ISRO: ಮುಂದಿನ ತಿಂಗಳು ಯುರೋಪ್‌ನ ಪ್ರೋಬಾ-3 ಭಾರತದಲ್ಲಿ ಉಡಾವಣೆ

Team Udayavani, Nov 6, 2024, 6:37 AM IST

ನವದೆಹಲಿ: ಸೂರ್ಯನ ಅಧ್ಯಯನಕ್ಕಾಗಿ ಯುರೋಪ್‌ ಸ್ಪೇಸ್‌ ಏಜೆನ್ಸಿ ತಯಾರು ಮಾಡಿರುವ ಪ್ರೋಬಾ-3 ಉಪಗ್ರಹವನ್ನು ಮುಂದಿನ ತಿಂಗಳು ಭಾರತದಲ್ಲಿ ಉಡಾವಣೆ ಮಾಡಲಾಗುತ್ತದೆ.

ಶ್ರೀಹರಿಕೋಟಾದಲ್ಲಿರುವ ಲಾಂಚ್‌ಪ್ಯಾಡ್‌ನಿಂದ ಪಿಎಸ್‌ಎಲ್‌ವಿ ರಾಕೆಟ್‌ ಬಳಸಿ ಉಡಾವಣೆ ಮಾಡಲಾಗುತ್ತದೆ ಎಂದು ಕೇಂದ್ರ ವಿಜ್ಞಾನ ಮತ್ತು ತಂತ್ರಜ್ಞಾನ ಸಚಿವ ಜಿತೇಂದ್ರ ಸಿಂಗ್‌ ಹೇಳಿದ್ದಾರೆ. ಪ್ರೋಬಾ-3 ಯೋಜನೆಯಲ್ಲಿ 2 ಉಪಗ್ರಹಗಳಿದ್ದು, ಭೂಮಿಯಿಂದ 60000 ಕಿ.ಮೀ. ದೂರ ಮತ್ತು 600 ಕಿ.ಮೀ. ಹತ್ತಿರಕ್ಕೆ ಬರುವಂತಹ ಅಂಡಾಕಾರದ ಕಕ್ಷೆಯಲ್ಲಿ ಇದನ್ನು ನಿಯೋಜಿಸಲಾಗುತ್ತದೆ. ಈ ಉಪಗ್ರಹಗಳು ಸೂರ್ಯನ ಹೊರಭಾಗ (ಕರೋನಾ)ವನ್ನು ಅಧ್ಯಯನ ಮಾಡಲಿದ್ದು, ಇದಕ್ಕಾಗಿ ಈ ರೀತಿಯ ಕಕ್ಷೆಯಲ್ಲಿ ಇದನ್ನು ನಿಯೋಜಿಸಲಾಗುತ್ತದೆ ಎಂದು ಐರೋಪ್ಯ ಬಾಹ್ಯಾಕಾಶ ಸಂಸ್ಥೆ ಹೇಳಿದೆ.

2001ರಲ್ಲಿ ಪ್ರೋಬಾ-1 ಉಪಗ್ರಹವನ್ನು ಸಹ ಭಾರತದಿಂದಲೇ ಉಡಾವಣೆ ಮಾಡಲಾಗಿತ್ತು. ಇದಾದ ಬಳಿಕ ಯುರೋಪ್‌ ಉಪಗ್ರಹವನ್ನು ಭಾರತದಲ್ಲಿ ಉಡಾವಣೆ ಮಾಡಲಾಗುತ್ತಿದೆ.