ಹೈದರಾಬಾದ್‌: ಜಗತ್ತಿನ ದೊಡ್ಡ ಚಿನ್ನದ ನಾಣ್ಯಕ್ಕೆ ಮತ್ತೆ ಶೋಧ

Team Udayavani, Jun 28, 2022, 7:25 AM IST

ಹೈದರಾಬಾದ್‌: ನಾಪತ್ತೆಯಾಗಿದೆ ಎಂದು ಸದ್ಯಕ್ಕೆ ನಂಬಲಾಗಿರುವ ಜಗತ್ತಿನ ಅತ್ಯಂತ ದೊಡ್ಡ ಚಿನ್ನದ ನಾಣ್ಯದ ಬಗ್ಗೆ ಕೇಂದ್ರ ಸರಕಾರ 35 ವರ್ಷಗಳ ಬಳಿಕ ಮತ್ತೆ ಶೋಧ ಕಾರ್ಯ ಶುರು ಮಾಡಿದೆ. ಅದು 11.7 ಕೆಜಿ ತೂಕ ಇದ್ದು, ಹೈದರಾಬಾದ್‌ನ 8ನೇ ನಿಜಾಮ ಮುಕರ್ರಮ್‌ ಝಾ ಎಂಬಾತನ ಬಳಿ ಇತ್ತು ಎಂದು ಹೇಳಲಾಗಿತ್ತು.

ಅದನ್ನು ಜಹಾಂಗೀರ್‌ ಎಂಬಾತನ ಕಾಲದಲ್ಲಿ ರಚಿಸಲಾಗಿತ್ತು. ಮುಕರ್ರಮ್‌ ಝಾ ಎಂಬಾತನಿಗೆ ಆತನ ಅಜ್ಜ ಮಿರ್‌ ಒಸ್ಮಾನ್‌ ಅಲಿ ಖಾನ್‌ ಮೂಲಕ ಲಭಿಸಿತ್ತು. ಮುಕರ್ರಮ್‌ ಕುಟುಂಬದ ಸದಸ್ಯರು 1987ರಲ್ಲಿ ಬೆಲೆಕಟ್ಟಲಾಗದ ಚಿನ್ನದ ನಾಣ್ಯವನ್ನು ಸ್ವಿಸ್‌ನ ಹರಾಜು ವ್ಯವಸ್ಥೆ ಯೊಂದರ ಮೂಲಕ ಅದನ್ನು ಹರಾಜು ಮಾಡಲು ಪ್ರಯತ್ನ ಮಾಡಿದ್ದರು.

ಕೇಂದ್ರ ಸರಕಾರ ಸಿಬಿಐ ಮೂಲಕ ಐರೋಪ್ಯ ಒಕ್ಕೂಟದ ಅಧಿಕಾರಿಗಳಿಗೆ ಈ ಬಗ್ಗೆ ಮಾಹಿತಿ ನೀಡಿದ್ದರಿಂದ ಆ ಪ್ರಯತ್ನ ತಪ್ಪಿಸಲಾಗಿತ್ತು ಎಂದು ಹೈದರಾಬಾದ್‌ನಲ್ಲಿರುವ ಮೌಲಾನಾ ಆಜಾದ್‌ ನ್ಯಾಶನಲ್‌ ಉರ್ದು ಯುನಿವರ್ಸಿಟಿಯ ಇತಿಹಾಸ ಪ್ರಾಧ್ಯಾಪಕಿ ಪ್ರೊ|ಸಲ್ಮಾ ಅಹ್ಮದ್‌ ಫಾರೂಕಿ ಹೇಳಿದ್ದಾರೆ.

ಈ ಬೆಳವಣಿಗೆ ವಿರುದ್ಧ ಸಿಬಿಐ ಎಫ್ಐಆರ್‌ ದಾಖಲಿಸಿತ್ತು. ಚಿನ್ನದ ನಾಣ್ಯ 1 ಸಾವಿರ ತೊಲ ಇತ್ತು. ಆ ಕಾಲಕ್ಕೇ ಅದರ ಮೌಲ್ಯ 16 ಮಿಲಿಯನ್‌ ಡಾಲರ್‌ ಆಗಿತ್ತು. ಅದನ್ನು ಹರಾಜು ಹಾಕುವ ಮೂಲಕ ನಿಜಾಮರ ಕುಟುಂಬ 9 ಮಿಲಿಯನ್‌ ಸ್ವಿಸ್‌ ಫ್ರಾಂಕ್‌ ಸಾಲ ಪಡೆಯಲು ಮುಂದಾಗಿದ್ದರು ಎಂದು ಹೇಳಿದ್ದಾರೆ. ಅದರ ಬಗ್ಗೆ ತನಿಖೆ ನಡೆಸಿದ ಕೇಂದ್ರ ತನಿಖಾ ಸಂಸ್ಥೆಯ ಅಧಿಕಾರಿಗಳೂ ಕೂಡ ಈಗ ಇಲ್ಲ ಎಂದಿದ್ದಾರೆ. ಇದೊಂದು ಬೆಲೆ ಕಟ್ಟಲಾಗದ ಚಿನ್ನದ ನಾಣ್ಯ ಎಂದು ಹೇಳಿದ್ದಾರೆ.