ಗುಜರಿ ಸಾಮಾನುಗಳ ವಿಲೇವಾರಿಯಿಂದ 254 ಕೋಟಿ ರೂ. ಆದಾಯ

Team Udayavani, Oct 26, 2022, 7:20 AM IST

ನವದೆಹಲಿ: ಅ.2ರಿಂದ ಇಲ್ಲಿಯವರೆಗೆ ಗುಜರಿ ಸಾಮಾನುಗಳ ವಿಲೇವಾರಿಯಿಂದ ಕೇಂದ್ರ ಸರ್ಕಾರ 254.21 ಕೋಟಿ ರೂ. ಆದಾಯ ಗಳಿಸಿದೆ. 588 ನಿಯಮಗಳನ್ನು ಸರಳಗೊಳಿಸಲಾಗಿದೆ ಎಂದು ಕೇಂದ್ರ ಸಚಿವ ಜಿತೇಂದ್ರ ಸಿಂಗ್‌ ಹೇಳಿದರು.

ಮಂಗಳವಾರ ಸುದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, “ಸ್ವಚ್ಛತೆಗೆ ಸಂಬಂಧಿಸಿದಂತೆ ಅ.2ರಂದು ವಿಶೇಷ ಅಭಿಯಾನ 2.0 ಆರಂಭಿಸಲಾಗಿದ್ದು, ಅಭಿಯಾನದ ಅಂಗವಾಗಿ ಇದುವರೆಗೂ 37.19 ಲಕ್ಷ ಚದರ ಅಡಿಯಷ್ಟು ಜಾಗವನ್ನು ತೆರವುಗೊಳಿಸಲಾಗಿದೆ. 68,363 ಸ್ಥಳಗಳಲ್ಲಿ ಸ್ವಚ್ಛತಾ ಅಭಿಯಾನ ಕೈಗೊಳ್ಳಲಾಗಿದೆ. 40.52 ಲಕ್ಷ ಕಡತಗಳನ್ನು ಪರಿಶೀಲಿಸಲಾಗಿದೆ,’ ಎಂದು ತಿಳಿಸಿದರು.

“ದೇಶದ ಎಲ್ಲ ಸರ್ಕಾರಿ ಕಚೇರಿಗಳಲ್ಲಿ ಅಭಿಯಾನವನ್ನು ಅನುಷ್ಠಾನಗೊಳಿಸಲಾಗಿದೆ. ಅಭಿಯಾನದಲ್ಲಿ ಇದುವರೆಗೂ ಗಮನಾರ್ಹ ಪ್ರಗತಿ ಕಂಡಿದೆ. 3,20,152 ಸಾರ್ವಜನಿಕ ಕುಂದು-ಕೊರತೆಗಳನ್ನು ಪರಿಹರಿಸಲಾಗಿದೆ. ಸಂಸದರ 5,416 ಶಿಫಾರಸುಗಳನ್ನು ಪ್ರಕ್ರಿಯೆಗೊಳಿಸಲಾಗಿದೆ,’ ಎಂದು ಜಿತೇಂದ್ರ ಸಿಂಗ್‌ ಮಾಹಿತಿ ನೀಡಿದರು.