ಕಾಶ್ಮೀರದ ಯೋಧರಿಗೆ ಸಿಕ್ಕಿತು ಅಮೆರಿಕನ್‌ ರೈಫ‌ಲ್‌

Team Udayavani, Dec 11, 2019, 4:05 PM IST

ಜಮ್ಮು: ಉಗ್ರ ನಿಗ್ರಹ ಕಾರ್ಯಾಚರಣೆ ಸೇರಿದಂತೆ, ಗಡಿ ನಿಯಂತ್ರಣ ರೇಖೆಯಲ್ಲಿ ಕಾರ್ಯನಿರ್ವಹಿಸುವ ಭೂ ಸೇನೆಯ ಯೋಧರಿಗೆ ಇದೀಗ ಅತ್ಯಾಧುನಿಕ ರೀತಿಯ ಅಮೆರಿಕನ್‌ ರೈಫ‌ಲ್‌ಗ‌ಳು ಪೂರೈಕೆಯಾಗಿವೆ. ಇದರಿಂದ ಮುಂದಿನ ದಿನಗಳಲ್ಲಿ ಕಾರ್ಯಾಚರಣೆ ಇನ್ನಷ್ಟು ಪರಿಣಾಮಕಾರಿಯಾಗಲಿದೆ.

ರೈಫ‌ಲ್‌ಗ‌ಳೊಂದಿಗೆ ಸುಮಾರು 21 ಲಕ್ಷ ರೌಂಡ್‌ಗಾಗುವಷ್ಟು ಮದ್ದುಗುಂಡುಗಳನ್ನು ಕೂಡ ಪೂರೈಕೆ ಮಾಡಲು ಬೇಡಿಕೆ ಸಲ್ಲಿಸಲಾಗಿದೆ.

ಈಗಾಗಲೇ 10 ಸಾವಿರ ಎಸ್‌ಐಜಿ 716 ರೈಫ‌ಲ್‌ಗ‌ಳು ಭಾರತಕ್ಕೆ ಆಗಮಿಸಿದ್ದು, ಸೇನೆಯ ಉತ್ತರ ಕಮಾಂಡ್‌ಗೆ ರವಾನಿಸಲಾಗಿದೆ ಎಂದು ಸೇನೆಯ ಮೂಲಗಳು ಹೇಳಿವೆ. ಸೇನೆ ಹೊಸ ರೈಫ‌ಲ್‌ಗ‌ಳನ್ನು ಉಗ್ರ ನಿಗ್ರಹ ಕಾರ್ಯಾಚರಣೆಗಳಲ್ಲಿ ಬಹುಮುಖ್ಯವಾಗಿ ಬಳಸಲಿವೆ. ಒಟ್ಟು 700 ಕೋಟಿ ರೂ. ವೆಚ್ಚದ ಯೋಜನೆ ಇದಾಗಿದ್ದು, ಅಮೆರಿಕ 72400 ರೈಫ‌ಲ್‌ಗ‌ಳನ್ನು ಭಾರತಕ್ಕೆ ನೀಡಲಿದೆ.

66 ಸಾವಿರ ರೈಫ‌ಲ್‌ಗ‌ಳು ಸೇನೆಗೆ ಸಿಗಲಿದ್ದರೆ, ನೌಕಾಪಡೆ ಯೋಧರಿಗೆ 2 ಸಾವಿರ, ವಾಯುಪಡೆ ಯೋಧರಿಗೆ 4 ಸಾವಿರ ರೈಫ‌ಲ್‌ಗ‌ಳು ಸಿಗಲಿವೆ. ಸದ್ಯ ಸೈನಿಕರು ಬಳಸುತ್ತಿರುವ ಇನ್ಸಾಸ್‌ ರೈಫ‌ಲ್‌ ಬದಲಿಗೆ ಇವುಗಳನ್ನು ಉಪಯೋಗಿಸಲಾಗುವುದು. ಅಮೆರಿಕ ನಿರ್ಮಿತ ಎಸ್‌ಐಜಿ 716 ರೈಫ‌ಲ್‌ಗ‌ಳೊಂದಿಗೆ ಮುಂದಿನ ದಿನಗಳಲ್ಲಿ ರಷ್ಯಾ ನಿರ್ಮಿತ ಅತ್ಯಾಧುನಿಕ ಎಕೆ 203 ರೈಫ‌ಲ್‌ಗ‌ಳೂ ಪೂರೈಕೆಯಾಗಲಿವೆ.