ಬಿಹಾರ: ಹೆಮ್ಮಕ್ಕಳ ಮೇಲೆ ಲೈಂಗಿಕ ದೌರ್ಜನ್ಯ: ಸುಪ್ರೀಂ ಕೆಂಡಾಮಂಡಲ

Team Udayavani, Oct 8, 2018, 3:44 PM IST

ಹೊಸದಿಲ್ಲಿ : ಬಿಹಾರದ ಮುಜಫ‌ರನಗದ ಆಸರೆ ಗೃಹಗಳಲ್ಲಿ ಮತ್ತು ಸುಪೋಲ್‌ ಶಾಲಾ ಹೆಣ್ಣು ಮಕ್ಕಳ ಮೇಲೆ ಈ ರೀತಿಯ ಲೈಂಗಿಕ ದೌರ್ಜನ್ಯ ನಡೆಯಲು ಹೇಗೆ ಸಾಧ್ಯ ಎಂದು ಇಂದು ಸೋಮವಾರ ಕೆಂಡಾಮಂಡಲವಾಗಿ ಪ್ರಶ್ನಿಸಿರುವ ಸುಪ್ರೀಂ ಕೋರ್ಟ್‌, ಬಿಹಾರದಲ್ಲಿ ಹೆಮ್ಮಕ್ಕಳ ಮೇಲೆ ನಡೆಯುತ್ತಿರುವ ಲೈಂಗಿಕ ದೌರ್ಜನ್ಯದ ಬಗ್ಗೆ ತೀವ್ರ ಆಘಾತ, ಕಳವಳ ವ್ಯಕ್ತಪಡಿಸಿದೆ. 

“ಪ್ರತಿಕೆಗಳಲ್ಲಿ ಪ್ರಕಟಗೊಂಡಿರುವ ಈ ಕುರಿತ ವರದಿಗಳು ನಿಜಕ್ಕೂ ಒಳ್ಳೆಯದಲ್ಲ. ಶಾಲಾ ಹುಡುಗಿಯರ ಅಸ್ಥಿಪಂಜರ ಪತ್ತೆಯಾಗಿರುವುದು, ಲೈಂಗಿಕ ದೌರ್ಜನ್ಯಕ್ಕೆ ಗುರಿಯಾಗುವುದನ್ನು ತಪ್ಪಿಸಿಕೊಳ್ಳಲು ಯತ್ನಿಸಿದ  34 ಹೆಮ್ಮಕ್ಕಳನ್ನು ಹೊಡೆದು ಹಲ್ಲೆ ಮಾಡಿರುವುದು, ಇಂಥವೆಲ್ಲ ದಿನ ನಿತ್ಯ ಎಂಬಂತೆ ಏಕೆ ಸಂಭವಿಸುತ್ತಿವೆ; ಹೆಮ್ಮಕ್ಕಳನ್ನು ನೋಡಿ ಕೊಳ್ಳುವ ರೀತಿಯ ಇದೇ ಏನು ? ಎಂದು ಸುಪ್ರೀಂ ಕೋರ್ಟ್‌ ಪ್ರಶ್ನಿಸಿದೆ. 

ಸುಪೋಲ್‌ ಘಟನೆ ಸಂಬಂಧ ಪೊಲೀಸರು ಈ ವರೆಗೆ ಓರ್ವ ಅಪ್ರಾಪ್ತ ವಯಸ್ಸಿನ ಬಾಲಕ ಮತ್ತು ಓರ್ವ ಮಹಿಳೆ ಸೇರಿದಂತೆ ಒಟ್ಟು 9 ಮಂದಿಯನ್ನು ಬಂಧಿಸಿದ್ದಾರೆ. 

ಮುಜಫ‌ರನಗರದ ಆಸರೆ ಗೃಹಗಳಲ್ಲಿ ಸುಮಾರು 40 ಬಾಲಕಿಯರ ಮೇಲೆ ಅತ್ಯಾಚಾರ,ಲೈಂಗಿಕ ದೌರ್ಜನ್ಯ ನಡೆದಿತ್ತು. ಆ ಪೈಕಿ ಒಬ್ಟಾಕೆಯನ್ನು ಕೊಲ್ಲಲಾಗಿದ್ದು ಅನಂತರ ಆಕೆಯ ಕೊಲೆಯನ್ನು ಮುಚ್ಚಿ ಹಾಕಲು ಆಕೆಯ ಮೃತ ದೇಹವನ್ನು ಹುಗಿದು ಹಾಕಲಾಗಿತ್ತು.