ಅರುಣಾಚಲಕ್ಕೆ ಶಾ ಭೇಟಿ: ಚೀನಾ ಕ್ಯಾತೆಗೆ ಭಾರತದ ಪ್ರತ್ಯುತ್ತರ

Team Udayavani, Feb 21, 2020, 2:21 AM IST

ಹೊಸದಿಲ್ಲಿ: ಅರುಣಾಚಲ ಪ್ರದೇಶಕ್ಕೆ ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ಅವರ ಭೇಟಿಗೆ ವಿರೋಧ ವ್ಯಕ್ತಪಡಿಸಿ ಕ್ಯಾತೆ ತೆಗೆದಿರುವ ಚೀನಾಗೆ ಭಾರತ ತಕ್ಕ ತಿರುಗೇಟು ನೀಡಿದೆ.

ಭಾರತದ ಅವಿಭಾಜ್ಯ ಅಂಗವಾಗಿರುವ ಅರುಣಾಚಲ ಪ್ರದೇಶಕ್ಕೆ ನಮ್ಮ ನಾಯಕರು ಭೇಟಿ ನೀಡುವುದನ್ನು ಯಾರೂ ವಿರೋಧಿಸುವಂತಿಲ್ಲ. ಇತರೆ ರಾಜ್ಯಗಳಿಗೆ ನಾಯಕರು ಹೇಗೆ ತೆರಳುತ್ತಾರೋ, ಅದೇ ರೀತಿ ಅರುಣಾಚಲಕ್ಕೂ ಭೇಟಿ ನೀಡುತ್ತಾರೆ.

ಇದನ್ನು ವಿರೋಧಿಸುವ ಹಕ್ಕು ಯಾರಿಗೂ ಇಲ್ಲ ಎಂದು ವಿದೇಶಾಂಗ ಇಲಾಖೆ ವಕ್ತಾರ ರವೀಶ್‌ ಕುಮಾರ್‌ ಹೇಳಿದ್ದಾರೆ. ಇದಕ್ಕೂ ಮುನ್ನ ಶಾ ಭೇಟಿ ವಿರೋಧಿಸಿದ್ದ ಚೀನಾ, “ಶಾ ಅವರ ಭೇಟಿಯು ನಮ್ಮ ಪ್ರಾದೇಶಿಕ ಸಮಗ್ರತೆಯ ಉಲ್ಲಂಘನೆಯಾಗುತ್ತದೆ’ ಎಂದಿತ್ತು.

ಈ ನಡುವೆ, ಅರುಣಾಚಲದ 34ನೇ ರಾಜ್ಯೋತ್ಸವ ಕಾರ್ಯಕ್ರಮದಲ್ಲಿ ಭಾಗಿಯಾದ ಶಾ, ‘ಸಂವಿಧಾನದ 371ನೇ ವಿಧಿ ರದ್ದುಪಡಿಸುವ ಪ್ರಶ್ನೆಯೇ ಇಲ್ಲ. ಅದಕ್ಕೆ ಸಂಬಂಧಿಸಿ ಹರಿದಾಡುತ್ತಿರುವ ಸುದ್ದಿಗಳೆಲ್ಲ ಸುಳ್ಳು. ಈಶಾನ್ಯ ಭಾಗದ ವಿಶೇಷ ಸಂಸ್ಕೃತಿಯನ್ನು ರಕ್ಷಿಸುವಲ್ಲಿ ನಮ್ಮ ಸರಕಾರ ಬದ್ಧವಾಗಿದೆ’ ಎಂದು ಸ್ಪಷ್ಟಪಡಿಸಿದ್ದಾರೆ.