ತಮಿಳುನಾಡು: ವರುಣನ ವರಾತ, ಮುಂದುವರಿಯಲಿದೆ ಮಳೆಯ ಅಬ್ಬರ

Team Udayavani, Nov 5, 2017, 6:00 AM IST

ಚೆನ್ನೈ: ತಮಿಳುನಾಡಿನಲ್ಲಿ ವರುಣನ ಅಬ್ಬರ ಇನ್ನೂ ಮುಂದುವರಿ ದಿದ್ದು, 2015ರ ಕಹಿ ನೆನಪು ಮರುಕಳಿಸುವ ಆತಂಕ ಎದುರಾಗಿದೆ.

ಕಳೆದ ವಾರದಿಂದ ಸುರಿಯುತ್ತಿರುವ ಈ ಮಳೆಯಿಂದಾಗಿ ಇದುವರೆಗೆ 12 ಮಂದಿ ಪ್ರಾಣ ಕಳೆದುಕೊಂಡಿದ್ದು, 10 ಸಾವಿರಕ್ಕೂ ಹೆಚ್ಚು ಮಂದಿ ನಿರ್ವಸತಿಗರಾಗಿದ್ದಾರೆ ಎಂದು ತಮಿಳುನಾಡು ಸರಕಾರ ತಿಳಿಸಿದೆ.

ಭಾರೀ ಮಳೆ ಸೋಮವಾರದ ವರೆಗೂ ಮುಂದುವರಿಯುವ ಸಾಧ್ಯತೆ ಇದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ. ಅ. 31ರಿಂದ ಚೆನ್ನೈನಲ್ಲಿನ ಎಲ್ಲಾ ಶಾಲಾ ಕಾಲೇಜುಗಳು ಮುಚ್ಚಿದ್ದು, ಶನಿವಾರವೂ ಬಾಗಿಲು ತೆರೆಯಲಿಲ್ಲ.

ಹಲವಾರು ವಿ.ವಿ.ಗಳಲ್ಲಿ ನಡೆಯ ಬೇಕಿದ್ದ ಪರೀಕ್ಷೆಗಳನ್ನು ಮುಂದೂಡಲಾಗಿದೆ. ಈ ಮಧ್ಯೆ ದಕ್ಷಿಣ ಚೆನ್ನೈನ ತಾಂಬಾರಂನ ಆಸ್ಪತ್ರೆಯೊಂದರಲ್ಲಿ ರಾತ್ರೋರಾತ್ರಿ ಗರ್ಭಿಣಿಯರು, ಬಾಣಂತಿಯರು ಹಾಗೂ ನವಜಾತ ಶಿಶುಗಳನ್ನು ಬೇರೆಡೆಗೆ ವರ್ಗಾ ಯಿಸಲಾಗಿದ್ದು, ವರುಣನ ಆರ್ಭಟಕ್ಕೆ ಇಡೀ ರಾಜ್ಯ ಬೆಚ್ಚಿಬಿದ್ದಿದೆ.

ಸರಕಾರಿ ಆಸ್ಪತ್ರೆಯ ನೆಲಮಹಡಿಗೆ ಶುಕ್ರವಾರ ರಾತ್ರಿ ನೀರು ನುಗ್ಗಿದ ಹಿನ್ನೆಲೆಯಲ್ಲಿ, ಅಲ್ಲಿದ್ದ ಸುಮಾರು 60 ಮಂದಿ ಗರ್ಭಿಣಿಯರು, ಬಾಣಂತಿ ಯರು ಮತ್ತು ಶಿಶುಗಳನ್ನು ಮಧ್ಯರಾತ್ರಿ ಎಬ್ಬಿಸಿ, ಮೊದಲ ಮಹಡಿಗೆ ಸ್ಥಳಾಂತರಿಸಲಾಗಿದೆ. 2015ರ ಪ್ರವಾಹದಲ್ಲಿ ಇದೇ ಆಸ್ಪತ್ರೆಯೊಳಗೆ 5 ಅಡಿ ಎತ್ತರದಲ್ಲಿ ನೀರು ತುಂಬಿತ್ತು. ಅನಂತರ, ದೋಣಿಗಳ ಮೂಲಕ ರೋಗಿಗಳನ್ನು ಹೊರಗೆ ಕರೆತರಲಾಗಿತ್ತು. 

