10 ಕೋಟಿ ನೌಕರರ ವಿವರ ಆಧಾರ್‌ಗೆ?

Team Udayavani, Sep 26, 2018, 6:36 PM IST

ಹೊಸದಿಲ್ಲಿ: ಕೇಂದ್ರ ಸರಕಾರ ದೇಶಾದ್ಯಂತ ಇರುವ 10 ಕೋಟಿ ಉದ್ಯೋಗಸ್ಥರ ವಿವರಗಳನ್ನು ಆಧಾರ್‌ಗೆ ಜೋಡಿಸಲು ಮುಂದಾಗಿದೆ. ಈ ಕುರಿತು ನೌಕರರ ಭವಿಷ್ಯ ನಿಧಿ ಮಂಡಳಿ (ಇಪಿಎಫ್ಒ)ಗೆ ಕೇಂದ್ರ ಸರಕಾರ ಸೂಚನೆ ನೀಡಿದೆ ಎಂದು ಹೇಳಲಾಗಿದೆ.

ಉದ್ಯೋಗ ಸೃಷ್ಟಿ, ವಿಮಾ ನೆರವು, ವೇತನ ಪಾವತಿ ಸೇರಿದಂತೆ ಹಲವು ಸೌಲಭ್ಯಗಳು ಸರಿಯಾಗಿ ಅರ್ಹರಿಗೆ ಪಾವತಿಯಾಗುತ್ತದೆಯೇ ಎನ್ನುವುದನ್ನು ಗಮನಿಸಲು ಈ ಕ್ರಮ ನೆರವಾಗಲಿದೆ. ಹೀಗಾಗಿ, ದೇಶಾದ್ಯಂತ ಇರುವ ಇಪಿಎಫ್ಒ ಪ್ರಾದೇಶಿಕ ಕಚೇರಿಗಳಿಗೆ ಆದ್ಯತೆಯಲ್ಲಿ ಆಧಾರ್‌ ಲಿಂಕ್‌ ಮಾಡುವ ಬಗ್ಗೆ ಕ್ರಮ ಕೈಗೊಳ್ಳಬೇಕು ಎಂದು ಸೂಚಿಸಲಾಗಿದೆ. ಈ ಬಗ್ಗೆ ಹಿರಿಯ ಅಧಿಕಾರಿಗಳನ್ನು ಉಲ್ಲೇಖೀಸಿ “ದ ಮಿಂಟ್‌’ ಪತ್ರಿಕೆ ವರದಿ ಮಾಡಿದೆ. ಮುಂದಿನ ಲೋಕಸಭೆ ಚುನಾವಣೆ ಒಳಗಾಗಿ ಈ ಪ್ರಕ್ರಿಯೆ ಮುಕ್ತಾಯ ವಾಗುವಂತೆ ನೋಡಿಕೊಳ್ಳಲೂ ಸೂಚಿಸಲಾಗಿದೆ. 

ಕೈಗಾರಿಕಾ ಕ್ಷೇತ್ರದ ಕಾರ್ಮಿಕರಿಗೆ ಆರೋಗ್ಯ ಸೌಲಭ್ಯ ನೀಡುವ ಕಾರ್ಮಿಕ ವಿಮಾ ನಿಗಮ (ಇಎಸ್‌ಐಸಿ) 4 ಕೋಟಿ ಮಂದಿಗೆ ಈ ಸೇವೆ ನೀಡುತ್ತಿದೆ. ಅದು ಆಧಾರ್‌ ಲಿಂಕ್‌ ಮಾಡುವಂತೆ ಸೂಚನೆ ನೀಡಿತ್ತು. ದೇಶದಲ್ಲಿ ಇಪಿಎಫ್ಒ ಮತ್ತು ಇಎಸ್‌ಐಸಿ ಸಾಂಪ್ರದಾಯಿಕ ಕ್ಷೇತ್ರದಲ್ಲಿ ಎಷ್ಟು ಉದ್ಯೋಗ ಸೃಷ್ಟಿಯಾಗಿದೆ ಎನ್ನುವುದರ ಬಗ್ಗೆ ಅಧಿಕೃತ ಮಾಹಿತಿ ನೀಡುವ ಸಂಸ್ಥೆಗಳಾಗಿವೆ. ಆದರೆ ಕೆಲವೊಮ್ಮೆ 2 ಸಂಸ್ಥೆಗಳ ಮೂಲಕ ಫ‌ಲಾನುಭವಿಗಳು ಒಬ್ಬರೇ ಆಗಿರುವ ಹಿನ್ನೆಲೆಯಲ್ಲಿ ನಿಖರ ಮಾಹಿತಿ ಪತ್ತೆ ಹಚ್ಚಲು ಅಸಾಧ್ಯವಾಗುತ್ತದೆ. ಹೀಗಾಗಿ, ಆಧಾರ್‌ ಜೋಡಣೆಯಿಂದ ಅರ್ಹರಿಗೆ ವೇತನ ಮತ್ತು ಇತರ ಸೌಲಭ್ಯಗಳು ಪಾವತಿಯಾಗಿಯೇ ಎಂದು ಪತ್ತೆ ಹಚ್ಚಲು ಸಾಧ್ಯವಾಗುತ್ತದೆ ಎನ್ನುವುದು ಕೇಂದ್ರ ಸರಕಾರದ ಆಶಯವಾಗಿದೆ.