ಫಿಸಿಯೋಥೆರಪಿ ವಿದ್ಯಾರ್ಥಿನಿಗೆ ಬೆಂಕಿಹಚ್ಚಿ ತಾನೂ ಸತ್ತ ಮಾಜಿ ಪ್ರಿಯಕರ

Team Udayavani, Feb 2, 2017, 11:12 AM IST

ಕೋಟ್ಟಯಂ, ಕೇರಳ : ಹದಿಹರೆಯದ ಹಸಿಬಿಸಿ ಪ್ರೇಮ – ಕಾಮದ ಸಂಬಂಧಗಳು ಯುವ ಜನರನ್ನು ಹೇಗೆ ಬಲಿಪಡೆದುಕೊಳ್ಳುತ್ತದೆ ಎಂಬುದಕ್ಕೆ ಸಾಕ್ಷಿ ಎಂಬಂತೆ ಇಲ್ಲೊಂದು ಹೃದಯ ವಿದ್ರಾವಕ ಘಟನೆ ನಡೆದಿದೆ. 

ಇಪ್ಪತ್ತರ ಹರೆಯದ ಫಿಸಿಯೋಥೆರಪಿ ವಿದ್ಯಾರ್ಥಿನಿ ಲಕ್ಷ್ಮೀ ನಿನ್ನೆ ಬುಧವಾರ ತನ್ನ ತರಗತಿ ಕೋಣೆಯಲ್ಲಿ ತನ್ನ ಸಹಪಾಠಿಗಳೊಂದಿಗೆ ಕುಳಿತು ಮಾತನಾಡುತ್ತಿದ್ದಾಗ ಅಲ್ಲಿಗೆ ನುಗ್ಗಿ ಬಂದ ಆಕೆಯ ಮಾಜಿ ಪ್ರಿಯಕರ, ಲಕ್ಷ್ಮಿಯ ಮೇಲೆ ಏಕಾಏಕಿ ಪೆಟ್ರೋಲ್‌ ಸುರಿದ. 

ಬಳಿಕ ಬೆಂಕಿ ಹಚ್ಚಲು ಆತ ಲೈಟರ್‌ ಕೆಗೈತ್ತಿಕೊಂಡದ್ದನ್ನು ಕಾಣುತ್ತಲೇ ಲಕ್ಷ್ಮಿ ಹೊರಗೋಡಿದಳು. ಒಡನೆಯೇ ಆತ ಆಕೆಯನ್ನು ಅಟ್ಟಾಡಿಸಿ ಕೊನೆಗೂ ಆಕೆಗೆ ಬೆಂಕಿ ಹಚ್ಚಿದ;  ಅನಂತರ ಆತ ತನಗೂ ಬೆಂಕಿ ಹಚ್ಚಿಕೊಂಡು  ಆತ್ಮಹತ್ಯೆಗೆ ಯತ್ನಿಸಿದ. 

ಗಂಭೀರ ಸುಟ್ಟ ಗಾಯಗಳೊಂದಿಗೆ ನಿನ್ನೆ ಆಸ್ಪತ್ರೆಗೆ ದಾಖಲಾಗಿದ್ದ ಲಕ್ಷ್ಮಿ ಹಾಗೂ ಆಕೆಯ ಮಾಜಿ ಪ್ರಿಯಕರ ಆದರ್ಶ್‌ ನಿನ್ನೆ ತಡರಾತ್ರಿ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದರು.

ಇಲ್ಲಿನ ಸ್ಕೂಲ್‌ ಆಫ್ ಮೆಡಿಕಲ ಎಜುಕೇಶನ್‌ನಲ್ಲಿ ಫಿಸಿಯೋಥೆರಪಿ ವ್ಯಾಸಂಗ ಮಾಡುತ್ತಿದ್ದ ಲಕ್ಷ್ಮಿಗೆ ಶೇ.65ರಷ್ಟು ಸುಟ್ಟ ಗಾಯಗಳಾಗಿದ್ದವು. ಇವರಿಬ್ಬರೂ ಈ ಹಿಂದೆ ಪರಸ್ಪರರನ್ನು ಪ್ರೀತಿಸುತ್ತಿದ್ದರು. ಆದರೆ ಆದರ್ಶ್‌ ನ ಕೆಟ್ಟ ಗುಣಗಳ ಬಗ್ಗೆ ಮಾಹಿತಿ ಪಡೆದಿದ್ದ ಲಕ್ಷ್ಮಿ ಆತನಿಂದ ದೂರವಾಗಿದ್ದಳು. ಆದರೂ ಆತ ಆಕೆಯನ್ನು ಪೀಡಿಸುತ್ತಲೇ ಇದ್ದ. ತಾನು ಆಕೆಯನ್ನು ಮದುವೆಯಾಗುವುದಾಗಿ ಹೇಳಿ ಆಕೆಯ ಮನೆಯವರಿಗೆ ತನ್ನ ಮದುವೆ ಪ್ರಸ್ತಾವವನ್ನೂ ಮುಂದಿಟ್ಟಿದ್ದ. ಆದರೆ ಅವರು ಅದನ್ನು ತಿರಸ್ಕರಿಸಿ ಪೊಲೀಸರಿಗೆ ದೂರು ನೀಡಿದ್ದರು. 

ಲಕ್ಷ್ಮಿ ವಿರುದ್ಧ ಮುಯ್ಯಿ ತೀರಿಸಿಕೊಳ್ಳುವುದಕ್ಕೆ ಸಮಯ ಕಾಯುತ್ತಿದ್ದ ಆದರ್ಶ್‌ ಕೊನೆಗೂ ಆಕೆಯನ್ನು ಆತ ಬಲಿ ಪಡೆದು ತಾನೂ ಆತ್ಮಹತ್ಯೆ ಮಾಡಿಕೊಂಡ ಎಂದು ಪೊಲೀಸರು ತಿಳಿಸಿದ್ದಾರೆ.