ಪಾಕಿಗಳ ಮಟ್ಟಹಾಕಲು ಶಾಶ್ವತ ಬಂಕರ್‌; ನುಸುಳುವಿಕೆ, ಕಳ್ಳಸಾಗಣೆ ತಡೆಗೆ ಈ ಕ್ರಮ

Team Udayavani, Jan 3, 2023, 7:25 AM IST

ನವದೆಹಲಿ: ಗುಜರಾತ್‌ನಲ್ಲಿರುವ ಭಾರತ-ಪಾಕಿಸ್ತಾನ ಅಂತಾರಾಷ್ಟ್ರೀಯ ಗಡಿಯಲ್ಲಿ ಪಾಕ್‌ ಮೀನುಗಾರರ ಒಳನುಸುಳುವಿಕೆ ಮಟ್ಟಹಾಕಲು, ಭಾರತೀಯ ಗಡಿ ಭದ್ರತಾ ಪಡೆಗಳ ನಿಯೋಜನೆಗೆ ಕೇಂದ್ರಸರ್ಕಾರ ಸಜ್ಜಾಗಿದ್ದು, ಇದೇ ಮೊದಲ ಬಾರಿಗೆ ಗುಜರಾತ್‌ನ ಅಂತಾರಾಷ್ಟ್ರೀಯ ಗಡಿಯಲ್ಲಿ ಶಾಶ್ವತ ಬಂಕರ್‌ಗಳನ್ನು ನಿರ್ಮಿಸುತ್ತಿದೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.

ಭುಜ್‌ ಸೆಕ್ಟರ್‌ನ ಸರ್‌ ಕ್ರೀಕ್‌ ಹಾಗೂ ಹರಾಮಿನಲ್ಲಾ ಏರಿಯಾಗಳಲ್ಲಿ ಬಹುಮಹಡಿ ಬಂಕರ್‌ಗಳ ನಿರ್ಮಾಣ ಮಾಡಲಾಗುತ್ತಿದ್ದು, ಇವು ಗಡಿಯಲ್ಲಿನ ಚಲನವಲನ ಗಮನಿಸುವ ವೀಕ್ಷಣಾ ಪೋಸ್ಟ್‌ಗಳಾಗಿಯೂ ಕಾರ್ಯನಿರ್ವಹಿಸಲಿವೆ ಎಂದು ತಿಳಿದುಬಂದಿದೆ. ಶಾಶ್ವತ ಬಂಕರ್‌ಗಳ ನಿರ್ಮಾಣಕ್ಕಾಗಿ ಕೇಂದ್ರ ಗೃಹ ಸಚಿವಾಲಯವು 50 ಕೋಟಿ ರೂ.ಗಳನ್ನು ಮಂಜೂರು ಮಾಡಿದ್ದು, ಗಡಿಯಲ್ಲಿ ನಡೆಯುತ್ತಿರುವ ಅಕ್ರಮ ಒಳನುಸುಳುವಿಕೆ, ಮಾದಕ ವಸ್ತುಗಳ ಕಳ್ಳ ಸಾಗಣೆ ಪ್ರಕರಣಗಳಿಗೆ ಈ ಮೂಲಕ ಕಡಿವಾಣ ಬೀಳಲಿದೆ ಎನ್ನಲಾಗಿದೆ.

ಸರ್‌ಕ್ರೀಕ್‌ನಲ್ಲಿ ನಿರ್ಮಾಣವಾಗುತ್ತಿರುವ 3 ಬಂಕರ್‌ಗಳ ವ್ಯಾಪ್ತಿ – 4,050 ಚದರ ಕಿ.ಮೀ
ಬಂಕರ್‌ಗಳ ಎತ್ತರ – 42 ಅಡಿ
ಗಡಿಯಲ್ಲಿ ನಿರ್ಮಾಣವಾಗಲಿರುವ ಒಟ್ಟು ಬಂಕರ್‌ಗಳು- 8
ಹರಾಮಿನಲ್ಲಾದಲ್ಲಿ ನಿರ್ಮಾಣವಾಗಲಿರುವ ಬಂಕರ್‌ಗಳು- 4
ಎಷ್ಟು ಸಶಸ್ತ್ರ ಬಿಎಸ್‌ಎಫ್ ಯೋಧರು ಇಲ್ಲಿರಬಹುದು?- 15
ಎಷ್ಟು ಮಹಡಿಗಳಿರುತ್ತವೆ?- 3
ಬಂಕರ್‌ ನಿರ್ಮಾಣಕ್ಕೆ ಸರ್ಕಾರ ಮಂಜೂರು ಮಾಡಿದ ಮೊತ್ತ- 50 ಕೋಟಿ ರೂ.