ದಿಲ್ಲಿಯ ಕೆಂಪು ಕೋಟೆಯೊಳಗೆ ಗ್ರೆನೇಡ್‌ ಪತ್ತೆ, NSGಗೆ ಬುಲಾವ್‌

Team Udayavani, May 5, 2017, 12:00 PM IST

ಹೊಸದಿಲ್ಲಿ : ರಾಷ್ಟ್ರ ರಾಜಧಾನಿಯಲ್ಲಿನ ಐತಿಹಾಸಿಕ ಕೆಂಪು ಕೋಟೆ ಆವರಣದೊಳಗೆ ನಿಷ್ಕ್ರಿಯಗೊಳಿಸಲ್ಪಟ್ಟ ಗ್ರೆನೇಡ್‌ ಪತ್ತೆಯಾಗಿದ್ದು ಇದರಿಂದ ಸ್ಥಳೀಯ ನಿವಾಸಿಗಳು ಆತಂಕಿತರಾದರು ಎಂದು ಶುಕ್ರವಾರ ಪ್ರಕಟಗೊಂಡ ವರದಿಗಳು ತಿಳಿಸಿವೆ. 

ಎಎನ್‌ಐ ವರದಿಯ ಪ್ರಕಾರ ಗುರುವಾರ ಸಂಜೆ ಕೆಂಪು ಕೋಟೆ ಆವರಣದ ಒಳಗಿನ ಬಾವಿಯೊಳಗೆ ಗ್ರೆನೇಡ್‌ ಪತ್ತೆಯಾಗಿತ್ತು. ಇದನ್ನು ಅನುಸರಿಸಿ ಕೂಡಲೇ ಕಟ್ಟೆಚ್ಚರವನ್ನು ಘೋಷಿಸಲಾಯಿತು. 

ಸುದ್ದಿ ತಿಳಿದೊಡನೆಯೇ ರಾಷ್ಟ್ರೀಯ ಸೆಕ್ಯುರಿಟಿ ಗಾರ್ಡ್‌ (ಎನ್‌ಎಸ್‌ಜಿ) ಮತ್ತು ಜಿಲ್ಲಾ ಪೊಲೀಸ್‌ ಕಮಿಷನರ್‌ ಸ್ಥಳಕ್ಕೆ ಧಾವಿಸಿ ಬಂದರು. ಗ್ರೆನೇಡ್‌ ಪತ್ತೆಯಾದ ಪರಿಸರದಲ್ಲಿ ವ್ಯಾಪಕ ಶೋಧ ಕಾರ್ಯಾಚರಣೆ ಕೈಗೊಳ್ಳಲಾಯಿತು. 

ಪತ್ತೆಯಾದ ಗ್ರೆನೇಡನ್ನು ಅಧಿಕಾರಿಗಳು ಹೆಚ್ಚಿನ ಪರೀಕ್ಷೆಗಾಗಿ ಒಯ್ದರು. 

ಈ ವರ್ಷ ಫೆಬ್ರವರಿಯಲ್ಲಿ ಕೆಂಪು ಕೋಟೆಯ ಬಾವಿಯನ್ನು ನಿರ್ಮಲಗೊಳಿಸುವ ವೇಳೆ ಮದ್ದುಗುಂಡುಗಳು ಹಾಗೂ ಸ್ಫೋಟಕಗಳಿದ್ದ ಪೆಟ್ಟಿಗೆಯೊಂದು ಪತ್ತೆಯಾಗಿದ್ದವು. 

ಗುರುವಾರ ಸಂಜೆ ಬಾವಿಯೊಳಗೆ ಗ್ರೆನೇಡ್‌ ಪತ್ತೆಯಾದೊಡನೆಯೇ ಪೊಲೀಸರು ಇಡಿಯ ಪರಿಸರವನ್ನು ಸುತ್ತು ವರಿದು ಎನ್‌ಎಸ್‌ಜಿಗೆ ಮಾಹಿತಿ ನೀಡಿದರು ಎಂದು ಎಎನ್‌ಐ ವರದಿ ಮಾಡಿದೆ.