ಪೂರಂನಲ್ಲಿ ಪಟಾಕಿಗೆ ಅನುಮತಿ

Team Udayavani, Apr 12, 2019, 6:00 AM IST

ಹೊಸದಿಲ್ಲಿ: ಕೇರಳದ ತಿರುವಂಬಾಡಿ ದೇವಸ್ವಂ ಹಾಗೂ ಪರಮೆಕ್ಕಾವು ದೇವಸ್ವಂನಲ್ಲಿ ತ್ರಿಶೂರು ಪೂರಂ ಹಬ್ಬದ ವೇಳೆ ಪಟಾಕಿ ಸಿಡಿಸಲು ಸುಪ್ರೀಂಕೋರ್ಟ್‌ ಅನುಮತಿ ನೀಡಿದೆ. ಮೇ 7ರಿಂದ 14 ವರೆಗೆ ನಡೆಯ ಲಿರುವ ಈ ಹಬ್ಬ ಅನಾದಿ ಕಾಲದಿಂದಲೂ ಚಾಲ್ತಿಯಲ್ಲಿದೆ. ಈ ಹಬ್ಬದ ಮೂಲ ಆಶಯವೇ ಪಟಾಕಿ ಹಚ್ಚುವುದು ಎಂಬುದಾಗಿ ನ್ಯಾಯಪೀಠ ಅಭಿಪ್ರಾಯಪಟ್ಟಿದೆ. ಹೀಗಾಗಿ ಹಬ್ಬವನ್ನು ನಿಷೇಧಿಸಲು ಯಾವುದೇ ಕಾರಣವಿಲ್ಲ ಎಂದೂ ಕೋರ್ಟ್‌ ಹೇಳಿದೆ. ಆದರೆ ಈಗಾಗಲೇ ಪಟಾಕಿ ತಯಾರಿಕೆ ನಿಷೇಧಿಸಿರುವುದರಿಂದ, ಈ ಹಬ್ಬದ ಪ್ರಯುಕ್ತ ಪಟಾಕಿ ತಯಾರಿಸಲು ಅನುಮತಿ ನೀಡು ವಂತೆ ತಯಾರಕರು ಅರ್ಜಿ ಸಲ್ಲಿಸಬೇಕಾಗಿದೆ.

ಹಸಿರು ಪಟಾಕಿಗೆ ಅಸ್ತು: ಮತ್ತೂಂದೆಡೆ, ಪೆಟ್ರೋಲಿಯಂ ಮತ್ತು ಸ್ಫೋಟಕ ಸುರಕ್ಷಾ ಸಂಸ್ಥೆ (ಪೆಸ್ಕೋ) ರೂಪಿಸಿರುವ “ಹಸಿರು ಪಟಾಕಿ’ (ಗ್ರೀನ್‌ ಕ್ರಾಕರ್ಸ್‌) ಸೂತ್ರಕ್ಕೆ ಒಪ್ಪಿಗೆ ನೀಡಿರುವ ಸುಪ್ರೀಂ, ಪರಿಸರ ಸ್ನೇಹಿ ಪಟಾಕಿ ಉತ್ಪಾದನೆಗೆ ಅನುವು ಮಾಡಿಕೊಡಬೇಕೆಂದು ಸರಕಾರಕ್ಕೆ ಸೂಚಿಸಿದೆ.