ಯುಪಿಎಸ್‌ಸಿ ವೆಬ್‌ ಸೈಟ್‌ ಹ್ಯಾಕ್‌; ಡೊರೇಮಾನ್‌ ಚಿತ್ರ, ಸಂಗೀತ

Team Udayavani, Sep 11, 2018, 11:17 AM IST

ಹೊಸದಿಲ್ಲಿ : ಲೋಕಸೇವಾ ಆಯೋಗ (ಯುಪಿಎಸ್‌ಸಿ) ವೆಬ್‌ ಸೈಟನ್ನು ನಿನ್ನೆ ಸೋಮವಾರ ರಾತ್ರಿ ಹ್ಯಾಕ್‌ ಮಾಡಲಾಗಿದೆ.

ಹ್ಯಾಕರ್‌ಗಳು ಯುಪಿಎಸ್‌ಸಿ ವೆಬ್‌ ಸೈಟ್‌ ಮುಖಪುಟದಲ್ಲಿ ಜನಪ್ರಿಯ ಜಪಾನೀ ಕಾರ್‌ಟೂನ್‌ ಪಾತ್ರ ಡೊರೇಮಾನ್‌ ಚಿತ್ರವನ್ನು ಹಾಕಿದ್ದಾರೆ.

ಡೊರೇಮಾನ್‌ನ ಚಿತ್ರದೊಂದಿಗೆ ಎರಡು ಸಾಲುಗಳ ಬರಹವನ್ನೂ ಹಾಕಲಾಗಿದೆ : ಡೊರೇಮಾನ್‌ ಪಿಕಪ್‌ ದಿ ಕಾಲ್‌ ಎಂಬ ಬರಹ ಮೇಲಿನ ಸಾಲಿನಲ್ಲಿ ಮತ್ತು “ಐ ಆ್ಯಮ್‌ ಸ್ಟುಪಿಡ್‌’ ಎಂಬ ಬರಹ ಕೆಳಗಿನ ಸಾಲಿನಲ್ಲಿ ಕಂಡು ಬಂದಿದೆ.

ಮಾತ್ರವಲ್ಲದೆ ಹಿಂದಿಯಲ್ಲಿರುವ ಡೊರೇಮಾನ್‌ ಟೈಟಲ್‌ ಸಾಂಗ್‌ ಹಿನ್ನೆಲೆಯಲ್ಲಿ ಪ್ಲೇ ಆಗುವಂತೆ ಮಾಡಲಾಗಿದೆ.

ಹ್ಯಾಕ್‌ ಆದ ಯುಪಿಎಸ್‌ಸಿ ವೆಬ್‌ ಸೈಟಿನ ಕೆಲವು ಬಳಕೆದಾರರು ಸ್ಕ್ರೀನ್‌ ಶಾಟ್‌ ತೆಗೆದು ಟ್ವಿಟರ್‌ನಲ್ಲಿ ನಿನ್ನೆ ಮಧ್ಯರಾತ್ರಿಯ ಹೊತ್ತಿಗೆ ಅಪ್‌ ಲೋಡ್‌ ಮಾಡಿದ್ದಾರೆ.

ಇಷ್ಟೆಲ್ಲ ಆದ ಬಳಿಕ ಇಂದು ಬೆಳಗ್ಗೆ ಯುಪಿಎಸ್‌ಸಿ ವೆಬ್‌ ಸೈಟನ್ನು ಪುನರ್‌ ಸ್ಥಾಪಿಸಲಾಗಿದೆ. ಆದರೆ ಅನಂತರದಲ್ಲಿ ವೆಬ್‌ ಸೈಟ್‌ “ನಿರ್ವಹಣೆ’ಯಲ್ಲಿದೆ ಎಂಬ ಬರಹದೊಂದಿಗೆ ಕಾಣಿಸಿಕೊಂಡಿದೆ.

ಈ ಹ್ಯಾಕಿಂಗ್‌ ಘಟನೆ ಬಗ್ಗೆ ಯುಪಿಎಸ್‌ಸಿ ಇನ್ನಷ್ಟೇ ತನ್ನ ಪ್ರತಿಕ್ರಿಯೆ ನೀಡಬೇಕಿದೆ.

ಅಂದ ಹಾಗೆ ಸರಕಾರಿ ವೆಬ್‌ ಸೈಟ್‌ ಹ್ಯಾಕ್‌ ಆಗಿರುವುದು ಇದೇ ಮೊದಲ ಸಲವೇನೂ ಅಲ್ಲ. ಈ ವರ್ಷ ಎಪ್ರಿಲ್‌ ನಲ್ಲಿ ಸುಪ್ರೀಂ ಕೋರ್ಟ್‌ ವೆಬ್‌ ಸೈಟ್‌ ಬ್ರಝಿಲ್‌ ಹ್ಯಾಕರ್‌ ತಂಡದಿಂದ ಹ್ಯಾಕ್‌ ಆಗಿತ್ತು.

ಕಳೆದ ವರ್ಷ ಪಾಕ್‌ ಪರ ಹ್ಯಾಕರ್‌ ಗಳು ನಾಲ್ಕು ಉನ್ನತ ಇಂಡಿಯನ್‌ ಇನ್‌ಸ್ಟಿಟ್ಯೂಟಗಳ ವೆಬ್‌ ಸೈಟ್‌ ಗಳನ್ನು ಹ್ಯಾಕ್‌ ಮಾಡಿದ್ದರು.