ಭಾರತೀಯ ಸೇನೆಯ ಕಳಶಪ್ರಾಯ ಬಿಹಾರ ರೆಜಿಮೆಂಟ್‌

Team Udayavani, Jun 23, 2020, 6:20 AM IST

ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used

ಭಾರತೀಯ ಸೇನೆಯ ಅತೀ ಮಹತ್ವ ಭಾಗ ಹಾಗೂ ಕೆಚ್ಚೆದೆಯ, ಜಿದ್ದಿನ ಹೋರಾಟಕ್ಕೆ ಹೆಸರುವಾಸಿಯಾಗಿರುವುದು ಬಿಹಾರ ರೆಜಿಮೆಂಟ್‌.

ಇತ್ತೀಚೆಗೆ ಗಾಲ್ವಾನ್‌ ಕಣಿವೆಯಲ್ಲಿ ಹುತಾತ್ಮರಾದ 20 ಭಾರತೀಯ ಯೋಧರಲ್ಲಿ 16 ಮಂದಿ ಬಿಹಾರ ರೆಜಿಮೆಂಟ್‌ಗೆ ಸೇರಿದವರು.

1941ರಲ್ಲಿ ಅಸ್ತಿತ್ವಕ್ಕೆ ಬಂದಾಗಿನಿಂದ ಇಲ್ಲಿಯವರೆಗೆ ಭಾರತೀಯ ಸೇನೆಗೆ ಈ ರೆಜಿಮೆಂಟ್‌ ನೀಡಿರುವ ಕಾಣಿಕೆ ಅತ್ಯಮೂಲ್ಯ.

ಬ್ರಿಟಷರ ಕಾಲದಲ್ಲಿ ಹುಟ್ಟಿದ್ದ ಪಡೆ
1758ರಲ್ಲಿ ರಾಬರ್ಟ್‌ ಕ್ಲೈವ್‌, ಬೆಂಗಾಲ್‌ ಪ್ರಸಿಡೆನ್ಸಿಯ ಗವರ್ನರ್‌ ಆದಾಗ, ಭಾರತೀಯ ಸೇನೆಯ 34ನೇ ಬೆಟಾಲಿಯನ್‌ ಸ್ಥಾಪಿಸಿದರು. ಅದರಲ್ಲಿ ಹೆಚ್ಚಿವರು ಇದ್ದಿದ್ದು ಬಿಹಾರಿಗರೇ. ಆಗ ಅದಕ್ಕಿದ್ದ ಹೆಸರು ‘ಬೆಂಗಾಲ್‌ ನೇಟಿವ್‌ ಇನ್ ಫೆಂಟ್ರಿ’. ಬಕ್ಸಾರ್‌, ಕರ್ನಾಟಕ, ಮರಾಠವಾಡಾ, ಅಷ್ಟೇ ಏಕೆ ಮಲಾಯಾ, ಸುಮಾತ್ರಾ, ಈಜಿಪ್ಟ್ಗಳಲ್ಲೂ ಈ ಪಡೆ ಬ್ರಿಟಿಷರ ವಸಾಹತು ವಿಸ್ತರಣೆಗೆ ಸಹಾಯ ಮಾಡಿತ್ತು.

ಬ್ರಿಟಿಷರಿಗೇ ತಿರುಗುಬಾಣ!
1857ರಲ್ಲಿ ನಡೆದ ಸಿಪಾಯಿ ದಂಗೆಯ ವೇಳೆ, ಇದೇ ಬೆಟಾಲಿಯನ್‌ನ ಸಿಪಾಯಿಗಳು ಬ್ರಿಟಿಷರ ವಿರುದ್ಧ ತಿರುಗಿಬಿದ್ದಿದ್ದರು. ಹಾಗಾಗಿ, ಬ್ರಿಟಿಷ್‌ ಸರಕಾರ ಈ ಬೆಟಾಲಿಯನ್‌ನನ್ನು ರದ್ದುಗೊಳಿಸಿತು. ಆದರೆ, ಇದೇ ರೆಜಿಮೆಂಟ್‌ನ ಬಾಬು ಕುನ್ವರ್‌ ಸಿಂಗ್‌, ಬಿರ್ಸಾ ಮುಂಡಾ ಅವರು ಹೈದರಾಬಾದ್‌ ