ಕೇರಳ: ಸ್ಟುಡಿಯೋದಲ್ಲಿ ಮಾಜಿ ರೇಡಿಯೋ ಜಾಕಿಯ ಬರ್ಬರ ಹತ್ಯೆ

Team Udayavani, Mar 27, 2018, 10:37 AM IST

ತಿರುವನಂತಪುರ : ತಿರುವನಂತಪುರದ ಮದವೂರು ಎಂಬಲ್ಲಿನ ತನ್ನ ಸ್ಟುಡಿಯೋದಲ್ಲೇ ಸೋಮವಾರ ರಾತ್ರಿ ಮಾಜಿ ರೇಡಿಯೋ ಜಾಕಿ ರಾಜೇಶ್‌ ಅವರನ್ನು ಅಪರಿಚಿತ ದುಷ್ಕರ್ಮಿಗಳು ಕೊಚ್ಚಿ ಕೊಲೆಗೈದಿದ್ದಾರೆ. 

ವೇದಿಕೆ ಕಾರ್ಯಕ್ರಮವೊಂದನ್ನು ಮುಗಿಸಿ ತನ್ನ ಸ್ನೇಹಿತನ ಜತೆಗೆ ಮರಳುತ್ತಿದ್ದ ರಾಜೇಶ್‌ ಮೇಲೆ ದುಷ್ಕರ್ಮಿಗಳು ಮಾರಕಾಯುಧಗಳಿಂದ ದಾಳಿ ನಡೆಸಿದರು. ದಾಳಿ ನಡೆದಿದ್ದಾಗ ರಾಜೇಶ್‌ ಮತ್ತು ಆತನ ಸ್ನೇಹಿತ ತಮ್ಮ ಸಲಕರಣೆಗಳನ್ನು ಸ್ಟುಡಿಯೋದಲ್ಲಿ ಇರಿಸಿದ್ದರು. ದಾಳಿಕೋರರು ಕೆಂಪು ಬಣ್ಣದ ಮಾರುತಿ ಸ್ವಿಫ್ಟ್ ಕಾರಿನಲ್ಲಿ ಬಂದು ಹರಿತವಾದ ಆಯುಧಗಳಿಂದ ರಾಜೇಶ್‌ ಮತ್ತು ಆತನ ಸ್ನೇಹಿತನ ಮೇಲೆ ದಾಳಿ ನಡೆಸಿದರು. 

ದಾಳಿ ನಡೆದ ಕೂಡಲೇ ಇದನ್ನು ಗಮನಿಸಿದ ಸ್ಥಳೀಯರು ಒಡನೆಯೇ ಪೊಲೀಸರನ್ನು ಜಾಗೃತಗೊಳಿಸಿದರು. ತೀವ್ರ ಗಾಯಗೊಂಡಿದ್ದ ರಾಜೇಶ್‌ ಅವರು ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದರು. ಆತನ ಸ್ನೇಹಿತನಿಗೂ ಗಂಭೀರ ಗಾಯಗಳಾಗಿದ್ದು ಆತ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾನೆ. 

ರಾಜೇಶ್‌ ರೆಡ್‌ ಎಫ್ಎಂನ ರೇಡಿಯೋ ಜಾಕಿಯಾಗಿ ಅನೇಕ ವರ್ಷಗಳ ಕಾಲ ದುಡಿದಿದ್ದರು. ದೋಹಾದಲ್ಲಿನ ವಾಯ್ಸ ಆಫ್ ಕೇರಳ ಎಫ್ಎಂ ಸ್ಟೇಶನ್‌ನಲ್ಲೂ ರಾಜೇಶ್‌ ಈ ಹಿಂದೆ ದುಡಿದಿದ್ದರು. ಈಚೆಗಷ್ಟೇ ಅವರು ದೋಹಾದಿಂದ ಮರಳಿ ಸ್ಥಳೀಯ ಮಿಮಿಕ್ರಿ ತಂಡವೊಂದನ್ನು ಸೇರಿಕೊಂಡಿದ್ದರು. 

ಪೊಲೀಸರು ಕೊಲೆ ಕೇಸನ್ನು ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.