Goa ಭಾರೀ ಮಳೆ; ಕಾರುಗಳ ಮೇಲೆ ಬಿದ್ದ ಬೃಹತ್ ಮರ; ತಪ್ಪಿದ ಭಾರೀ ಅನಾಹುತ

Team Udayavani, Oct 2, 2023, 4:34 PM IST

ಪಣಜಿ: ಗೋವಾ ರಾಜ್ಯದಲ್ಲಿ ಭಾರೀ ಮಳೆಯಾಗುತ್ತಿದ್ದು, ಹಲವು ಕಡೆ ಭೂಕುಸಿತ ಉಂಟಾಗಿದೆ.

ಶಿವೋಲಿಯ ಕ್ಷೇತ್ರಪಾಲ ಮಂದಿರದ ಬಳಿ ಭಾನುವಾರ ದೊಡ್ಡ ಮಾವಿನ ಮರವೊಂದು ನಾಲ್ಕಾರು ವಾಹನಗಳ ಮೇಲೆ ಬಿದ್ದಿದೆ. ಎರ್ಟಿಗಾ ಕಾರು ರಸ್ತೆಯ ಬದಿಯಲ್ಲಿದ್ದ ಬೃಹತ್ ಮಾವಿನ ಮರವೊಂದು ಬಿದ್ದು ಭಾರಿ ಹಾನಿಯಾಗಿದೆ. ಜತೆಗೆ ಮರದ ಬಳಿಯಿದ್ದ ಮೂರು ವಿದ್ಯುತ್ ಕಂಬಗಳು ನೆಲಕ್ಕುರುಳಿರುವುದರಿಂದ ಈ ಭಾಗದಲ್ಲಿ ವಿದ್ಯುತ್ ಸರಬರಾಜು ಸ್ಥಗಿತಗೊಂಡಿದೆ.

ಈ ಕಾರಿನಲ್ಲಿ ಕೆಲವು ಪ್ರವಾಸಿಗರು ಪ್ರಯಾಣಿಸುತ್ತಿದ್ದರು. ಗೋವಾಕ್ಕೆ ಭೇಟಿ ನೀಡಿ ದೆಹಲಿಗೆ ವಾಪಸಾಗುತ್ತಿದ್ದಾಗ ಈ ಘಟನೆ ನಡೆದಿದೆ.

ಎರ್ಟಿಗಾದಲ್ಲಿ ಲಕ್ಷವೀರ್ ಸಿಂಗ್ (40 )  ಪತ್ನಿ ಪ್ರಿಯಾ ಸಿಂಗ್ (36 ), ಮಗಳು ಮೀರಾ ಸಿಂಗ್ (5 ), ಸಹೋದರಿ ರಿತು ಧೈಯಾ ( 34), ಸಮೈರಾ. ಧೈಯಾ (4 ತಿಂಗಳು) ರವರು ಪ್ರಯಾಣಿಸುತ್ತಿದ್ದರು.

ಈ ಘಟನೆಯಲ್ಲಿ ವಾಹನಕ್ಕೆ ಹೆಚ್ಚಿನ ಹಾನಿಯಾಗಿದ್ದು, ಅದೃಷ್ಟವಶಾತ್ ಯಾವುದೇ ಪ್ರವಾಸಿಗರಿಗೆ ಗಾಯಗಳಾಗಿಲ್ಲ ಎಂದು ಪ್ರಾಥಮಿಕ ಮಾಹಿತಿ ಲಭ್ಯವಾಗಿದೆ. ಸ್ಥಳಕ್ಕೆ ಅಗ್ನಿಶಾಮಕ ದಳದ ಸಿಬ್ಬಂದಿ ಆಗಮಿಸಿದ್ದು, ಮರ ಕಡಿದು ರಸ್ತೆ ತೆರವುಗೊಳಿಸುವ ಕಾರ್ಯ ಕೈಗೊಂಡಿದ್ದಾರೆ.

ವಿದ್ಯುತ್ ತಂತಿಗಳ ಮೇಲೆ ಮರ ಬಿದ್ದಿದ್ದು, ವಿದ್ಯುತ್ ತಂತಿಗಳು ತುಂಡಾಗಿ ಶಿವೋಲಿಯ ಫಾರ್ಚೂನ್ ಕಾಸಾ ಕಟ್ಟಡ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ವಿದ್ಯುತ್ ಸಂಪರ್ಕ ಕಡಿತಗೊಂಡಿದೆ.