ಕುನೋ ರಾಷ್ಟ್ರೀಯ ಉದ್ಯಾನಕ್ಕೆ ಬರಲಿವೆ ಆಫ್ರಿಕನ್‌ ಚೀತಾಗಳು

Team Udayavani, Jul 9, 2022, 10:19 PM IST

ಭೋಪಾಲ್‌: ಭಾರತಕ್ಕೆ ಆಫ್ರಿಕಾ ರಾಷ್ಟ್ರಗಳಿಂದ ತರಲಾಗುವ ಚೀತಾಗಳನ್ನು ಮಧ್ಯಪ್ರದೇಶದ ಕುನೋ ರಾಷ್ಟ್ರೀಯ ಉದ್ಯಾನದಲ್ಲಿ ಬಿಡಲಾಗುವುದು. ಆಗಸ್ಟ್‌ 15ರ ವೇಳೆಗೆ 12-14 ಚೀತಾಗಳು ಭಾರತಕ್ಕೆ ಬರಲಿವೆ ಎಂದು “ದಿ ಪ್ರಿಂಟ್‌’ ವರದಿ ಮಾಡಿದೆ.

ಹಲವು ವರ್ಷಗಳ ಹಿಂದೆಯೇ ಭಾರತದಿಂದ ಕಣ್ಮರೆಯಾಗಿರುವ ಚೀತಾ ಸಂತತಿಯನ್ನು ಮತ್ತೆ ದೇಶದಲ್ಲಿ ಬೆಳೆಸಲೆಂದು ಬೇರೆಯದ್ದೇ ಖಂಡದಿಂದ ಚೀತಾಗಳನ್ನು ಕರೆತರಲಾಗುತ್ತಿದೆ. ಇದೇ ಮೊದಲನೇ ಬಾರಿಗೆ ಭಾರತ ಬೇರೆ ಖಂಡದಿಂದ ಪ್ರಾಣಿಗಳನ್ನು ಕರೆತರುತ್ತಿದೆ. ಈ ಚೀತಾಗಳಿಗಾಗಿ ಕುನೋ ಉದ್ಯಾನದ 500 ಹೆಕ್ಟೇರ್‌ ಜಾಗ ಮೀಸಲಿರಿಸಲಾಗಿದೆ.

ಈಗಾಗಲೇ ಅಲ್ಲಿ 3-4 ದೇಸಿ ಚಿರತೆಗಳಿದ್ದು, ಅವುಗಳನ್ನು ಬೇರೆ ಸ್ಥಳಕ್ಕೆ ಸ್ಥಳಾಂತರಿಸಿದ ನಂತರವೇ ವಿದೇಶಿ ಚೀತಾಗಳನ್ನು ಅಲ್ಲಿ ಬಿಡಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ವಿದೇಶದಿಂದ ಚೀತಾ ತರಿಸಿಕೊಳ್ಳುವ ಸರ್ಕಾರದ ಯೋಜನೆಗೆ ಸುಪ್ರೀಂ ಕೋರ್ಟ್‌ 2020ರಲ್ಲಿ ಅನುಮತಿ ಕೊಟ್ಟಿತ್ತು.