ಗೀತಾ ಗೋಪಿನಾಥ್‌ ಐಎಂಎಫ್ ಮುಖ್ಯ ಆರ್ಥಿಕ ತಜ್ಞೆ

Team Udayavani, Oct 2, 2018, 6:00 AM IST

ನವದೆಹಲಿ: ಭಾರತೀಯ ಮೂಲದ ಆರ್ಥಿಕ ತಜ್ಞೆ ಗೀತಾ ಗೋಪಿನಾಥ್‌ರನ್ನು ಅಂತಾರಾಷ್ಟ್ರೀಯ ಹಣಕಾಸು ಸಂಸ್ಥೆ (ಐಎಂಎಫ್)ಯ ಮುಖ್ಯ ಹಣಕಾಸು ತಜ್ಞರನ್ನಾಗಿ ನೇಮಿಸಲಾಗಿದೆ. ಆರ್‌ಬಿಐ ನಿವೃತ್ತ ಗವರ್ನರ್‌ ರಘುರಾಂ ರಾಜನ್‌ ಅವರ ಬಳಿಕ ಐಎಂಎಫ್ನಲ್ಲಿ ಈ ಹುದ್ದೆ ಅಲಂಕರಿಸುತ್ತಿರುವ 2ನೇ ಭಾರತೀಯ ಅರ್ಥಶಾಸ್ತ್ರಜ್ಞೆ ಎಂಬ ಹೆಗ್ಗಳಿಕೆಗೆ ಇವರು ಪಾತ್ರರಾಗಿದ್ದಾರೆ.

ಸದ್ಯ ಮೌರಿ ಒಬ್ಸ್ಫೆಲ್ಡ್‌ ಅವರು ಈ ಹುದ್ದೆಯಲ್ಲಿದ್ದು, ಈ ವರ್ಷಾಂತ್ಯಕ್ಕೆ ನಿವೃತ್ತರಾಗಲಿದ್ದಾರೆ. ಬಳಿಕ ಗೀತಾ ಗೋಪಿನಾಥ್‌ ಅಧಿಕಾರ ವಹಿಸಿಕೊಳ್ಳಲಿದ್ದಾರೆ. ಸದ್ಯ ಅವರು ಹಾರ್ವರ್ಡ್‌ ವಿವಿಯ ಅರ್ಥಶಾಸ್ತ್ರ ಮತ್ತು ಅಂತಾರಾಷ್ಟ್ರೀಯ ಅಧ್ಯಯನ ವಿಭಾಗದಲ್ಲಿ ಪ್ರಾಧ್ಯಾಪಕರಾಗಿದ್ದಾರೆ. ನವದೆಹಲಿಯ ಸ್ಕೂಲ್‌ ಆಫ್ ಎಕನಾಮಿಕ್ಸ್‌ನಲ್ಲಿ ಬಿ.ಎ ಮತ್ತು ಎಂ.ಎ.ಪದವಿ ಗಳಿಸಿದ ಬಳಿಕ 2001ರಲ್ಲಿ ಪ್ರಿನ್ಸ್‌ಟನ್‌ ವಿವಿಯಿಂದ ಪಿಎಚ್‌.ಡಿ ಪದವಿ ಪಡೆದಿದ್ದಾರೆ. 2014ರಲ್ಲಿ ಗೀತಾರನ್ನು ಐಎಂಎಫ್ “ಭವಿಷ್ಯ ಬದಲಿಸುವ ಸಾಮರ್ಥ್ಯವುಳ್ಳ  ಜಗತ್ತಿನ 25 ಯುವ ಅರ್ಥಶಾಸ್ತ್ರಜ್ಞರ ಪಟ್ಟಿ’ಯಲ್ಲಿ ಇವರನ್ನೂ ಸೇರಿಸಿತ್ತು. ಪ್ರಸ್ತುತ ಅವರು ಕೇರಳದ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್‌ ಅವರ ಮುಖ್ಯ ಆರ್ಥಿಕ ಸಲಹೆಗಾರರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.