ಬಂಗಾಳದಲ್ಲಿ ಸ್ಥಳೀಯ ಸಂಸ್ಥೆಗೂ ಬಿಜೆಪಿ ಲಗ್ಗೆ

Team Udayavani, Jun 5, 2019, 6:00 AM IST

ಕೋಲ್ಕತಾ: ಲೋಕಸಭೆ ಚುನಾವಣೆಯಲ್ಲಿ ಪಶ್ಚಿಮ ಬಂಗಾಳದ 42 ಕ್ಷೇತ್ರಗಳ ಪೈಕಿ 18ರಲ್ಲಿ ಬಿಜೆಪಿ ಗೆದ್ದಿತ್ತು. ಇದೀಗ ಆ ರಾಜ್ಯದಲ್ಲಿ ಮೊದಲ ಬಾರಿಗೆ ನಗರ ಸ್ಥಳೀಯ ಸಂಸ್ಥೆಯಲ್ಲಿ ಬಿಜೆಪಿ ಆಡಳಿತದ ಚುಕ್ಕಾಣಿ ಹಿಡಿದಿದೆ. ಉತ್ತರ 24 ಪರಗಣ ಜಿಲ್ಲೆಗೆ ಸೇರಿದ ಭತ್ಪಾರಾ ಮುನಿಸಿಪಾಲಿಟಿಯಲ್ಲಿ ಬಿಜೆಪಿ ಈ ಸಾಧನೆ ಮಾಡಿದೆ. ಈ ಪ್ರದೇಶ ಕೊಲ್ಕತಾ ಮೆಟ್ರೋಪಾಲಿಟನ್‌ ಅಭಿವೃದ್ಧಿ ಪ್ರದೇಶದ ವ್ಯಾಪ್ತಿಯಲ್ಲಿಯೂ ಬರುತ್ತದೆ.

ಬಾರೆಕ್‌ಪುರ್‌ ಲೋಕಸಭಾ ಕ್ಷೇತ್ರದ ಬಿಜೆಪಿ ಸಂಸದ ಅರ್ಜುನ್‌ ಸಿಂಗ್‌ ಅವರ ಸೋದರ ಸಂಬಂಧಿ ಸೌರವ್‌ ಸಿಂಗ್‌ ಮುನಿಸಿಪಾಲಿಟಿಯ ಅಧ್ಯಕ್ಷರಾಗಿ ಆಯ್ಕೆ ಯಾಗಿದ್ದಾರೆ. ಮಂಗಳವಾರ ನಡೆದ ಮತದಾನ ದಲ್ಲಿ ಅವರಿಗೆ 26 ಮತಗಳು ಪ್ರಾಪ್ತವಾದವು. 2010ರಿಂದ ಏಪ್ರಿಲ್‌ವರೆಗೆ ಟಿಎಂಸಿ ವಶದಲ್ಲಿಯೇ ಅಧ್ಯಕ್ಷ ಸ್ಥಾನ ಇತ್ತು. ಮೇ 28ರಂದು ನಡೆದಿದ್ದ ಬೆಳವಣಿಗೆಯಲ್ಲಿ ಹಲಿಸಹರ್‌ ಮುನಿಸಿಪಾಲಿಟಿಯ 23 ಸದಸ್ಯರ ಪೈಕಿ 13, ನೈಹಾಟಿ ಮುನಿಸಿಪಾಲಿಟಿಯ 24 ಸದಸ್ಯರ ಪೈಕಿ 14 ಮಂದಿ ಬಿಜೆಪಿಗೆ ಸೇರಿದ್ದರು.