ಕೈ ಸುಡಲಿದೆ ಆಹಾರ ಆ್ಯಪ್‌ ಸೇವೆ?

Team Udayavani, Sep 16, 2021, 6:40 AM IST

ನವದೆಹಲಿ: ನಗರ ಪಟ್ಟಣ ಪ್ರದೇಶಗಳಲ್ಲಿ ಆಹಾರ ಪೂರೈಕೆ ಮಾಡುವ ಝೊಮ್ಯಾಟೋ, ಸ್ವಿಗ್ಗಿ, ಫ‌ುಡ್‌ಪಂಡಾ ಸೇವೆಗಳು ದುಬಾರಿ ಯಾಗುವ ಆತಂಕ ಎದುರಾಗಿದೆ.

ಶುಕ್ರವಾರ ನಡೆಯಲಿರುವ ಜಿಎಸ್‌ಟಿ ಮಂಡಳಿ ಸಭೆಯಲ್ಲಿ ಎರಡೂ ಸಂಸ್ಥೆಗಳಿಗೆ “ರೆಸ್ಟಾರೆಂಟ್‌’ ಎಂಬ ಮಾನ್ಯತೆ ನೀಡುವ ಬಗ್ಗೆ ಚರ್ಚೆ ನಡೆಯುವ ಸಾಧ್ಯತೆ ಇದೆ. ವಿತ್ತ ಸಚಿವಾಲಯ ಫಿಟ್‌ಮೆಂಟ್‌ ಕಮಿಟಿ ಆಹಾರ ವಿತರಿಸುವ ಆ್ಯಪ್‌ಗಳನ್ನು ಇ-ಕಾ­ಮರ್ಸ್‌ ಕಂಪನಿ­ಗಳನ್ನು ರೆಸ್ಟಾರೆಂಟ್‌ ಎಂಬ ವ್ಯಾಪ್ತಿಗೆ ಒಳಪಡಬೇಕು. ಅದಕ್ಕೆ ಅನು­ಗುಣ­ವಾಗಿ ತೆರಿಗೆ ವಿಧಿಸಬೇಕು ಎಂದು ಶಿಫಾರಸು ಮಾಡಿದೆ.

ಪ್ರಸ್ತಾಪಕ್ಕೆ ಅನುಮೋದನೆ ಸಿಕ್ಕಿದರೆ ಅವುಗಳ ಸೇವೆಗಳು ದುಬಾರಿಯಾಗಲಿವೆ. ಸದ್ಯ ರೆಸ್ಟಾರೆಂ ಟ್‌ಗಳಿಂದಲೇ ಜಿಎಸ್‌ಟಿ ಸೇವೆ ಪಾವತಿಯಾಗುತ್ತಿದೆಯೇ ಹೊರತು ಆ್ಯಪ್‌ ಸಂಸ್ಥೆಗಳಿಂದ ಅಲ್ಲ.

ಪರಿಷ್ಕೃತ ಪರಿಹಾರ?: ಕೇಂದ್ರದಿಂದ ರಾಜ್ಯಗಳಿಗೆ ನೀಡಬೇಕಾಗಿ­ರುವ ಪರಿಹಾರದ ಬಗ್ಗೆ ಕೂಡ ಲಕ್ನೋದಲ್ಲಿ ನಡೆಯಲಿರುವ 45ನೇ ಜಿಎಸ್‌ಟಿ ಮಂಡಳಿ ಸಭೆಯಲ್ಲಿ ಚರ್ಚೆಯಾಗಲಿದೆ. ಕಂದಾಯ ಸಂಗ್ರಹ ಮತ್ತು ವ್ಯವಸ್ಥೆಯಲ್ಲಿನ ಲೋಪ, ರಸಗೊಬ್ಬರ, ಪಾದರಕ್ಷೆ, ಜವಳಿ ಕ್ಷೇತ್ರಗಳಿಗೆ ಯಾವ ರೀತಿ ನೆರವು ನೀಡಬೇಕು ಎಂಬ ಬಗ್ಗೆ ಕೂಡ ಮಂಡಳಿ ಚರ್ಚೆ ನಡೆಸುವ ಸಾಧ್ಯತೆಗಳಿವೆ. ಪಾನ್‌ ಮಸಾ­ಲಾಕ್ಕೆ ತೆರಿಗೆ ವಿಧಿಸುವ ಪ್ರಸ್ತಾಪ ಮುಂದೂಡುವ ಸಾಧ್ಯತೆಗಳಿದೆ.