ಹೊಸ ಟ್ರಾಫಿಕ್‌ ನೀತಿ ವಿಮೆ ಖರೀದಿ ಹೆಚ್ಚಳ

Team Udayavani, Sep 6, 2019, 5:10 AM IST

ಹೊಸದಿಲ್ಲಿ: ಟ್ರಾಫಿಕ್‌ ನಿಯಮ ಉಲ್ಲಂಘಿಸಿದವರಿಗೆ ಭಾರಿ ದಂಡ ವಿಧಿಸುವ ಕಾನೂನು ಜಾರಿಗೆ ಬರುತ್ತಿದ್ದಂತೆಯೇ ಆನ್‌ಲೈನ್‌ ಮೂಲಕ ವಾಹನ ವಿಮೆ ಖರೀದಿ ಪ್ರಮಾಣ ದುಪ್ಪಟ್ಟಾಗಿದೆ. ಕಳೆದ ಮೂರು ದಿನಗಳಲ್ಲಿ ಮಾರಾಟವಾದ ವಿಮೆ ಪೈಕಿ ಶೇ. 90ರಷ್ಟು ಜನರು ವಿಮೆ ಅವಧಿ ಮೀರಿದ್ದರಿಂದಾಗಿ ಖರೀದಿ ಮಾಡಿದ್ದಾರೆ ಎಂದು ಪಾಲಿಸಿ ಬಜಾರ್‌ ಸಂಸ್ಥೆ ಹೇಳಿದೆ. ಕಳೆದ ಮೂರು ದಿನಗಳಿಂದ ಪ್ರತಿ ದಿನ ನಾವು 30 ಸಾವಿರ ವಿಮೆ ಮಾರಾಟ ಮಾಡುತ್ತಿದ್ದೇವೆ. ಇದು ಕಾನೂನು ಜಾರಿಗೆ ಬರುವುದಕ್ಕೂ ಮೊದಲಿನ ವಹಿವಾಟಿಗೆ ಹೋಲಿಸಿದರೆ ದುಪ್ಪಟ್ಟಾಗಿದೆ ಎಂದು ಸಂಸ್ಥೆ ಹೇಳಿದೆ.

ನೂತನ ನಿಯಮದ ಪ್ರಕಾರ, ವಿಮೆ ಇಲ್ಲದೆ ವಾಹನ ಚಾಲನೆ ಮಾಡಿದರೆ ಮೊದಲ ಬಾರಿಗೆ 2 ಸಾವಿರ ರೂ. ಹಾಗೂ ಅನಂತರ 4 ಸಾವಿರ ರೂ. ದಂಡ ಪಾವತಿ ಮಾಡಬೇಕಾಗಿದೆ. ಹೀಗಾಗಿ ಹೆದರಿದ ಜನರು ವಿಮೆ ಖರೀದಿಗೆ ಮುಗಿಬೀಳುತ್ತಿದ್ದಾರೆ. ದೇಶದಲ್ಲಿ ಒಟ್ಟು 19 ಕೋಟಿ ವಾಹನಗಳಿದ್ದು, ಈ ಪೈಕಿ ಕೇವಲ 8.26 ಕೋಟಿ ವಾಹನಗಳಿಗೆ ಮಾತ್ರವೇ ವಿಮೆ ಇದೆ.