ಸಾಧನೆಯನ್ನು ತಿಳಿಸುವಲ್ಲಿ ವಿಫ‌ಲವಾದೆ: ಆರ್‌.ಪಿ. ರೂಡಿ

Team Udayavani, Sep 6, 2017, 9:00 AM IST

ಪಾಟ್ನಾ: ಕೇಂದ್ರ ಸಂಪುಟ ಪುನಾರಚನೆ ಮುಗಿದು ಹೊಸ ಸಚಿವರು ಪ್ರಮಾಣ ಸ್ವೀಕರಿಸಿದ ಮೇಲೂ ಸಚಿವ ಸ್ಥಾನ ಕಳೆದುಕೊಂಡವರಲ್ಲಿನ ಅಸಮಾಧಾನದ ಹೊಗೆ ಆರಿಲ್ಲ. ಕರ್ನಾಟಕದ ಸಂಸದ ಸುರೇಶ್‌ ಅಂಗಡಿ ಅವರು ಅಸಮಾಧಾನ ಹೊರಹಾಕಿದ ಬೆನ್ನಲ್ಲೇ ಮಾಜಿ ಸಚಿವ ರಾಜೀವ್‌ ಪ್ರತಾಪ್‌ ರೂಡಿ ಅವರೂ ಈ ಕುರಿತು ಮಾತನಾಡಿದ್ದಾರೆ. “ಕೌಶಲಾಭಿವೃದ್ಧಿ ಸಚಿವನಾಗಿ ನನ್ನ ಸಾಧನೆಯನ್ನು ಪ್ರಧಾನಿ ಮೋದಿ ಹಾಗೂ ದೇಶದ ಜನತೆಗೆ ತಿಳಿಸುವಲ್ಲಿ ನಾನು ವಿಫ‌ಲನಾದೆ,’ ಎಂದು ರೂಡಿ ಮಂಗಳವಾರ ಹೇಳಿದ್ದಾರೆ.

ಅಷ್ಟೇ ಅಲ್ಲ, ನಾನು ನನ್ನಿಂದಾದ ಎಲ್ಲ ಪ್ರಯತ್ನಗಳನ್ನೂ ಮಾಡಿದ್ದೇನೆ. ಎಲ್ಲರಿಗೂ ಎದ್ದು ಕಾಣುವಂಥ ಕೆಲಸಗಳನ್ನು ಮಾಡಲು ನನ್ನ ಉತ್ತರಾಧಿಕಾರಿಗೂ ಸ್ವಲ್ಪ ಸಮಯ ಬೇಕಾಗುತ್ತದೆ ಎಂದಿದ್ದಾರೆ. ಪುನಾರಚನೆಗೆ 2 ದಿನವಿದ್ದಾಗ ರೂಡಿ ಅವರಿಂದ ಪ್ರಧಾನಿ ಮೋದಿ ರಾಜೀನಾಮೆ ಪಡೆದಿದ್ದರು. ನಂತರ ಆ ಖಾತೆಯನ್ನು ಸಚಿವ ಧರ್ಮೇಂದ್ರ ಪ್ರಧಾನ್‌ರಿಗೆ ಹೆಚ್ಚುವರಿಯಾಗಿ ವಹಿಸಲಾಗಿತ್ತು. “ದೇಶಾದ್ಯಂತ ತರಬೇತಿ ಕೇಂದ್ರಗಳನ್ನು ನಾನು ಸ್ಥಾಪಿಸಿದ್ದೇನೆ. ಮಾರ್ಗಸೂಚಿ ಕೂಡ ಸಿದ್ಧವಿದೆ. ಇಷ್ಟೆಲ್ಲ ಕೆಲಸಗಳನ್ನು ಕಡಿಮೆ ಅವಧಿಯಲ್ಲಿ ಮುಗಿಸಿದ್ದೇನೆ,’ ಎಂದಿದ್ದಾರೆ ರೂಡಿ.