ನಾನು ವೈರಸ್ ಜೊತೆ ಬಂದಿದ್ದೇನೆ ನನ್ನನ್ನು ಸ್ವೀಕರಿಸಿ ; ಇಲ್ಲಿ ಸಿಗುತ್ತಿದೆ ವೈರಸ್ ನೋಟುಗಳು!

Team Udayavani, Apr 12, 2020, 9:01 PM IST

ಪಟ್ನಾ: ಕೋವಿಡ್ 19 ವೈರಸ್ ಸಂಬಂಧಿತ ದೇಶಾದ್ಯಂತ ವಿಧಿಸಲಾಗಿರುವ ಲಾಕ್ ಡೌನ್ ಪರಿಸ್ಥಿತಿ ಹಲವಾರು ವಿಚಿತ್ರ ಸನ್ನಿವೇಶಗಳಿಗೂ ಕಾರಣವಾಗುತ್ತಿದೆ. ಇದರಲ್ಲಿ ಒಂದು ಘಟನೆ ದೂರದ ಬಿಹಾರ ರಾಜ್ಯದಲ್ಲಿರುವ ಪುಟ್ಟ ಪಟ್ಟಣ ಒಂದರಲ್ಲಿ ನಡೆಯುತ್ತಿರುವುದಾಗಿ ಹಿಂದೂಸ್ಥಾನ್ ಟೈಮ್ಸ್ ವರದಿ ಮಾಡಿದೆ.

ಬಿಹಾರದ ಸಹರ್ಸಾ ಎಂಬ ಸಣ್ಣ ಪಟ್ಟಣದಲ್ಲಿ ಇದೀಗ ಮನೆ ಬಾಗಿಲ ಮುಂದೆ ಕರೆನ್ಸಿ ನೋಟುಗಳು ಸಿಗುತ್ತಿವೆ. ಆದರೆ ಧರ್ಮಕ್ಕೆ ಸಿಕ್ಕಿತೆಂದು ಈ ನೋಟುಗಳನ್ನು ಎತ್ತಿಕೊಳ್ಳಲೆಂದು ಹೋದರೆ ಆ ನೋಟುಗಳ ಜೊತೆ ಒಂದು ಚೀಟಿಯೂ ಇರುತ್ತದೆ. ಮತ್ತು ಆ ಚೀಟಿಯಲ್ಲಿ, ‘ನಾನು ಕೋವಿಡ್ ವೈರಸ್ ಜೊತೆಗೆ ಬಂದಿದ್ದೇನೆ, ನನ್ನನ್ನು ಸ್ವೀಕರಿಸಿ, ಇಲ್ಲದೇ ಇದ್ದಲ್ಲಿ ನಾನು ನಿಮ್ಮನ್ನೆಲ್ಲಾ ಹಿಂಸಿಸುತ್ತೇನೆ’ ಎಂಬ ಬರಹವಿರುತ್ತದೆ.

ಈ ಘಟನೆ ಕಳೆದ ಶುಕ್ರವಾರದಿಂದ ನಡೆಯುತ್ತಿದೆ ಎಂದು ತಿಳಿದುಬಂದಿದ್ದು ಈ ರೀತಿಯಾಗಿ ನೋಟುಗಳ ಜೊತೆಯಲ್ಲಿರುವ ಚೀಟಿಯಲ್ಲಿನ ಕೈಬರಹ ಒಂದೇ ರೀತಿಯಾಗಿದೆ. ಹಾಗಾಗಿ ಈ ಕೃತ್ಯ ಒಬ್ಬನೇ ವ್ಯಕ್ತಿ ಎಸಗುತ್ತಿರಬಹುದೆಂಬ ಸಂಶಯವನ್ನು ಸ್ಥಳೀಯ ಪೊಲೀಸರು ವ್ಯಕ್ತಪಡಿಸಿದ್ದಾರೆ.