ದುರ್ಗಾ ವಿಸರ್ಜನೆ ನಡೆಸದೇ ದೀದಿಯ ಗೆಲ್ಲಿಸಿದ ಜನತೆ

Team Udayavani, Oct 2, 2017, 6:55 AM IST

ಕೋಲ್ಕತಾ: ಮೊಹರಂ ಹಬ್ಬದ ದಿನ ದುರ್ಗಾ ವಿಗ್ರಹ ವಿಸರ್ಜನೆಯನ್ನು ನಿಷೇಧಿಸಿ ಪಶ್ಚಿಮ ಬಂಗಾಲದ ಮಮತಾ ಬ್ಯಾನರ್ಜಿ ಸರಕಾರ ಹೊರಡಿಸಿದ್ದ ಆದೇಶಕ್ಕೆ ಕಲ್ಕತ್ತಾ ಹೈಕೋರ್ಟ್‌ ತಡೆ ತಂದಿದ್ದರೂ ಈ ವಿಚಾರದಲ್ಲಿ ದೀದಿಯೇ ಗೆದ್ದಿದ್ದಾರೆ. ಅಂದ ಹಾಗೆ, ಮಮತಾ ಅವರ ಗೆಲುವಿಗೆ ಕಾರಣವಾಗಿದ್ದು ಬೇರಾರೂ ಅಲ್ಲ,  ಆ ರಾಜ್ಯದ ದುರ್ಗಾ ಪೂಜೆ ಸಮಿತಿಗಳೇ ಎಂಬುದು ವಿಶೇಷ.

ಹೌದು, ನ್ಯಾಯಾಲಯವು ದುರ್ಗಾ ವಿಗ್ರಹ ವಿಸರ್ಜನೆಗೆ ಹೇರಿದ್ದ ನಿಷೇಧವನ್ನು ತೆರವುಗೊಳಿ ಸಿದ್ದರೂ, ಮೊಹರಂ ದಿನ ದುರ್ಗೆಯನ್ನು ವಿಸರ್ಜಿಸದೇ ಇರುವ ಮೂಲಕ ಪಶ್ಚಿಮ ಬಂಗಾಲದ ದುರ್ಗಾ ಪೂಜಾ ಸಮಿತಿಗಳು ಸಿಎಂ ಮಮತಾಗೆ ಗೌರವ ಸಲ್ಲಿಸಿವೆ. ಕೋಲ್ಕತಾದಲ್ಲಿರುವ 25 ಸಾವಿರ ಸಮಿತಿಗಳ ಪೈಕಿ ಒಂದೇ ಒಂದು ಸಮಿತಿಯೂ ರವಿವಾರ ದುರ್ಗಾ ವಿಗ್ರಹ ವಿಸರ್ಜನೆಗೆ ಅನುಮತಿಬೇಕೆಂದು ಸ್ಥಳೀಯಾ ಡಳಿತವನ್ನು ಕೋರಲಿಲ್ಲ. ಬದಲಿಗೆ, ರವಿವಾರ ವಿಗ್ರಹ ವಿಸರ್ಜನೆ ಮಾಡದೇ ಇರುವ ಮೂಲಕ ದೀದಿಯ ನಿರ್ಧಾರಕ್ಕೆ ಬದ್ಧ ಎಂಬುದನ್ನು ತೋರಿಸಿಕೊಟ್ಟಿದೆ. ಸೆ. 21ರಂದು ಮಮತಾ ಸರಕಾರದ ವಿರುದ್ಧ ಹರಿಹಾಯ್ದಿದ್ದ ಹೈಕೋರ್ಟ್‌, ನಿಷೇಧ ವಾಪಸ್‌ ಪಡೆದು ದುರ್ಗಾ ವಿಸರ್ಜನೆಗೆ ಅವಕಾಶ ಕಲ್ಪಿಸಿಕೊಟ್ಟಿತ್ತು.