ಮುಸ್ಕಾನ್‌ ಹೆಸರಲ್ಲಿ ನೂರಾರು ನಕಲಿ ಖಾತೆ!

Team Udayavani, Feb 18, 2022, 6:58 AM IST

ನವದೆಹಲಿ: ಕರ್ನಾಟಕದಲ್ಲಿ ಹೊತ್ತಿ ಉರಿಯುತ್ತಿರುವ ಹಿಜಾಬ್‌ ಪ್ರತಿಭಟನೆಗಳ ದಳ್ಳುರಿಗೆ ನೆರೆರಾಷ್ಟ್ರ ಪಾಕಿಸ್ತಾನ ತುಪ್ಪ ಸುರಿಯುತ್ತಿದೆ ಎಂಬ ಆತಂಕಕಾರಿ ಮಾಹಿತಿಯೊಂದನ್ನು ಗುಪ್ತಚರ ಇಲಾಖೆ ಹೊರಹಾಕಿದೆ.

ಹಿಜಾಬ್‌ ವಿವಾದ ಆರಂಭವಾದ ಹೊಸತರಲ್ಲಿ ಮಂಡ್ಯದ ಕಾಲೇಜೊಂದರಲ್ಲಿ “ಅಲ್ಲಾಹು ಅಕºರ್‌’ ಎಂದು ಘೋಷಣೆ ಕೂಗುವ ಮೂಲಕ ರಾಷ್ಟ್ರವ್ಯಾಪಿ ಸುದ್ದಿಯಾದ ಮುಸ್ಕಾನ್‌ ಖಾನ್‌ ಎಂಬ ವಿದ್ಯಾರ್ಥಿನಿಯ ಹೆಸರಿನಲ್ಲಿ ನೂರಾರು ನಕಲಿ ಟ್ವಿಟರ್‌ ಖಾತೆಗಳನ್ನು ಪಾಕಿಸ್ತಾನದಲ್ಲಿ ಸೃಷ್ಟಿಸಲಾಗಿದೆ. ಆ ಖಾತೆಗಳ ಮೂಲಕ ಸಮುದಾಯಗಳನ್ನು ಒಡೆಯುವ ದ್ವೇಷದ ಸಂದೇಶಗಳನ್ನು ಪಸರಿಸಲಾಗುತ್ತಿದೆ ಎಂದು ಇಲಾಖೆ ತಿಳಿಸಿದೆ.

ಆಗ ಪಾಕಿಸ್ತಾನದಲ್ಲಿ, ಈಗ ಕರ್ನಾಟಕದಲ್ಲಿ! :

ಇಂಥದ್ದೊಂದು ನಕಲಿ ಟ್ವಿಟರ್‌ ಖಾತೆಯ ಜಾಡು ಪತ್ತೆ ಹಚ್ಚಿದಾಗ ಅದು ಕೆಲ ದಿನಗಳ ಹಿಂದೆ ಪಾಕಿಸ್ತಾನದಿಂದ ಕಾರ್ಯನಿರ್ವಹಿಸುತ್ತಿದ್ದು, ಇತ್ತೀಚೆಗೆ ಅದು ಕರ್ನಾಟಕದಿಂದಲೇ ಕಾರ್ಯ ನಿರ್ವಹಿಸುತ್ತಿರುವುದು ತಿಳಿದುಬಂದಿದೆ. ಅಲ್ಲದೆ, ಈ ಖಾತೆ ಸೃಷ್ಟಿಯಾದ ಕೆಲವೇ ದಿನಗಳಲ್ಲಿ ಇದಕ್ಕೆ 5 ಸಾವಿರ ಫಾಲೋವರ್‌ಗಳು ಸೇರ್ಪಡೆಗೊಂಡಿದ್ದಾರೆ ಎಂದು ಹೇಳಲಾಗಿದೆ.

ಟ್ವೀಟ್‌ಗಳು ಡಿಲೀಟ್‌ :

ಮಸ್ಕಾನ್‌ ಹೆಸರಿನಲ್ಲಿರುವ ಮತ್ತೂಂದು ಟ್ವಿಟರ್‌ನ ನಕಲಿ ಖಾತೆಯಲ್ಲಿ, ಈ ಖಾತೆಯನ್ನು 2017ರ ಡಿಸೆಂಬರ್‌ನಿಂದಲೇ ಆರಂಭಿಸಲಾಗಿದೆ ಎಂದು ನಮೂದಿಸಲಾಗಿದೆ. ಈ ಖಾತೆಗೆ 37,000 ಫಾಲೋವರ್‌ಗಳು ಇದ್ದಾರೆ. ಕರ್ನಾಟಕದಲ್ಲಿ ಹಿಜಾಬ್‌ ವಿವಾದ ಭುಗಿಲೇಳುತ್ತಲೇ ಅದರಲ್ಲಿದ್ದ ಎಲ್ಲಾ ಟ್ವೀಟ್‌ಗಳನ್ನು ಡಿಲೀಟ್‌ ಮಾಡಲಾಗಿದೆ. ಇದು ಅನುಮಾನಗಳನ್ನು ಸೃಷ್ಟಿಸಿದೆ.