ಬಯೋ ಟಾಯ್ಲೆಟ್‌ ಇದ್ದರೂ ರೈಲಲ್ಲಿ ಇರುತ್ತೆ ಕಟ್ಟಿದ ಮಗ್‌

Team Udayavani, Jul 31, 2018, 6:00 AM IST

ಹೊಸದಿಲ್ಲಿ: ಬೋಗಿಗಳಲ್ಲಿ ಪ್ರಯಾಣಿಕರಿಗಾಗಿ 2 ಲಕ್ಷ ಬಯೋ ಶೌಚಾಲಯ ಅಳವಡಿಸಲು ರೈಲ್ವೆ ಸಚಿವಾಲಯ ಮುಂದಾಗಿದೆಯಾದರೂ, ಹಳೆಯ ಶೌಚಾಲಯ ವ್ಯವಸ್ಥೆಯಲ್ಲಿ ಇರುವ ಚೈನ್‌ ಮೂಲಕ ಕಟ್ಟಲಾಗಿರುವ ಲೋಹದ ಮಗ್‌ ಅನ್ನು ಬದಲಾಯಿಸದೇ ಇರಲು ನಿರ್ಧರಿಸಲಾಗಿದೆ.  

ಬಯೋ ಶೌಚಾಲಯವನ್ನು ಅಳವಡಿಸಲಾಗುತ್ತಿದ್ದರೂ, ಅವುಗಳೂ ಕಳವಾಗುವ ಸಾಧ್ಯತೆ ಇದೆ. ಹೀಗಾಗಿ, ಚೈನ್‌ ಮೂಲಕ ಕಟ್ಟಲಾಗಿರುವ ಮಗ್‌ ಇರಲಿದೆ ಎಂದು ಹೆಸರು ಬಹಿರಂಗಪಡಿಸಲಿಚ್ಛಿಸದ ಅಧಿಕಾರಿ ಹೇಳಿದ್ದಾಗಿ “ದ ಹಿಂದುಸ್ತಾನ್‌ ಟೈಮ್ಸ್‌’ ವರದಿ ಮಾಡಿದೆ. 2017-18ನೇ ಸಾಲಿನಲ್ಲಿ ರೈಲ್ವೆ ಪೊಲೀಸರು ವಶಪಡಿಸಿಕೊಂಡ 2.97 ಕೋಟಿ ರೂ. ಮೊತ್ತದ ಸೊತ್ತಿನಲ್ಲಿ ಲೋಹದ ಮಗ್‌ಗಳು ಸೇರಿದ್ದವು. 2018-19ನೇ ಸಾಲಿನಲ್ಲಿ ರೈಲ್ವೆ ಇಲಾಖೆ 80 ಸಾವಿರ ಬಯೋ ಶೌಚಾಲಯ ಅಳವಡಿಸಲು ಮುಂದಾಗಿದೆ. ಇದುವರೆಗೆ 1,25,000 ಜೈವಿಕ ಶೌಚಾಲಯ ಅಳವಡಿಸಲಾಗಿದೆ. ಮಾರ್ಚ್‌ ವರೆಗೆ 55 ಸಾವಿರ ಕೋಚ್‌ಗಳ ಪೈಕಿ 34,500 ಕೋಚ್‌ಗಳಿಗೆ ಹೊಸ ವ್ಯವಸ್ಥೆ ಅಳವಡಿಸಲಾಗಿದೆ ಎಂದಿದ್ದಾರೆ ಆ ಅಧಿಕಾರಿ.