ಶೇ.93ರಷ್ಟು ಹೆಚ್ಚು: ತಮಿಳುನಾಡಿನಲ್ಲಿ ಅ.1ರಿಂದ ನ.4ರ ವರೆಗಿನ ಅವಧಿಯಲ್ಲಿ ವಾಡಿಕೆಗಿಂತ ಶೇ.93ರಷ್ಟು ಹೆಚ್ಚು ಮಳೆ ಬಿದ್ದಿದೆ. ಜತೆಗೆ, ಬಂಗಾಲ ಕೊಲ್ಲಿಯಲ್ಲಿ ವಾಯು ಭಾರ ಕುಸಿತ ಮತ್ತು ಸುಳಿಗಾಳಿ ಎದ್ದಿದ್ದು, ರಾಜ್ಯದಲ್ಲಿ ಮಳೆಯ ಅಬ್ಬರ ಇನ್ನಷ್ಟು ಹೆಚ್ಚಲಿದೆ. ಅ.31ರಿಂದ ಈವರೆಗೆ ಮಳೆ ಸಂಬಂಧಿ ಘಟನೆಗಳಿಂದ ಒಟ್ಟು 12 ಮಂದಿ ಮೃತಪಟ್ಟಿದ್ದಾರೆ.
10 ಸಾವಿರ ನಿರಾಶ್ರಿತರು: ಚೆನ್ನೈ ಸಹಿತ ತಮಿಳುನಾಡಿನ ಹಲವಾರು ಭಾಗಗಳಲ್ಲಿ ಪ್ರವಾಹ ಪರಿಸ್ಥಿತಿ ಉಂಟಾಗಿದ್ದು, 10 ಸಾವಿರ ಮಂದಿ ನಿರಾಶ್ರಿ ತರಾಗಿದ್ದಾರೆ. 115 ನಿರಾಶ್ರಿತ ಶಿಬಿರಗಳನ್ನು ವ್ಯವಸ್ಥೆ ಮಾಡಲಾಗಿದೆ.

ಎಲ್ಲೆಲ್ಲಿ ಮಳೆ?: ಚೆನ್ನೈ, ಪುದುಚೇರಿ, ಕರೈಕಲ್‌, ಅರಿಯಲೂರು, ಕಡಲೂರು, ಕಾಂಚೀಪುರಂ, ನಾಗಪಟ್ಟಣಂ, ಪೆರಂಬಲೂರು, ಪುದುಕೊಟ್ಟೈ, ರಾಮನಾಥಪುರಂ, ಶಿವಗಂಗಾ, ತಂಜಾವೂರು, ತಿರುವೆಲ್ಲೂರು, ತೂತುಕೂಡಿ, ತಿರುಚಿನಾಪಳ್ಳಿ, ತಿರುವಣ್ಣಮಲೈ, ವೆಲ್ಲೂರು, ವೆಲ್ಲುಪುರಂ, ವಿರುಧುನಗರಗಳಲ್ಲಿ ಮಳೆಯಾಗುವ ಸಾಧ್ಯತೆ ಇದೆ.

2015ರ ಕರಾಳ ನೆನಪು
ಎರಡು ವರ್ಷಗಳ ಹಿಂದಷ್ಟೇ ತಮಿಳುನಾಡಿನಲ್ಲಿ ಹಿಂಗಾರು ಮಳೆ ಅಬ್ಬರಿಸಿದ್ದು, ಸುಮಾರು 500 ಮಂದಿ ಸಾವನ್ನಪ್ಪಿದ್ದರು. ಕುಂಭದ್ರೋಣ ಮಳೆಯಿಂದಾಗಿ ಇಡೀ ನಗರ ನೀರಿನಲ್ಲಿ ಮುಚ್ಚಿಹೋಗಿತ್ತಲ್ಲದೇ ನಗರವನ್ನು ಮತ್ತೆ ಸಹಜ ಸ್ಥಿತಿಗೆ ತರಲು ತಿಂಗಳುಗಳೇ ಬೇಕಾಗಿದ್ದವು.