ರಾಜ್ಯಗಳಿಗೆ ಸಿಮಿ ನಿಗ್ರಹದ ಅಧಿಕಾರ

Team Udayavani, Feb 20, 2019, 12:30 AM IST

ಹೊಸದಿಲ್ಲಿ: ನಿಷೇಧಿತ “ಸ್ಟೂಡೆಂಟ್ಸ್‌ ಇಸ್ಲಾಮಿಕ್‌ ಮೂವ್‌ಮೆಂಟ್‌ ಆಫ್ ಇಂಡಿಯಾ (ಸಿಮಿ)’ ಸಂಘಟನೆಗೆ ಸೇರಿದ ಹಣದ ವ್ಯವಹಾರಗಳು ಹಾಗೂ ಆ ಸಂಘಟನೆ ನಡೆಸುವಂಥ ಯಾವುದೇ ಚಟುವಟಿಕೆಗಳನ್ನು ನಿಗ್ರಹಿಸುವ ಅಧಿಕಾರವನ್ನು ಕೇಂದ್ರ ಗೃಹ ಇಲಾಖೆ ಎಲ್ಲಾ ರಾಜ್ಯ ಸರಕಾರಗಳಿಗೆ ನೀಡಿದೆ. ಅಲ್ಲದೇ, 1967ರ ಕಾನೂನು ಬಾಹಿರ ಚಟುವಟಿಕೆಗಳ ನಿಗ್ರಹ ಕಾಯ್ದೆಯಡಿ, ಜ. 31ರಿಂದ ಅನ್ವಯವಾಗುವಂತೆ, ಸಿಮಿ ಮೇಲಿನ ನಿಷೇಧವನ್ನು 5 ವರ್ಷ ವಿಸ್ತರಿಸಿ ಇಲಾಖೆ ಆದೇಶ ಹೊರಡಿಸಿದೆ. 2014ರ ಫೆ. 1ರಂದು ಅಂದಿನ ಸರಕಾರ ಸಿಮಿ ಸಂಘ ಟನೆಗೆ 5 ವರ್ಷ ನಿಷೇಧ ಹೇರಿತ್ತು. 

ಈ ಆದೇಶಗಳ ಜತೆಗೆ, ಕೆಲವಾರು ತಿಳುವಳಿಕೆಗಳನ್ನು ರಾಜ್ಯಗಳಿಗೆ ಬಿಡುಗಡೆ ಮಾಡಲಾಗಿದ್ದು, ಸಿಮಿ ಸಂಘಟನೆಯ ಚಟುವಟಿಕೆಗಳನ್ನು ಆದಷ್ಟು ಬೇಗನೇ ಹತ್ತಿಕ್ಕದಿದ್ದರೆ ಆ ಸಂಘಟನೆ ದೇಶದಲ್ಲಿರುವ ಭಾರತ ವಿರೋಧಿ ಶಕ್ತಿಗಳನ್ನು ಒಗ್ಗೂಡಿಸಿ ಜಾತ್ಯಾತೀತ ವ್ಯವಸ್ಥೆಯನ್ನೇ ಹಾಳುಗೆಡ ವುತ್ತದೆ ಎಂದು ಎಚ್ಚರಿಸಲಾಗಿದೆ. ಸಂಘಟನೆ ವಿರುದ್ಧದ 58 ಪ್ರಕರಣಗಳ ಪಟ್ಟಿಯನ್ನು ರಾಜ್ಯಗಳಿಗೆ ರವಾನಿಸಲಾಗಿದ್ದು ಇವುಗಳಲ್ಲಿ 2014ರಲ್ಲಿ ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದ ಬಳಿ ನಡೆದಿದ್ದ ಸ್ಫೋಟ ಪ್ರಕರಣವೂ ಸೇರಿದೆ.