ಹೆಸರು ಇರಿಸಿ ಅರುಣಾಚಲ ತನ್ನದೆನ್ನಲು ಸಾಧ್ಯವಿಲ್ಲ: ಚೀನಾ ಕ್ರಮಕ್ಕೆ ಕೇಂದ್ರ ಸರ್ಕಾರ ಆಕ್ರೋಶ

Team Udayavani, Apr 3, 2024, 6:21 AM IST

ನವದೆಹಲಿ: ಅರುಣಾಚಲ ಪ್ರದೇಶದ ಕೆಲವು ಭಾಗಗಳಿಗೆ ಚೀನೀ ಹೆಸರುಗಳ ಪಟ್ಟಿ ಬಿಡುಗಡೆ ಮಾಡಿದ ಚೀನಾ ಕ್ರಮವನ್ನು ಕೇಂದ್ರ ಸರ್ಕಾರ ಖಂಡಿಸಿದೆ. ಜತೆಗೆ ಆ ಕ್ರಮ “ವಿವೇಚನೆಯಿಲ್ಲದ ಯತ್ನ’ ಎಂದು ದೂರಿದೆ.

ಈ ಕುರಿತು ಪ್ರತಿಕ್ರಿಯಿಸಿದ ವಿದೇಶಾಂಗ ಸಚಿವಾಲಯದ ವಕ್ತಾರ ರಣಧೀರ್‌ ಜೈಸ್ವಾಲ್‌, “ಇಂಥ ಕ್ರಮದಿಂದ ಅರುಣಾಚಲ ಪ್ರದೇಶವನ್ನು ತನ್ನದಾಗಿಸಿಕೊಳ್ಳಲು ಚೀನಾಕ್ಕೆ ಸಾಧ್ಯವಿಲ್ಲ. ಅರುಣಾಚಲ ಪ್ರದೇಶವು ಈ ಹಿಂದೆಯೂ, ಇಂದೂ, ಮುಂದೆಯೂ ಭಾರತದ ಅವಿಭಾಜ್ಯ ಅಂಗವಾಗಿದೆ. ಚೀನಾದ ಇಂಥ ವ್ಯರ್ಥ ಪ್ರಯತ್ನಗಳಿಂದ ಈ ಸತ್ಯವನ್ನು ಮರೆಮಾಚಲು ಸಾಧ್ಯವಿಲ್ಲ’ ಎಂದು ಹೇಳಿದ್ದಾರೆ.

“ಅರುಣಾಚಲ ಪ್ರದೇಶದ ಸ್ಥಳಗಳ ಹೆಸರುಗಳನ್ನು ಬದಲಾಯಿಸಿದ ತಕ್ಷಣ ಅದು ಚೀನಾದಾಗುವುದಿಲ್ಲ. ಈ ರೀತಿಯ ಕ್ರಮಗಳನ್ನು ಭಾರತ ಖಂಡಿಸುತ್ತದೆ’ ಎಂದು ಹೇಳಿದ್ದಾರೆ.

ಶೀಘ್ರ ಶಾಶ್ವತ ಸ್ಥಾನ: “ಬೇರೆಯವರ ಮನೆಯ ಹೆಸರನ್ನು ನಾನು ಬದಲಿಸಿದ ತಕ್ಷಣ, ಆ ಮನೆಯು ನನ್ನದಾಗಲು ಸಾಧ್ಯವೆ?. ಇದು ಕೂಡ ಹಾಗೆಯೇ. ಅರಣಾಚಲ ಪ್ರದೇಶ ಯಾವಾಗಲೂ ಭಾರತದ ಭಾಗವಾಗಿಯೇ ಉಳಿಯಲಿದೆ. ಚೀನಾದ ಈ ರೀತಿಯ ಕ್ರಮಗಳಿಂದ ಯಾವುದೇ ಪರಿಣಾಮ ಬೀರುವುದಿಲ್ಲ’ ಎಂದು ವಿದೇಶಾಂಗ ಸಚಿವ ಎಸ್‌.ಜೈಶಂಕರ್‌ ಹೇಳಿದ್ದಾರೆ.

ಇದೇ ವೇಳೆ ಅವರು, “ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯಲ್ಲಿ(ಯುಎನ್‌ಎಸ್‌ಸಿ) ಭಾರತಕ್ಕೆ ಶಾಶ್ವತ ಸ್ಥಾನ ಸಿಗಲಿದೆ ಎಂಬ ಆಶಾವಾದ ನಮಗಿದೆ. ಈ ನಿಟ್ಟಿನಲ್ಲಿ ನಮ್ಮ ಪ್ರಯತ್ನಗಳನ್ನು ನಾವು ತೀವ್ರವಾಗಿ ಮುಂದುವರಿಸಬೇಕಿದೆ’ ಎಂದರು.