ಬಜೆಟ್‌ನಲ್ಲಿ ಆದಾಯ ತೆರಿಗೆ ಇಳಿಕೆ?

Team Udayavani, Dec 27, 2019, 7:24 AM IST

ಹೊಸದಿಲ್ಲಿ: ಮುಂಬರುವ ಕೇಂದ್ರ ಬಜೆಟ್‌ನಲ್ಲಿ ವಿತ್ತ ಸಚಿವೆ ವೇತನದಾರರಿಗೆ ಖುಷಿ ಸುದ್ದಿ ನೀಡುವುದು ಪಕ್ಕಾ? ಹೌದು, ಮೂಲಗಳ ಪ್ರಕಾರ, ವೈಯಕ್ತಿಕ ಆದಾಯ ತೆರಿಗೆ ಸ್ಲ್ಯಾಬ್‌ನಲ್ಲಿ ಕಡಿತ ಮಾಡಲು ವಿತ್ತ ಸಚಿವಾಲಯ ಎಲ್ಲ ತಯಾರಿ ನಡೆಸಿದೆ. ನೇರ ತೆರಿಗೆ ಮಂಡಳಿ ನೀಡಿರುವ ಶಿಫಾರಸುಗಳನ್ನು ಗಣನೆಯಲ್ಲಿಟ್ಟುಕೊಂಡು, ಹೊಸ ರೀತಿಯ ಸ್ಲ್ಯಾಬ್‌ಗಳು ಮತ್ತು ತೆರಿಗೆ ದರವನ್ನು ನಿಗದಿ ಮಾಡಲು ಸಿದ್ಧತೆ ನಡೆಸಲಾಗಿದೆ ಎಂದು ಮೂಲಗಳು ಹೇಳಿವೆ.

ಅಂದರೆ, 2.5 ಲಕ್ಷ ರೂ.ಗಳಿಂದ 10 ಲಕ್ಷದವರೆಗೆ ಶೇ.10, 10-20 ಲಕ್ಷದ ವರೆಗೆ ಶೇ.20, 20 ಲಕ್ಷದಿಂದ 2 ಕೋಟಿ ವರೆಗೆ ಶೇ.30 ಹಾಗೂ 2 ಕೋಟಿಯಿಂದ ಮೇಲ್ಪಟ್ಟು ಗಳಿಸುವವ‌ರಿಗೆ ಶೇ.35 ರಷ್ಟು ತೆರಿಗೆ ಹಾಕಲು ಚಿಂತನೆ ನಡೆದಿದೆ. ಈ ಬಗ್ಗೆ ಈಗಾಗಲೇ ತಯಾರಿಗಳು ತಡೆದಿದ್ದು, ಫೆ.1ರ ಬಜೆಟ್‌ನಲ್ಲಿ ಘೋಷಣೆಯಾಗುವ ಸಾಧ್ಯತೆಗಳಿವೆ ಎಂದು ಹೇಳಲಾಗಿದೆ.