ಹೆದ್ದಾರಿಗಳ ಉದ್ದಕ್ಕೂ ಬಿದಿರಿನಿಂದ ತಯಾರಿಸಿದ ಬೇಲಿ : ನಿತಿನ್ ಗಡ್ಕರಿ

Team Udayavani, Jul 26, 2023, 7:26 PM IST

ಹೊಸದಿಲ್ಲಿ : ಎಕ್ಸ್‌ಪ್ರೆಸ್‌ವೇಗಳು ಮತ್ತು ರಾಷ್ಟ್ರೀಯ ಹೆದ್ದಾರಿಗಳ ಉದ್ದಕ್ಕೂ ಬಿದಿರು ನಿರ್ಮಿತ “‘Bahu Balli” ಬೇಲಿಗಳನ್ನು ಪರಿಚಯಿಸುವುದಾಗಿ ಮತ್ತು ಛತ್ತೀಸ್‌ಗಢದಲ್ಲಿ ಪ್ರಾಯೋಗಿಕ ಯೋಜನೆಯನ್ನು ಕೈಗೆತ್ತಿಕೊಳ್ಳಲಾಗುವುದು ಎಂದು ಕೇಂದ್ರ ಸರಕಾರ ಬುಧವಾರ ರಾಜ್ಯಸಭೆಗೆ ತಿಳಿಸಿದೆ.

ಬಿದಿರು ನಿರ್ಮಿತ ಬೇಲಿ ಕಬ್ಬಿಣದ ಬಳಕೆಗೆ ಪರ್ಯಾಯವಾಗಿ, ಪರಿಸರ ಸ್ನೇಹಿಯೂ ಆಗಲಿದೆ. ಈ ಕ್ರಮವು ಗ್ರಾಮೀಣ ಆರ್ಥಿಕತೆಗೆ ಉತ್ತೇಜನ ನೀಡಲು ಸಹಾಯ ಮಾಡುತ್ತದೆ ಮತ್ತು ಗ್ರಾಮಸ್ಥರು ಮತ್ತು ಬುಡಕಟ್ಟು ಜನರು ಇದರ ಪ್ರಯೋಜನ ಪಡೆಯುತ್ತಾರೆ ಎಂದು ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ ಸದನಕ್ಕೆ ಮಾಹಿತಿ ನೀಡಿದರು.

“ಈ ರೀತಿಯ ‘ಬಹು ಬಲ್ಲಿ’ ಫೆನ್ಸಿಂಗ್ ಅನ್ನು ಮೊದಲ ಬಾರಿಗೆ ಪ್ರಯೋಗಿಸಲಾಗುತ್ತಿದೆ ಮತ್ತು ಇದು ಪರಿಸರ ಸ್ನೇಹಿಯಾಗಿದೆ. ಎಲ್ಲಾ ಪರೀಕ್ಷೆಗಳು ನಡೆದಿದ್ದು, ಉಕ್ಕಿನ ಬದಲಾಗಿ ಬಿದಿರಿನ ಅಡ್ಡ ತಡೆಗಳನ್ನು ಅಭಿವೃದ್ಧಿಪಡಿಸಲಾಗುತ್ತಿದೆ. ಎಲ್ಲಾ ಅನುಮೋದನೆಗಳನ್ನು ಸ್ವೀಕರಿಸಲಾಗಿದೆ ಎಂದು ಗಡ್ಕರಿ ಪ್ರಶ್ನೋತ್ತರ ವೇಳೆಯಲ್ಲಿ ಸಂಸದರ ಪೂರಕ ಪ್ರಶ್ನೆಗಳಿಗೆ ಪ್ರತಿಕ್ರಿಯಿಸಿದ್ದಾರೆ.

“ನಾವು ಛತ್ತೀಸ್‌ಗಢದಲ್ಲಿ ಪ್ರಾಯೋಗಿಕ ಯೋಜನೆಯನ್ನು ಕೈಗೆತ್ತಿಕೊಳ್ಳಲು ನಿರ್ಧರಿಸಿದ್ದೇವೆ.ಅದು ಯಶಸ್ವಿಯಾದರೆ, ಉಕ್ಕಿನ ಬದಲಿಗೆ ಬಿದಿರಿನ ಅಡ್ಡ ತಡೆ ಪರಿಸರ ಸ್ನೇಹಿಯಾಗಲಿದ್ದು, ಆದಿವಾಸಿಗಳಿಗೆ ಬುಡಕಟ್ಟು ಪ್ರದೇಶಗಳಲ್ಲಿ ಕೆಲಸ ಸಿಗಲಿದೆ. ಈಶಾನ್ಯ ಭಾಗದಲ್ಲಿ ಬಿದಿರು ಹೇರಳವಾಗಿ ಲಭ್ಯವಿದೆ” ಎಂದು ಗಡ್ಕರಿ ಹೇಳಿದರು.

ಪ್ರಾಣಿಗಳು ಹೆದ್ದಾರಿಗೆ ಪ್ರವೇಶಿಸುವುದನ್ನು ತಪ್ಪಿಸಲು, ಈ ಬೇಲಿಗಳನ್ನು ಅಲ್ಲಿಯೂ ಬಳಸಲಾಗುವುದು.ರೈತರು ಬಂಜರು ಭೂಮಿಯಲ್ಲಿ ಬಿದಿರು ಬಿತ್ತುವುದರಿಂದ ಗ್ರಾಮೀಣ ಪ್ರದೇಶಗಳಿಗೆ ಇದರ ಲಾಭವಾಗಲಿದೆ ಎಂದರು.