6 ದಿನ ಪೊಲೀಸರ ವಶಕ್ಕೆ ಹನಿಪ್ರೀತ್‌

Team Udayavani, Oct 5, 2017, 6:15 AM IST

ನವದೆಹಲಿ: ಮಂಗಳವಾರವಷ್ಟೇ ಪೊಲೀಸರಿಗೆ ಸೆರೆಸಿಕ್ಕ ಗುರ್ಮೀತ್‌ ಸಿಂಗ್‌ ದತ್ತುಪುತ್ರಿ ಹನಿಪ್ರೀತ್‌ ಇನ್ಸಾನ್‌ ಮತ್ತು ಆಕೆಯ ಸಹಾಯಕಿ ಜಗದೀಪ್‌ ಕೌರ್‌ರನ್ನು 6 ದಿನಗಳ ಕಾಲ ಪೊಲೀಸ್‌ ವಶಕ್ಕೆ ಒಪ್ಪಿಸಿ ಪಂಚಕುಲದ ನ್ಯಾಯಾಲಯ ಬುಧವಾರ ಆದೇಶ ಹೊರಡಿಸಿದೆ. 

ಪಂಚಕುಲದಲ್ಲಿ ಹಿಂಸೆಗೆ ಪ್ರಚೋದನೆ ನೀಡಿದ ಮತ್ತು ದೇಶದ್ರೋಹದ ಆರೋಪ ಹೊತ್ತಿರುವ ಹನಿಪ್ರೀತ್‌ಳನ್ನು ಪೊಲೀಸರು ಬುಧವಾರ ಪಂಚ ಕುಲ ಕೋರ್ಟ್‌ ಮುಂದೆ ಹಾಜರುಪಡಿಸಿದರು. ಈ ನಡುವೆ ಹನಿಪ್ರೀತ್‌ ತಾನು ಎದೆ ನೋವಿನಿಂದ ಬಳಲುತ್ತಿರುವುದಾಗಿ ಹೇಳಿದ ಕಾರಣ ಅವರನ್ನು ಆಸ್ಪತ್ರೆಗೆ ಕರೆದೊಯ್ಯಲಾಗಿತ್ತು. ತಪಾಸಣೆ ನಡೆಸಿದ ವೈದ್ಯರು ಆಕೆಗೆ ಯಾವ ತೊಂದರೆಯೂ ಇಲ್ಲ ಎಂದರು. ಇನ್ನೊಂದೆಡೆ, ಗುರ್ಮೀತ್‌ಗೆ ಜೀವಾವಧಿ ಶಿಕ್ಷೆ ವಿಧಿಸುವಂತೆ ಕೋರಿ ಅತ್ಯಾಚಾರ ಸಂತ್ರಸ್ತೆಯರಿಬ್ಬರು ಬುಧವಾರ ಪಂಜಾಬ್‌ ಮತ್ತು ಹರ್ಯಾಣ ಹೈಕೋರ್ಟ್‌ಗೆ ಅರ್ಜಿ ಸಲ್ಲಿಸಿದ್ದಾರೆ.