Covid: ದೇಶದಲ್ಲಿ 10 ಸಾವಿರ ಗಡಿದಾಟಿದ ಸೋಂಕು; ಏಕಾಏಕಿ ಕೋವಿಡ್ ಹೆಚ್ಚಳ

Team Udayavani, Apr 13, 2023, 9:53 AM IST

ನವದೆಹಲಿ: ದೇಶದಲ್ಲಿ ಗುರುವಾರ ಕೋವಿಡ್‌ ಪ್ರಕರಣ 10 ಸಾವಿರ ಗಡಿ ದಾಟಿದ್ದು, ಮತ್ತೆ ಕೋವಿಡ್‌ ಆತಂಕ ಎದುರಾಗಿದೆ.

ಕಳೆದ 24 ಗಂಟೆಯಲ್ಲಿ 10,158 ಜನರಲ್ಲಿ ಕೋವಿಡ್‌ ಸೋಂಕು ಕಾಣಿಸಿಕೊಂಡಿದೆ. ದೈನಂದಿನ ಪಾಸಿಟಿವ್‌ ದರ 4.42% ರಷ್ಟಿದೆ. ಇದು ಕಳೆದ 7 ತಿಂಗಳಿನಲ್ಲಿ ಕಂಡು ಬಂದ ಅತ್ಯಧಿಕ ಸೋಂಕುಗಳ ಸಂಖ್ಯೆ ಎನ್ನುವುದು ಭೀತಿಯ ಹುಟ್ಟಿಸುವ ಅಂಶವಾಗಿದೆ.

ಕೇಂದ್ರ ಆರೋಗ್ಯ ಸಚಿವಾಲಯದ ಅಂಕಿಅಂಶಗಳ ಪ್ರಕಾರ ಸಕ್ರಿಯ ಪ್ರಕರಣಗಳ ಸಂಖ್ಯೆ 44,998 ಕ್ಕೆ ಏರಿಕೆಯಾಗಿದೆ. ಬುಧವಾರ 7,830 ಪ್ರಕರಣಗಳು ಪತ್ತೆಯಾಗಿತ್ತು. ಒಟ್ಟು 16 ಮಂದಿ ಮೃತಪಟ್ಟಿದ್ದರು.

ಇಲ್ಲಿಯವರೆಗೆ ಒಟ್ಟು 92.34 ಕೋಟಿ ಪರೀಕ್ಷೆಗಳನ್ನು ನಡೆಸಲಾಗಿದ್ದು, ಕಳೆದ 24 ಗಂಟೆಗಳಲ್ಲಿ 2,29,958 ಪರೀಕ್ಷೆಗಳನ್ನು ನಡೆಸಲಾಗಿದೆ ಎಂದು ಡೇಟಾ ತಿಳಿಸಿದೆ.

ಭಾರತದಲ್ಲಿ ಮುಂದಿನ 10-12 ದಿನಗಳವರೆಗೆ ಪ್ರಕರಣಗಳು ಹೆಚ್ಚಾಗುತ್ತವೆ, ನಂತರ ಸೋಂಕುಗಳು ಕಡಿಮೆಯಾಗುತ್ತವೆ ಎಂದು ಸರ್ಕಾರಿ ಮೂಲಗಳು ತಿಳಿಸಿವೆ.

ಓಮಿಕ್ರಾನ್ ನ XBB.1.16 ಸಬ್‌ವೇರಿಯಂಟ್  ಬಗ್ಗೆ ಹೆಚ್ಚಾಗಿ ಆತಂಕ ಪಡಬೇಕಿಲ್ಲ. ಲಸಿಕೆಗಳು ಅದರ ವಿರುದ್ಧ ಪರಿಣಾಮಕಾರಿಯಾಗಿವೆ ಎಂದು ಆರೋಗ್ಯ ಸಚಿವಾಲಯದ ಅಧಿಕಾರಿಗಳು ತಿಳಿಸಿದ್ದಾರೆ.