2ಗಂಟೆ ನಸುಕಿನ ವೇಳೆ ನೆರವು ಯಾಚಿಸಿದ್ರೂ ಸುಷ್ಮಾ ರೆಡಿ: ಮೋದಿ ಪ್ರಶಂಸೆ

Team Udayavani, Jun 26, 2017, 12:11 PM IST

ವಾಷಿಂಗ್ಟನ್‌ : ವಿಶ್ವದ  ಯವುದೇ ಮೂಲೆಯಲ್ಲೂ  ಸಂಕಷ್ಟಕೆ ಗುರಿಯಾಗುವ ಭಾರತೀಯರು ವಿವಶತೆಯಿಂದ ಟ್ವೀಟ್‌ ಮಾಡಿದಾಕ್ಷಣ ಅವರ ನೆರವಿಗೆ ನಸುಕಿನ 2 ಗಂಟೆಯ ವೇಳೆಯಲ್ಲೂ  ಧಾವಿಸುವ ವಿದೇಶ ವ್ಯವಹಾರಗಳ ಸಚಿವೆ ಸುಶ್ಮಾ ಸ್ವರಾಜ್‌ ಅವರ ಕಾರ್ಯ ತತ್ಪರತೆ, ಕರ್ತವ್ಯ ಪ್ರಜ್ಞೆ  ಮತ್ತು ಅವಿರತ ಸೇವೆಯನ್ನು ಪ್ರಧಾನಿ ನರೇಂದ್ರ ಮೋದಿ ಅವರು ಕೊಂಡಾಡಿದ್ದಾರೆ. 

ವರ್ಜೀನಿಯಾದಲ್ಲಿ  ಭಾರತೀಯ ಡಯಾಸ್ಫೋರವನ್ನು ಉದ್ದೇಶಿಸಿ ಮಾತನಾಡುತ್ತಿದ್ದ  ಪ್ರಧಾನಿ ಮೋದಿ ಅವರು, “ಇಂದು ಸಾಮಾಜಿಕ ಮಾಧ್ಯಮ ತುಂಬಾ ಬಲಿಷ್ಠವಾಗಿದೆ. ನಾನು ಕೂಡ ಅದರೊಂದಿಗೆ ಕೂಡಿಕೊಂಡಿದ್ದೇನೆ; ಆದರೆ ಈ ಮಾಧ್ಯಮವನ್ನು ಎಷ್ಟು ಪರಿಣಾಮಕಾರಿಯಾಗಿ ಬಳಸಿಕೊಂಡು ಸರಕಾರಿ ಸೇವೆಯನ್ನು ಚುರುಕುಗೊಳಿಸಬಹುದು ಮತ್ತು ಒಳ್ಳೆಯ ಹೆಸರು ತರಬಹುದು ಎಂಬುದನ್ನು 
ವಿದೇಶ ವ್ಯವಹಾರಗಳ ಸಚಿವೆ ಸುಶ್ಮಾ ಸ್ವರಾಜ್‌ ಅವರು ತೋರಿಸಿಕೊಟ್ಟಿದ್ದಾರೆ. ನಸುಕಿನ 2 ಗಂಟೆಯ ವೇಳೆಯಲ್ಲಿ ಕೂಡ ಅವರು ವಿಶ್ವದ ಯಾವುದೇ ಮೂಲೆಯಲ್ಲಿ ಸಂಕಷ್ಟಕ್ಕೆ ಈಡಾಗುವ ಭಾರತೀಯರ ನೆರವಿಗೆ ಧಾವಿಸುತ್ತಾರೆ’ ಎಂದು ಪ್ರಶಂಸೆಯ ಮಾತುಗಳನ್ನು ಆಡಿದರು.

“ರಾಜತಾಂತ್ರಿಕ ವ್ಯವಹಾರಗಳಿಗೆ ಮಾನವಿಕ ಮುಖ ನೀಡಿರುವ ಸುಶ್ಮಾ ಸ್ವರಾಜ್‌ ಅವರು ಉತ್ತಮ ಆಡಳಿತೆಯಲ್ಲಿ ಸಾಮಾಜಿಕ ಜಾಲ ತಾಣಗಳನ್ನು ಪರಿಣಾಮಕಾರಿಯಾಗಿ ಬಳಸಿಕೊಳ್ಳುತ್ತಿದ್ದಾರೆ. ಹಾಗಾಗಿ ಆಕೆ ದೇಶದ ಬಡವರಲ್ಲಿ ಬಡವರ ಜತೆಗೆ ಕೂಡ ಸಂಪರ್ಕ ಬೆಳೆಸಿಕೊಂಡಿದ್ದಾರೆ’ ಎಂದು ಮೋದಿ ಹೇಳಿದರು.