ಗೋವಾ : ಅಂಬ್ಯುಲೆನ್ಸ್ ನಲ್ಲಿ ಕೋವಿಡ್ ಸೋಂಕಿತರ ಓಡಾಟ ; ಆತಂಕದಲ್ಲಿ ಚೆಕ್‍ಪೋಸ್ಟ್ ಪ್ರದೇಶ

Team Udayavani, May 3, 2021, 8:13 PM IST

ಸಾಂದರ್ಭಿಕ ಚಿತ್ರ

ಪಣಜಿ: ಗೋವಾದಿಂದ ಮಹಾರಾಷ್ಟ್ರದ ಅಹಮದ್‍ನಗರಕ್ಕೆ ಅಂಬ್ಯುಲೆನ್ಸ್ ನಲ್ಲಿ ಹೊರಟಿದ್ದ 4 ಜನರನ್ನು ಮಹಾರಾಷ್ಟ್ರ ಗಡಿಯಲ್ಲಿ ಥರ್ಮಲ್ ಗನ್ ತಪಾಸಣೆ ನಡೆಸಿದಾಗ ನಾಲ್ವರಲ್ಲೂ ಜ್ವರ ಕಾಣಿಸಿಕೊಂಡಿದ್ದು ಮಾತ್ರವಲ್ಲದೆಯೇ ಈ ನಾಲ್ವರೂ ಕೋವಿಡ್ ಸೋಂಕಿತರು ಎಂದು ದೃಢಪಟ್ಟ ನಂತರ ಈ ನಾಲ್ವರನ್ನೂ ಮಹಾರಾಷ್ಟ್ರಕ್ಕೆ ಪ್ರವೇಶಾವಕಾಶ ನೀಡದೆಯೇ ಗೋವಾಕ್ಕೆ ವಾಪಸ್ಸು ಕಳುಹಿಸಿದ ಘಟನೆ ನಡೆದಿದೆ.

ಈ ನಾಲ್ವರ ಆಕ್ಸಿಜನ್ ಪ್ರಮಾಣದಲ್ಲೂ ಕೊರತೆಯಿರುವುದು ಕಂಡುಬಂದಿದೆ. ತಪಾಸಣೆ ನಡೆಸಿದಾಗ ಈ ನಾಲ್ವರೂ ಕೋವಿಡ್ ಸೋಂಕಿತರು ಎಂಬುದು ಖಚಿತವಾದ ಹಿನ್ನೆಲೆಯಲ್ಲಿ ಇವರನ್ನು ಗೋವಾಕ್ಕೆ ವಾಪಸ್ಸು ಕಳುಹಿಸಿದ ಘಟನೆ ನಡೆದಿದೆ. ಈ ಘಟನೆಯಿಂದಾಗಿ ಗೋವಾ ಮಹಾರಾಷ್ಟ್ರ ಗಡಿ ಭಾಗದಲ್ಲಿ ಆತಂಕ ಮನೆಮಾಡಿದ್ದು ಚೆಕ್‍ಪೋಸ್ಟ್ ಪ್ರದೇಶವನ್ನು ಸ್ಯಾನಿಟೈಜೇಶನ್ ಮಾಡಲಾಗಿದೆ.

ಅಂಬ್ಯುಲೆನ್ಸ್ ನಲ್ಲಿ ಮಹಾರಾಷ್ಟ್ರಕ್ಕೆ ತೆರಳುತ್ತಿದ್ದ ನಾಲ್ಕೂ ಜನ ಕೋವಿಡ್ ಸೋಂಕಿತರು ಎಂದು ಖಚಿತವಾದ ನಂತರ ಸಾವಂತವಾಡಿ ತಹಶೀಲ್ದಾರ್ ರಾಜಾರಾಮ ಮಾತ್ರೆ ರವರಿಗೆ ಈ ಮಾಹಿತಿ ನೀಡಲಾಯಿತು. ಸ್ಥಳಕ್ಕೆ ಧಾವಿಸಿದ ಬಂದ ತಹಶೀಲ್ದಾರ್ ರವರು ಈ ನಾಲ್ಕೂ ಜನರನ್ನು ಗೋವಾದಲ್ಲಿರುವ ನಿಮ್ಮ ನಿವಾಸಕ್ಕೆ ತೆರಳುವಂತೆ ಸೂಚನೆ  ನೀಡಲಾಯಿತು ಎಂಬ ಮಾಹಿತಿ ಲಭ್ಯವಾಗಿದೆ.

ಆದರೆ ಗೋವಾದಿಂದ 4 ಜನ ಕೋವಿಡ್ ಸೋಂಕಿತರನ್ನು ಕರೆದುಕೊಂಡು ಮಹಾರಾಷ್ಟ್ರಕ್ಕೆ ತೆರಳುತ್ತಿದ್ದ ಕಾರಣವೇನು ಎಂಬುದು ಮಾತ್ರ ಇದುವರೆಗೂ ತಿಳಿದುಬಂದಿಲ್ಲ. ಆದರೆ ಕೋವಿಡ್ ಸೋಂಕಿತರು ಅಂಬ್ಯುಲೆನ್ಸ್ ನಲ್ಲಿ ಓಡಾಟ ನಡೆಸಿರುವುದು ಆತಂಕ ಹೆಚ್ಚುವಂತೆ ಮಾಡಿದೆ.