ಹಳ್ಳಿಯಲ್ಲಿಯೇ ಪ್ರಗತಿ ಹೊಂದುವ ಮಂತ್ರವನ್ನು ಗ್ರಾಮಸ್ಥರಿಗೆ ನೀಡಬೇಕು: ರಾಜೇಂದ್ರ ಅರ್ಲೆಕರ್

Team Udayavani, Dec 13, 2021, 5:34 PM IST

ಪಣಜಿ: ಗೋವಾದಲ್ಲಿ ಪೆಡ್ನೆ ಸೇರಿದಂತೆ ವಿವಿಧ ಹಿಂದುಳಿದ ತಾಲೂಕುಗಳ ಮುದ್ರೆಯನ್ನು ಅಳಿಸುವ ಕೆಲಸವನ್ನು ಭೂಮಿಪುತ್ರರು ಮಾಡಬೇಕು ಎಂದು ಹಿಮಾಚಲಪ್ರದೇಶದ ರಾಜ್ಯಪಾಲ ರಾಜೇಂದ್ರ ಅರ್ಲೆಕರ್ ಕರೆ ನೀಡಿದರು.

ಕಾಣಕೋಣದಲ್ಲಿ ಆಯೋಜಿಸಿದ್ದ ಲೋಕೋತ್ಸವ ಸಮಾರೋಪ ಸಮಾರಂಭದಲ್ಲಿ ಉಪಸ್ಥಿತರಿದ್ದು ಮಾತನಾಡಿದ ಅವರು- ಪ್ರಗತಿ ಎಂದರೆ ಹಳ್ಳಿ ಬಿಟ್ಟು ಹೋಗುವುದಲ್ಲ. ಹಳ್ಳಿಯಲ್ಲಿಯೇ ಪ್ರಗತಿ ಹೊಂದುವ ಮಂತ್ರವನ್ನು ಗ್ರಾಮಸ್ಥರಿಗೆ ನೀಡಬೇಕು. ದೇಶವನ್ನು ಮುನ್ನೆಡೆಸುವುದೇ ಪ್ರಧಾನಿ ನರೇಂದ್ರ ಮೋದಿಯವರ ಗುರಿಯಾಗಿದೆ ಎಂದರು.

ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದ ಕೇಂದ್ರ ಸಚಿವ ಶ್ರೀಪಾದ ನಾಯ್ಕ್ ಮಾತನಾಡಿ- ಆಯುಷ್ ಸಚಿವಾಲಯದ ಆಯುರ್ವೇದ ಸಸ್ಯ ಕೃಷಿ ಯೋಜನೆಯಿಂದ ರೈತರು ಶ್ರೀಮಂತರಾಗಬಹುದು. ಇಂದಿಗೂ ಕಾಡಿನಲ್ಲಿರುವ ಔಷಧಿ ಸಸ್ಯಗಳನ್ನು ಕಡಿಯಲಾಗುತ್ತಿದೆ. ವಿಶ್ವದ ವಿವಿಧ ದೇಶಗಳು ಆಯುರ್ವೇದ ಔಷಧ ಪದ್ಧತಿಗಾಗಿ ಭಾರತದತ್ತ ಎದುರು ನೋಡುತ್ತಿವೆ. ಭವಿಷ್ಯದಲ್ಲಿ ಆ ನಿರೀಕ್ಷೆಗಳನ್ನು ಪೂರ್ಣಗೊಳಿಸಲು ಈಗ ಹೆಚ್ಚಿನ ಪ್ರಯತ್ನ ಅಗತ್ಯವಿದೆ ಎಂದರು.

ರಾಜ್ಯಾದ್ಯಂತ ವಿವಿಧ ಕ್ಷೇತ್ರಗಳಲ್ಲಿ ಸಾಧನೆಗೈದ 45 ಜನ ಗಣ್ಯರನ್ನು ರಾಜ್ಯಪಾಲ ರಾಜೇಂದ್ರ ಅರ್ಲೇಕರ್ ಸನ್ಮಾನಿಸಿದರು.