14 ಚರ್ಮದ ಕ್ರೀಮ್‌ ಗಳಿಗೆ ನಿಷೇಧ

Team Udayavani, Apr 9, 2018, 10:40 AM IST

ಹೊಸದಿಲ್ಲಿ: ಚರ್ಮಕ್ಕೆ ಲೇಪಿಸುವ 14 ರೀತಿಯ ಕ್ರೀಮ್‌ ಗಳನ್ನು ಕೇಂದ್ರ ಆರೋಗ್ಯ ಸಚಿವಾಲಯ ನಿಷೇಧಿಸಿದೆ. ಸ್ಟಿರಾಯ್ಡ್ ಮತ್ತು ಆ್ಯಂಟಿಬಯಾಟಿಕ್‌ಗಳನ್ನು ಬಳಸುವ ಚರ್ಮದ ಕ್ರೀಮ್‌ಗಳನ್ನು ಮಾತ್ರ ನಿಷೇಧಿಸಲಾಗಿದ್ದು, ಸದ್ಯ ಮಾರುಕಟ್ಟೆಯಲ್ಲಿರುವ ಜನಪ್ರಿಯ ಬ್ರಾಂಡ್‌ಗಳು ಮುಂದುವರಿಯಲಿವೆ. ಈ ಚರ್ಮದ ಕ್ರೀಮ್‌ಗಳಲ್ಲಿ ಯಾವುದೇ ಸ್ಟಿರಾಯ್ಡ್ ಆ್ಯಂಟಿಬಯಾಟಿಕ್‌ಗಳನ್ನು ಬಳಸುತ್ತಿಲ್ಲ ಎಂದು ಕಂಪನಿಗಳು ಹೇಳಿಕೊಂಡಿವೆ. ಅಲ್ಕೋಲೊ ಮೆಟಸೋನ್‌, ಬೆಕ್ಲೊಮೆಥಾಸೋನ್‌, ಡೆಸೊನೈಡ್‌, ಡೆಸೋಕ್ಸಿಮೆಟಸೋನ್‌ ಮತ್ತು ಫ್ಲೂಸಿನೋನೈಡ್‌ ಸೇರಿದಂತೆ ಒಟ್ಟು 14 ರಾಸಾಯನಿಕಗಳನ್ನು ಇನ್ನು ವೈದ್ಯರ ಶಿಫಾರಸು ರಹಿತವಾಗಿ ಮಾರಾಟ ಮಾಡುವ ಚರ್ಮದ ಕ್ರೀಮ್‌ಗಳಲ್ಲಿ ಬಳಸುವಂತಿಲ್ಲ. ಆದರೆ ಈ ಸ್ಟೆರಾಯ್ಡಗಳನ್ನು ಹೊಂದಿರುವ ಔಷಧಗಳನ್ನು ವೈದ್ಯರ ಶಿಫಾರಸು ಮೇರೆಗೆ ಪಡೆಯಬಹುದಾಗಿದೆ.

ರಾಜ್ಯಗಳಿಗೆ ಸೂಚನೆ: ಆಯುಷ್ಮಾನ್‌ ಭಾರತ ಜಾರಿಗೆ ಪೂರ್ವಭಾವಿಯಾಗಿ ವೈದ್ಯಕೀಯ ಸೇವೆ ಕಾಯ್ದೆಯನ್ನು ರಾಜ್ಯಗಳು ಅಳವಡಿಸಿಕೊಳ್ಳಬೇಕು ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ಸೂಚಿಸಿದೆ.