ನಿವೃತ್ತ ಜಡ್ಜ್ ನಿಂದ ಸೊಸೆಗೆ ವರದಕ್ಷಿಣೆ ಕಿರುಕುಳ

Team Udayavani, Sep 22, 2019, 5:34 AM IST

ಹೈದರಾಬಾದ್‌: ಮದ್ರಾಸ್‌ ಹೈಕೋರ್ಟ್‌ ನಿವೃತ್ತ ಜಡ್ಜ್ ವೊಬ್ಬರು ತಮ್ಮ ಪತ್ನಿ, ಮಗನ ಜೊತೆ ಸೇರಿ ತಮ್ಮ ಸೊಸೆಗೆ ವರದಕ್ಷಿಣೆ ಕಿರುಕುಳ ನೀಡುತ್ತಿರುವ ವಿಡಿಯೋವೊಂದು ದೇಶವನ್ನೇ ಬೆಚ್ಚಿಬೀಳಿಸಿದೆ. ಈ ವಿಡಿಯೋವನ್ನು ಸಂತ್ರಸ್ತ ಮಹಿಳೆ ಜಾಲತಾಣಗಳಲ್ಲಿ ಹರಿಬಿಟ್ಟಿದ್ದು, ಅದು ವೈರಲ್‌ ಆಗಿದ್ದಲ್ಲದೆ, ಭಾರೀ ಆಕ್ರೋಶವೂ ವ್ಯಕ್ತವಾಗಿದೆ. ತಮ್ಮ ಮೇಲಿನ ಕ್ರೌರ್ಯ ಕುರಿತು ಸಂತ್ರಸ್ತ ಮಹಿಳೆ ಸಿಂಧೂ ಶರ್ಮಾ ಏ.27ರಂದೇ ದೂರು ನೀಡಿದ್ದಾರೆ. ವಿಡಿಯೋದಲ್ಲಿ ನಿವೃತ್ತ ನ್ಯಾ. ನೂಟಿ ರಾಮಮೋಹನ್‌ ರಾವ್‌, ಅವರ ಪತ್ನಿ ಮತ್ತು ಮಗ ಸೇರಿ ಸಿಂಧೂರನ್ನು ಎಳೆದಾಡುತ್ತಿರುವುದು, ಥಳಿಸುತ್ತಿರು ವುದು ಕಂಡುಬಂದಿದೆ.

ಮನೆಗೆಲಸದಾಕೆಯೂ ಹಲ್ಲೆಯಲ್ಲಿ ಭಾಗಿಯಾಗಿದ್ದಾಳೆ. ವಿಡಿಯೋ ಅಪ್‌ಲೋಡ್‌ ಮಾಡುವವರೆಗೂ ನನ್ನ ವಿರುದ್ಧ ಇಂಥದ್ದೊಂದು ದೌರ್ಜನ್ಯ ನಡೆಯುತ್ತಿದೆ ಎಂದರೆ ಯಾರೂ ನಂಬಿರಲಿಲ್ಲ. ನನ್ನ ದೇಹದ ಯಾವೆಲ್ಲ ಭಾಗಗಳಿಗೆ ಹೊಡೆದಿದ್ದಾರೆಂದರೆ, ಅದನ್ನು ಬಾಯಿಬಿಟ್ಟು ಹೇಳಿಕೊಳ್ಳಲು ಕೂಡ ಸಾಧ್ಯವಿಲ್ಲ ಎಂದಿದ್ದಾರೆ ಸಿಂಧೂ.