮಿಯ ಮೇಲಿನ ಕೊಳಕು ಪದರದವರಾಗಿದ್ದಾರೆ.  ಇವತ್ತು ನಾವು ನಮ್ಮ ರಾಜ್ಯದ ಜನಸಂಖ್ಯೆಯ ಆರು ಪಟ್ಟು ಹೆಚ್ಚಿನ ಸಂಖ್ಯೆಯ ಪ್ರವಾಸಿಗರನ್ನು  ಪಡೆಯುತ್ತಿದ್ದೇವೆ. ಇವರು ಮೇಲ್‌ ಸ್ತರದ ಪ್ರವಾಸಿಗರಲ್ಲ; ಅವರು ಈ ಭೂಮಿಯ ಮೇಲೆ ಕೊಳೆ ಪದರದವರಾಗಿದ್ದಾರೆ ಎಂದು ಸರ್‌ದೇಸಾಯಿ ಮೂದಲಿಕೆಯ ಮಾತನ್ನು ಆಡಿದ್ದಾರೆ. 

ಗೋವಾ ದೇಶದ ಇತರ ರಾಜ್ಯಗಳಿಗಿಂತ ಮೇಲ್ಮಟ್ಟದ ರಾಜ್ಯವಾಗಿದೆ; ಇತರ ರಾಜ್ಯಗಳಿಂದ ಬರುವ ಬೇಜವಾಬ್ದಾರಿಯ ಪ್ರವಾಸಿಗರನ್ನು ನಾವು ನಿಯಂತ್ರಿಸಲಾರೆವು. ಅವರಿಗೆ ಜವಾಬ್ದಾರಿ ಇದೆಯೇ ? ಪ್ರಜ್ಞೆ ಇದೆಯೇ ? ಇಲ್ಲ. ದೇಶದ ಇತರ ರಾಜ್ಯಗಳನ್ನು ಹೋಲಿಸಿದರೆ ಗೋವೆಯ ತಲಾ ಆದಾಯ ಎಷ್ಟೋ ಹೆಚ್ಚಿದೆ; ಸಾಮಾಜಿಕ ಮತ್ತು ರಾಜಕೀಯ ಪ್ರಜ್ಞೆ ಅವರಲ್ಲಿ ಅತ್ಯುನ್ನತವಾಗಿದೆ. ಆರೋಗ್ಯ ಅಥವಾ ಇನ್ನಿತರ ಯಾವುದೇ ಮಾನದಂಡಗಳಿಂದ ಪರೀಕ್ಷಿಸಿದರೂ ಗೋವಾ, ದೇಶದ ಇತರ ರಾಜ್ಯಗಳಿಗಿಂದ ಉತ್ತಮವಿದೆ ಎಂದು ಸರ್‌ದೇಸಾಯ್‌ ನುಡಿದರು. 

ಸಚಿವ ಸರ್‌ದೇಸಾಯ್‌ ಅವರು ತಮ್ಮ ಈ ಅಭಿಪ್ರಾಯಗಳನ್ನು ಪಣಜಿ ಸಮೀಪದ ರಿಸಾರ್ಟ್‌ ಒಂದರಲ್ಲಿ ಏರ್ಪಡಿಸಲಾಗಿದ್ದ ಗೋವಾ ಬಿಝ್ ಫೆಸ್ಟ್‌ ನಲ್ಲಿ  ವ್ಯಕ್ತಪಡಿಸಿದರು.