ನಿವೃತ್ತಿ ಅಂಚಿನಲ್ಲಿ ಮಿಗ್‌-21 ಯದ್ಧ ವಿಮಾನ; ವಿಂಗ್‌ ಕಮಾಂಡರ್‌ ಅಭಿನಂದನ್‌ ಬಳಸಿದ್ದ ವಿಮಾನ

Team Udayavani, Sep 20, 2022, 7:15 AM IST

ನವದೆಹಲಿ: ಭಾರತೀಯ ವಾಯುಪಡೆಯ ಶಸ್ತ್ರಾಗಾರದಲ್ಲಿ ಉಳಿದಿರುವ ಮಿಗ್‌-21 ಯದ್ಧ ವಿಮಾನಗಳ ಪೈಕಿ ಒಂದು ವಿಮಾನವು ಸೆ.30ರಂದು ಬಳಕೆಯಿಂದ ನಿವೃತ್ತಿಯಾಗುತ್ತಿದೆ.

2019ರ ಫೆಬ್ರವರಿಯಲ್ಲಿ ಗಡಿನಿಯಂತ್ರಣ ರೇಖೆಯಲ್ಲಿ ಪಾಕಿಸ್ತಾನದ ಎಫ್-16 ಯುದ್ಧ ವಿಮಾನವನ್ನು ಹೊಡೆದುರುಳಿಸಲು ಈ ವಿಮಾನವನ್ನು ವಿಂಗ್‌ ಕಮಾಂಡರ್‌(ಸದ್ಯ ಗ್ರೂಪ್‌ ಕಮಾಂಡರ್‌) ಅಭಿನಂದನ್‌ ವರ್ಧಮಾನ್‌ ಬಳಸಿದ್ದರು. ಈ ಸಾಹಸಕ್ಕಾಗಿ ಅಭಿನಂದನ್‌ ಅವರಿಗೆ ವೀರ ಚಕ್ರ ಪ್ರದಾನ ಮಾಡಲಾಯಿತು.

ಅಲ್ಲದೇ ಈಗ ನಿವೃತ್ತಿಯಾಗುತ್ತಿರುವ ಮಿಗ್‌-21 ಯುದ್ಧ ವಿಮಾನವು ಪಾಕಿಸ್ತಾನ ವಿರುದ್ಧದ 1999ರ ಕಾರ್ಗಿಲ್‌ ಯುದ್ಧದ “ಅಪರೇಷನ್‌ ಸಫೇದ್‌ ಸಾಗರ್‌’ನ ಭಾಗವಾಗಿತ್ತು.

ಸದ್ಯ ಈ ವಿಮಾನವು “ಸ್ವಾರ್ಡ್‌ ಆಮ್ಸ್‌’ ಎಂದು ಕರೆಯಲ್ಪಡುವ ಶ್ರೀನಗರದ ನಂ.51 ಸ್ಕಾರ್ಡನ್‌ನ ಶಸ್ತ್ರಾಗಾರದಲ್ಲಿದೆ. 2025ರ ವೇಳೆಗೆ ಎಲ್ಲ ಹಳೆಯ ನಾಲ್ಕು ಮಿಗ್‌-21 ಯದ್ಧ ವಿಮಾನಗಳ ನಿವೃತ್ತಿಗೆ ಐಎಎಫ್ ಯೋಜಿಸಿದೆ.

ಮಿಗ್‌-21 ಸೋವಿಯತ್‌ ಕಾಲದ ಸಿಂಗಲ್‌ ಎಂಜಿನ್‌ ಯುದ್ಧ ವಿಮಾನವಾಗಿದೆ. ಇದು ನೆಲ ಮತ್ತು ಆಗಸ ಎರಡು ಕಡೆಯಲ್ಲೂ ಶತ್ರು ವಿಮಾನಗಳನ್ನು ಸದೆಬಡಿಯುವ ಸಾಮರ್ಥ್ಯ ಹೊಂದಿದೆ. ಇದು ಒಂದು ಕಾಲದಲ್ಲಿ ಭಾರತೀಯ ವಾಯು ಪಡೆಯ ಬೆನ್ನೆಲುಬಾಗಿತ್ತು. ಪ್ರಸ್ತುತ 70 ಮಿಗ್‌-21 ಮತ್ತು 50 ಮಿಗ್‌-29 ಯುದ್ಧ ವಿಮಾನಗಳನ್ನು ಐಎಎಫ್ ಹೊಂದಿದೆ.

ಇತ್ತೀಚೆಗೆ ಮಿಗ್‌-21 ವಿಮಾನಗಳ ಅಪಘಾತಗಳು ಹೆಚ್ಚಾಗಿ ಸಂಭವಿಸಿದ್ದು, ಅದರ ಸುರಕ್ಷತೆ ಮತ್ತು ವ್ಯಾಲಿಡಿಟಿ ಬಗ್ಗೆ ಪ್ರಶ್ನೆಗಳು ಮೂಡಿತ್ತು.