ಬಿಹಾರ ಚುನಾವಣೆಯಲ್ಲಿ ಸುಧಾರಿತ ಇವಿಎಂ ಬಳಕೆ

Team Udayavani, Jun 13, 2020, 7:40 AM IST

ಸಾಂದರ್ಭಿಕ ಚಿತ್ರ

ಪಾಟ್ನಾ: ಅಕ್ಟೋಬರ್‌-ನವೆಂಬರ್‌ನಲ್ಲಿ ನಡೆಯಲಿರುವ ಬಿಹಾರ ವಿಧಾನಸಭೆ ಚುನಾವಣೆಯು ಅತ್ಯಂತ ಸುರಕ್ಷಿತವಾಗಿ ನಡೆಸುವ ಉದ್ದೇಶವಿದೆ. ಅದಕ್ಕಾಗಿ ಸುಧಾರಿತ ಹಾಗೂ ಮಾಹಿತಿ ತಿರುಚಲು ಸಾಧ್ಯವಿಲ್ಲದ (ಟ್ಯಾಂಪರ್‌-ಪ್ರೂಫ್‌) ಇವಿಎಂಗಳನ್ನು ಬಳಸಲು ಚುನಾವಣಾ ಆಯೋಗ ನಿರ್ಧರಿಸಿದೆ.

ಈ ಸುಧಾರಿತ ಮಾದರಿಯ ಯಂತ್ರಗಳನ್ನು ಎಂ3 ಆವೃತ್ತಿ ಅಥವಾ ಮೂರನೇ ಪೀಳಿಗೆಯ ಇವಿಎಂಗಳೆಂದು ಕರೆಯಲಾಗುತ್ತಿದ್ದು, ಯಾರಾದರೂ ಇವುಗಳ ಸಾಫ್ಟ್‌ವೇರ್‌ಗೆ ಅಕ್ರಮ ಪ್ರವೇಶ ಪಡೆದು ಮಾಹಿತಿ ತಿದ್ದಲು ಮುಂದಾದರೆ ಸ್ವಯಂಚಾಲಿತವಾಗಿ ನಿಷ್ಕ್ರಿಯಗೊಳ್ಳುತ್ತವೆ. ಮುಂದಿನ ಹತ್ತು ದಿನಗಳ ಒಳಗಾಗಿ ಇತರ ರಾಜ್ಯಗಳಿಂದ ಮೂರನೇ ಪೀಳಿಗೆಯ ಮತ ಯಂತ್ರಗಳನ್ನು ತರಿಸಿಕೊಳ್ಳಲು ಹಾಗೂ 72,000 ಮತಗಟ್ಟೆಗಳ ಪರಿಶೀಲನೆ ನಡೆಸುವಂತೆ ಬಿಹಾರದ ಮುಖ್ಯ ಚುನಾವಣಾ ಅಧಿಕಾರಿ (ಸಿಇಒ) ಎಚ್‌.ಆರ್‌.ಶ್ರೀನಿವಾಸ, ರಾಜ್ಯದ ಎಲ್ಲ ಜಿಲ್ಲಾಧಿಕಾರಿಗಳಿಗೆ ಸೂಚನೆ ನೀಡಿದ್ದಾರೆ.

2019ರ ಚುನಾವಣೆಯಲ್ಲಿ ಎನ್‌ಡಿಎ ಬಿಹಾರದ 40 ಕ್ಷೇತ್ರಗಳ ಪೈಕಿ 39ರಲ್ಲಿ ಜಯ ಸಾಧಿಸಿತ್ತು. ಆಗ ಮತಯಂತ್ರಗಳನ್ನು ತಿರುಚಲಾಗಿದೆ ಎಂದು ಪ್ರತಿಪಕ್ಷಗಳು ಆರೋಪಿಸಿದ್ದವು. ಈ ವೇಳೆ ಹ್ಯಾಕತಾನ್‌ ಏರ್ಪಡಿಸಿದ್ದ ಚುನಾವಣಾ ಆಯೋಗ, ಇವಿಎಂಗಳನ್ನು ತಿರುಚಲು ಸಾಧ್ಯವಿಲ್ಲ ಎಂದಿತ್ತು. ಈ ಬಾರಿ ಅಂತಹ ಆರೋಪ ಬರದಿರಲಿ ಎಂಬ ಉದ್ದೇಶದಿಂದ ಮುಂಚಿತವಾಗಿಯೇ ಸುಧಾರಿತ ಮತಯಂತ್ರಗಳನ್ನು ಬಳಸಲು ನಿರ್ಧರಿಸಿದೆ.