ಪತ್ರಿಕೆ ಸರಬರಾಜಿಗೆ ಅನುವು

Team Udayavani, Mar 30, 2020, 5:39 AM IST

ಹೊಸದಿಲ್ಲಿ: ಲಾಕ್‌ ಡೌನ್‌ ಅವಧಿಯಲ್ಲಿ ಮುದ್ರಣ ಮಾಧ್ಯಮ ಗಳಿಗೆ ನೀಡಲಾಗಿರುವ ವಿನಾಯಿತಿಗಳ ಅನ್ವಯ ಪತ್ರಿಕೆಗಳ ಸರಬರಾಜಿಗೆ ಅನುಮತಿ ನೀಡಬೇಕು ಎಂದು ಎಲ್ಲ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ಕೇಂದ್ರ ಗೃಹ ಇಲಾಖೆ ರವಿವಾರ ಸೂಚನೆ ನೀಡಿದೆ.

ರಾಜ್ಯಗಳ ಮುಖ್ಯ ಕಾರ್ಯದರ್ಶಿಗಳಿಗೆ ಈ ಕುರಿತು ಪತ್ರ ಬರೆದಿರುವ ಕೇಂದ್ರ ಗೃಹ ಕಾರ್ಯದರ್ಶಿ ಅಜಯ್‌ ಭಲ್ಲಾ, ಹಾಲು ಸಂಗ್ರಹ ಮತ್ತು ಸರಬರಾಜು, ಪ್ಯಾಕಿಂಗ್‌ ವಸ್ತುಗಳು, ದಿನಸಿ ವಸ್ತುಗಳು, ಹ್ಯಾಂಡ್‌ವಾಶ್‌, ಸಾಬೂನು, ಬ್ಯಾಟರಿ ಸೆಲ್‌, ಚಾರ್ಜರ್‌ಗಳು ಸೇರಿದಂತೆ ಸರಕುಗಳ ಸಾಗಣೆಗೆ ಅಡ್ಡಿಪಡಿಸಬಾರದು ಎಂದೂ ನಿರ್ದೇಶಿಸಿದ್ದಾರೆ. ಇದೇ ವೇಳೆ ರಾಷ್ಟ್ರೀಯ ವಿಪತ್ತು ನಿರ್ವಹಣ ಪ್ರಾಧಿಕಾರದ ವ್ಯಾಪ್ತಿಗೆ ಭಾರತೀಯ ರೆಡ್‌ ಕ್ರಾಸ್‌ ಸಂಸ್ಥೆಯ ಸೇವೆಯನ್ನೂ ಸೇರಿಸಲಾಗಿದೆ ಎಂದೂ ಗೃಹ ಕಾರ್ಯದರ್ಶಿ ತಿಳಿಸಿದ್ದಾರೆ.