ಮಿನಿ ಫೈಟ್, ಕೌಂಟ್ ಡೌನ್; ಎಲ್ಲರ ಚಿತ್ತ ಚುನಾವಣೋತ್ತರ ಸಮೀಕ್ಷೆಯತ್ತ

Team Udayavani, Mar 9, 2017, 4:31 PM IST

ನವದೆಹಲಿ/ಉತ್ತರಪ್ರದೇಶ:ಹೈವೋಲ್ಟೇಜ್ ಮಿನಿ ಸಮರ ಎಂದೇ ಬಿಂಬಿತವಾಗಿದ್ದ ಪಂಚರಾಜ್ಯಗಳ ಜಿದ್ದಾಜಿದ್ದಿನ ಚುನಾವಣೆ ಮುಗಿದಿದೆ. ಮಾರ್ಚ್ 11ರಂದು ಫಲಿತಾಂಶ ಹೊರಬೀಳಲಿದ್ದು, ಏತನ್ಮಧ್ಯೆ ಇದೀಗ ಎಲ್ಲರ ಚಿತ್ತ ಗುರುವಾರ 5.30ಕ್ಕೆ ಬಹಿರಂಗವಾಗಲಿರುವ ಚುನಾವಣೋತ್ತರ ಸಮೀಕ್ಷೆ ಮೇಲೆ ನೆಟ್ಟಿದೆ.

ಉತ್ತರಪ್ರದೇಶ, ಉತ್ತರಾಖಂಡ್, ಪಂಜಾಬ್, ಗೋವಾ ಹಾಗೂ ಮಣಿಪುರ ಸೇರಿದಂತೆ ಐದು ರಾಜ್ಯಗಳ ವಿಧಾನಸಭಾ ಚುನಾವಣೆಯ ಫಲಿತಾಂಶ ಮಾ.11ಕ್ಕೆ ಜಗಜ್ಗಾಹೀರಾಗಲಿದೆ. ಚುನಾವಣೋತ್ತರ ಸಮೀಕ್ಷೆಯಲ್ಲಿ ಯಾವ ಪಕ್ಷಕ್ಕೆ ಎಷ್ಟು ಸ್ಥಾನ ದೊರೆಯಲಿದೆ ಎಂಬ ಲೆಕ್ಕಾಚಾರದ ವರದಿಯತ್ತ ಎಲ್ಲರಲ್ಲಿ ಕುತೂಹಲ ಗರಿಗೆದಿರಿಸಿದೆ.

ಇಬ್ಬರು ಅಭ್ಯರ್ಥಿಗಳ ನಿಧನದಿಂದ ತೆರವಾಗಿರುವ ಕ್ಷೇತ್ರಗಳಿಗೆ ಚುನಾವಣೆ ನಡೆಯುತ್ತಿದ್ದು, ಈ ಹಿನ್ನೆಲೆಯಲ್ಲಿ ಮಾ.9ರ ಸಂಜೆವರೆಗೆ ಚುನಾವಣೋತ್ತರ ಸಮೀಕ್ಷೆ ಪ್ರಸಾರ ಮಾಡದಂತೆ ಚುನಾವಣಾ ಆಯೋಗ ನಿರ್ಬಂಧ ಹೇರಿತ್ತು. ಯಾವುದೇ ಕಾರಣಕ್ಕೂ ಮಾ.9ರ ಸಂಜೆ 5.30ರೊಳಗೆ ಎಕ್ಸಿಟ್ ಪೋಲ್ ಫಲಿತಾಂಶ ಪ್ರಸಾರ ಮಾಡಬಾರದು ಎಂದು ಚುನಾವಣಾ ಆಯೋಗ ಸೂಚನೆ ನೀಡಿತ್ತು.

ಉತ್ತರಪ್ರದೇಶದ ಅಲಾಪುರ್ ಹಾಗೂ ಉತ್ತರಾಖಂಡ್ ನ ಕರ್ಣಪ್ರಯಾಗ್ ಕ್ಷೇತ್ರದಲ್ಲಿ ಚುನಾವಣೆ ನಡೆಯುತ್ತಿದೆ. ಉತ್ತರಪ್ರದೇಶ ಅಲಾಪುರ್ ಕ್ಷೇತ್ರದಲ್ಲಿನ ಸಮಾಜವಾದಿ ಪಕ್ಷದ ಅಭ್ಯರ್ಥಿ ಚಾಂದ್ ಶೇಖರ್ ಹಾಗೂ ಉತ್ತರಾಖಂಡ್ ನ ಕರ್ಣಪ್ರಯಾಗ್ ಕ್ಷೇತ್ರದ ಬಿಎಸ್ಪಿ ಅಭ್ಯರ್ಥಿ ಕಾನ್ವಾಸಿ ಸಾವನ್ನಪ್ಪಿದ್ದರು. ತೆರವಾದ 2 ಕ್ಷೇತ್ರಗಳಿಗೆ ಚುನಾವಣೆ ನಡೆಯುತ್ತಿದ್ದು, ಮತದಾನ ಮುಕ್ತಾಯವಾದ ಬಳಿಕ ಎಕ್ಸಿಟ್ ಫೋಲ್ ಫಲಿತಾಂಶ ಪ್ರಕಟಿಸುವಂತೆ ಆಯೋಗ ತಿಳಿಸಿತ್ತು.