ಕರಣ್‌ ಪಾರ್ಟಿಯಲ್ಲಿ ಡ್ರಗ್ಸ್‌?

Team Udayavani, Aug 1, 2019, 5:13 AM IST

ಮುಂಬೈ: ಬಾಲಿವುಡ್‌ ನಿರ್ದೇಶಕ ಕರಣ್‌ ಜೋಹರ್‌ ತನ್ನ ಮನೆಯಲ್ಲಿ ಇತ್ತೀಚೆಗೆ ನಡೆಸಿದ ಪಾರ್ಟಿಯಲ್ಲಿ ಬಾಲಿವುಡ್‌ ನಟ ನಟಿಯರು ಡ್ರಗ್ಸ್‌ ಸೇವಿಸಿದ್ದರೇ? ಇಂಥದ್ದೊಂದು ಭಾರಿ ವಿವಾದ ಈಗ ಹುಟ್ಟಿಕೊಂಡಿದೆ. ತನ್ನ ಇನ್‌ಸ್ಟಾಗ್ರಾಮ್‌ ಖಾತೆಯಲ್ಲಿ ಇತ್ತೀಚೆಗೆ ಕರಣ್‌ ಜೋಹರ್‌ ವಿಡಿಯೋ ಪ್ರಕಟಿಸಿಕೊಂಡಿದ್ದರು. ಶನಿವಾರ ರಾತ್ರಿಯ ಖುಷಿ ಎಂಬ ಅರ್ಥದ ಶೀರ್ಷಿಕೆಯನ್ನೂ ಇದಕ್ಕೆ ನೀಡಿದ್ದರು.

ಈ ಪಾರ್ಟಿಯಲ್ಲಿ ಬಾಲಿವುಡ್‌ ತಾರೆಯರಾದ ದೀಪಿಕಾ ಪಡುಕೋಣೆ, ರಣಬೀರ್‌ ಕಪೂರ್‌, ವಿಕ್ಕಿ ಕೌಶಲ್, ಅರ್ಜುನ್‌ ಕಪೂರ್‌, ಮಲೈಕಾ ಅರೋರಾ, ಶಾಹಿದ್‌ ಕಪೂರ್‌, ನಿರ್ಮಾಪಕ ಅಯಾನ್‌ ಮುಖರ್ಜಿ ಸೇರಿದಂತೆ ಹಲವರು ಇದ್ದರು. ಈ ವಿಡಿಯೋ ರಾಜಕೀಯ ವಲಯದಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ. ಈ ಪಾರ್ಟಿಯಲ್ಲಿ ತಾರೆಯರು ಡ್ರಗ್ಸ್‌ ಸೇವಿಸಿದ್ದಾರೆ ಎಂದು ಶಿರೋಮಣಿ ಅಕಾಲಿ ದಳ ಶಾಸಕ ಮಜಿಂದರ್‌ ಸಿರ್ಸಾ ಟ್ವೀಟ್ ಮಾಡಿ ಆರೋಪಿಸಿದ್ದಾರೆ. ಅದಕ್ಕೆ ಕಾಂಗ್ರೆಸ್‌ ಮುಖಂಡ ಮಿಲಿಂದ್‌ ದೇವುರಾ ಪ್ರತಿಕ್ರಿಯಿಸಿ, ಸಿರ್ಸಾ ಆರೋಪವನ್ನು ಅಲ್ಲಗಳೆದಿದ್ದಾರೆ. ನನ್ನ ಪತ್ನಿಯೂ ಈ ಪಾರ್ಟಿಯಲ್ಲಿದ್ದರು. ಅವರು ವಿಡಿಯೋದಲ್ಲೂ ಕಾಣಿಸುತ್ತಿದ್ದಾರೆ. ಯಾರೂ ಈ ಪಾರ್ಟಿಯಲ್ಲಿ ಡ್ರಗ್ಸ್‌ ಸೇವಿಸಿಲ್ಲ ಎಂದು ಸ್ಪಷ್ಟನೆ ನೀಡಿದ್ದಾರೆ.