ಬಿಜೆಪಿ ಆಡಳಿತ ರಾಜ್ಯಗಳಲ್ಲಿ ವ್ಯಾಟ್‌ ಕಡಿತ?

Team Udayavani, Oct 6, 2017, 6:00 AM IST

ನವದೆಹಲಿ: ಪೆಟ್ರೋಲ್‌ ಮತ್ತು ಡೀಸೆಲ್‌ ಮೇಲಿನ ವ್ಯಾಟ್‌ ಕಡಿತಗೊಳಿಸಲು ಬಿಜೆಪಿ ಆಡಳಿತವಿರುವ ರಾಜ್ಯಗಳು ಚಿಂತನೆ ನಡೆಸಿವೆ.

ಮೂಲಗಳ ಪ್ರಕಾರ ಗುಜರಾತ್‌ ಇನ್ನೆರಡು ದಿನಗಳಲ್ಲಿ ಈ ಬಗ್ಗೆ ಅಧಿಕೃತವಾಗಿ ಘೋಷಣೆ ಹೊರಡಿಸಲಿದೆ. ಬಳಿಕ ಮಧ್ಯಪ್ರದೇಶ ಕೂಡ ಇದೇ ಚಿಂತನೆಯಲ್ಲಿದೆ. ಎರಡು ದಿನಗಳ ಹಿಂದಷ್ಟೇ ಕೇಂದ್ರ ಸರ್ಕಾರ ಪೆಟ್ರೋಲ್‌ ಮತ್ತು ಡೀಸೆಲ್‌ ಮೇಲೆ 2 ರೂ.ನಷ್ಟು ಅಬಕಾರಿ ಸುಂಕ ಇಳಿಸಿತ್ತು. ಇದರಿಂದ ತೈಲ ಬೆಲೆ 2.5 ರೂ. ವರೆಗೆ ಇಳಿಕೆಯಾಗಿತ್ತು. ಅಲ್ಲದೇ ಆ ಸಂದರ್ಭದಲ್ಲಿಯೇ ರಾಜ್ಯ ಸರ್ಕಾರಗಳೂ ಶೇ.5 ರಷ್ಟು ವ್ಯಾಟ್‌ ಕಡಿತ ಮಾಡಲಿ ಎಂದು ಕೇಂದ್ರ ಹಣಕಾಸು ಸಚಿವ ಅರುಣ್‌ ಜೇಟ್ಲಿ ಮತ್ತು ಪೆಟ್ರೋಲಿಯಂ ಸಚಿವ ಧರ್ಮೇಂದ್ರ ಪ್ರಧಾನ್‌ ಸೂಚಿಸಿದ್ದರು.

ಇದರನ್ವಯ ಬಿಜೆಪಿ ಆಡಳಿತವಿರುವ ರಾಜ್ಯಗಳೇ ಮೊದಲು ವ್ಯಾಟ್‌ ಕಡಿತಗೊಳಿಸಲಿವೆ. ಅದರಲ್ಲೂ ಸದ್ಯದಲ್ಲೇ ವಿಧಾನಸಭೆ ಚುನಾವಣೆ ನಡೆಯಲಿರುವ ಗುಜರಾತ್‌ನಲ್ಲೇ ಮೊದಲು ವ್ಯಾಟ್‌ ಕಡಿತವಾಗಲಿದೆ. ಇದರ ಬಳಿಕ ಇತರೆ ರಾಜ್ಯಗಳೂ ಕಡಿತ ಮಾಡಲಿವೆ ಎಂದು ಹೇಳಲಾಗುತ್ತಿದೆ. ಆದರೆ ಕೇರಳ ಮಾತ್ರ ವ್ಯಾಟ್‌ ಕಡಿತ ಮಾಡಲು ಸಾಧ್ಯವೇ ಇಲ್ಲ ಎಂದಿದೆ.

ಒಂದು ವೇಳೆ ಕಾಂಗ್ರೆಸ್‌ ಆಡಳಿತವಿರುವ ಕರ್ನಾಟಕದಲ್ಲಿ ಶೇ.5 ರಷ್ಟು ವ್ಯಾಟ್‌ ಕಡಿತ ಮಾಡಿದರೆ ಪೆಟ್ರೋಲ್‌ ದರ ಈಗಿನ 69.44 ರೂ. ನಿಂದ 66.77 ರೂ.ಗೆ ಬಂದು ನಿಲ್ಲಲಿದೆ. ಹಾಗೆಯೇ ಡಿಸೇಲ್‌ ದರ ಈಗಿನ 56.96 ರೂ.ನಿಂದ 54.57ಕ್ಕೆ ಇಳಿಕೆಯಾಗಲಿದೆ.