ಎರಡು ವರ್ಷ ಕರೆ ವಿವರ ಡಿಲೀಟ್‌ ಮಾಡಬೇಡಿ! ದೂರಸಂಪರ್ಕ ಕಂಪನಿಗಳಿಗೆ ಕೇಂದ್ರ ಸರ್ಕಾರ ಸೂಚನೆ

Team Udayavani, Dec 24, 2021, 8:00 PM IST

ಸಾಂದರ್ಭಿಕ ಚಿತ್ರ.

ನವದೆಹಲಿ: ಇನ್ನು ಮುಂದೆ ನಾವು ಮಾಡಿದ ಕರೆಗಳ ವಿವರ ಮೊಬೈಲ್‌ನಿಂದ ನಾವೇ ಡಿಲೀಟ್‌ ಮಾಡಬಹುದು. ಆದರೆ, ನಾವು ಯಾವ ಕಂಪನಿಯ ಮೊಬೈಲ್‌ ಸಂಪರ್ಕ ಪಡೆದುಕೊಂಡಿರುತ್ತೇವೆಯೋ ಅವರ ಮಾಹಿತಿ ಕೋಶದಲ್ಲಿ ಕನಿಷ್ಠ ಎರಡು ವರ್ಷಗಳ ಕಾಲ ಭದ್ರವಾಗಿ ಇರಲಿದೆ.

ಭದ್ರತಾ ಕಾರಣಗಳಿಗಾಗಿ ಕೇಂದ್ರ ದೂರಸಂಪರ್ಕ ಸಚಿವಾಲಯವೇ ಈ ಬಗ್ಗೆ ಆದೇಶ ಹೊರಡಿಸಿದೆ ಎಂದು ಮೂಲಗಳನ್ನು ಉಲ್ಲೇಖಿಸಿ “ದ ಇಂಡಿಯನ್‌ ಎಕ್ಸ್‌ಪ್ರೆಸ್‌’ ವರದಿ ಮಾಡಿದೆ.

ಈ ನಿಯಮ ಇಂಟರ್‌ನೆಟ್‌ ಸೇವೆ ನೀಡುವ ಸಂಸ್ಥೆಗಳಿಗೂ ಅನ್ವಯವಾಗಲಿದೆ. ಎರಡು ನೆಟ್‌ವರ್ಕ್‌ಗಳ ನಡುವೆ ನಡೆದ ಎಲ್ಲಾ ರೀತಿಯ ಸಂಪರ್ಕ ವಿವರ ಮತ್ತು ಐ.ಪಿ. ವಿಳಾಸ, ಎಕ್ಸ್‌ಚೇಂಜ್‌ ಡಿಟೈಲ್‌ ರೆಕಾರ್ಡ್‌ಗಳನ್ನು ಎರಡು ವರ್ಷಗಳ ಕಾಲ ಇರಿಸಬೇಕು.

ಭದ್ರತಾ ಕಾರಣಗಳ ಹಿನ್ನೆಲೆಯಲ್ಲಿ ಇಂಥ ನಿರ್ಧಾರ ಕೈಗೊಳ್ಳಲಾಗಿದೆ. ಈ ಬಗ್ಗೆ ಡಿ.21ರಂದು ದೂರಸಂಪರ್ಕ ಸಚಿವಾಲಯ ಆದೇಶ ಹೊರಡಿಸಿದೆ.

ಇದನ್ನೂ ಓದಿ:ನಮ್ಮದು ಬದುಕು ಕಟ್ಟಿಕೊಡುವ ಸರ್ಕಾರ: ಬಸವರಾಜ ಬೊಮ್ಮಾಯಿ

ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ ಪ್ರಮುಖ ದೂರಸಂಪರ್ಕ ಮತ್ತು ಇಂಟರ್‌ನೆಟ್‌ ಸೇವೆಗಳನ್ನು ನೀಡುವ ಕಂಪನಿಗಳ ಹಿರಿಯ ಅಧಿಕಾರಿಗಳು, ಕೇಂದ್ರ ಸರ್ಕಾರ ಈ ಆದೇಶ ನೀಡದೇ ಇದ್ದರೂ, ಕನಿಷ್ಠ 12 ತಿಂಗಳು, ಗರಿಷ್ಠ ಎಂದರೆ 18 ತಿಂಗಳ ಕಾಲ ವಿವರಗಳನ್ನು ಕಂಪನಿಗಳ ಡೇಟಾ ಬೇಸ್‌ನಲ್ಲಿ ಇರಿಸಿಕೊಳ್ಳಲಾಗುತ್ತದೆ ಎಂದು ಪ್ರತಿಕ್ರಿಯೆ ನೀಡಿದ್ದಾರೆ.