ಉಚಿತ ಗರ್ಭನಿರೋಧಕ ಇಂಜೆಕ್ಷನ್‌

Team Udayavani, Jul 12, 2017, 2:30 AM IST

ಮುಂಬಯಿ: ಮಹಿಳೆಯರು ಗರ್ಭನಿರೋಧಕ ಇಂಜೆಕ್ಷನ್‌ ರೂಪದಲ್ಲಿ ಬಳಸುವ ಎಂಪಿಎ (ಮೆಡ್ರಾಸ್ಕಿ ಪ್ರೊಜೆಸ್ಟರನ್‌ ಅಸಿಟೇಟ್‌) ಇಂಜೆಕ್ಷನ್‌ ಇನ್ನು ಸರಕಾರಿ ಆಸ್ಪತ್ರೆಗಳಲ್ಲೂ ದೊರೆಯಲಿದೆ. ಮಹಾರಾಷ್ಟ್ರ ಸರಕಾರವು ರಾಜ್ಯದ ಎಲ್ಲ ವೈದ್ಯಕೀಯ ಕಾಲೇಜು, ಜಿಲ್ಲಾ ಆಸ್ಪತ್ರೆ ಮತ್ತು ಮಹಿಳಾ ಆಸ್ಪತ್ರೆಗಳಲ್ಲಿ ಈ ಇಂಜೆಕ್ಷನ್‌ ಅನ್ನು ಉಚಿತವಾಗಿ ನೀಡಲಿದೆ. ಈ ಮೂಲಕ ಮಹಾರಾಷ್ಟ್ರ ಮಹಿಳೆಯರಿಗೆ ಉಚಿತವಾಗಿ ಎಂಪಿಎ ಇಂಜೆಕ್ಷನ್‌ ಒದಗಿಸುವ ದೇಶದ ಮೊದಲ ರಾಜ್ಯವಾಗಿ ಮಾರ್ಪಟ್ಟಿದೆ.

ವಿಶ್ವ ಜನಸಂಖ್ಯಾ ದಿನಾಚರಣೆಯ ಒಂದು ದಿನ ಮೊದಲು ಅಂದರೆ ಸೋಮವಾರ ರಾಜ್ಯದಲ್ಲಿ ಅಂತರಾ ಯೋಜನೆ ಅಡಿಯಲ್ಲಿ ಎಂಪಿಎ ಇಂಜೆಕ್ಷನ್‌ ಯೋಜನೆಗೆ ಚಾಲನೆ ನೀಡಲಾಯಿತು. ಈ ಸಂದರ್ಭ ರಾಜ್ಯದ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವ ಡಾ| ದೀಪಕ್‌ ಸಾವಂತ್‌ ಅವರೂ ಉಪಸ್ಥಿತರಿದ್ದರು. ಸದ್ಯಕ್ಕೆ ಮುಂಬಯಿ, ಪುಣೆ, ರಾಯಗಡ್‌, ರತ್ನಗಿರಿ, ಔರಂಗಾಬಾದ್‌, ಅಹ್ಮದ್‌ನಗರ, ಬೀಡ್‌, ನಂದೂರ್‌ಬಾರ್‌, ಕೊಲ್ಲಾಪುರ ಜಿಲ್ಲೆ ಯಲ್ಲಿ ಎಂಪಿಎ ಇಂಜೆಕ್ಷನ್‌ ಉಪಲಬ್ಧವಿದ್ದು, ಉಳಿದಿರುವ  ಜಿಲ್ಲೆಗಳಿಗೆ 8 ದಿನಗಳಲ್ಲಿ ಇಂಜೆಕ್ಷನ್‌ ಪೂರೈಸಲಾಗುವುದು ಎಂದು ಆರೋಗ್ಯ ಇಲಾಖೆ ಮೂಲಗಳು ತಿಳಿಸಿವೆ.

ಪ್ರಸ್ತುತ ರಾಜ್ಯಾದ್ಯಂತ 33,000 ಎಂಪಿಎ ಇಂಜೆಕ್ಷನ್‌ಗಳ ದಾಸ್ತಾನು ಇದೆ. ಮಹಿಳೆಯರು ಒಮ್ಮೆ ಎಂಪಿಎ ಇಂಜೆಕ್ಷನ್‌ ಬಳಸಿದರೆ, ಅದು ಮುಂದಿನ 3 ತಿಂಗಳವರೆಗೆ ಪರಿಣಾಮಕಾರಿಯಾಗಿರುತ್ತದೆ. ಇದು ಮಹಿಳೆಯರಿಗೆ ಗರ್ಭ ನಿರೋಧಕ ಔಷಧಗಳಿಂದ ಮುಕ್ತಿ ನೀಡಲಿದೆ. ಬಾಣಂತಿ ಮಹಿಳೆಯರಿಗೂ ಇದು ಮಹತ್ವವಾದುದೆಂದು ಪರಿಗಣಿಸಲಾಗುತ್ತದೆ. ವಿಶ್ವಾದ್ಯಂತ 130 ದೇಶಗಳಲ್ಲಿ ಇದರ ಬಳಕೆಯಾಗುತ್ತಿದೆ.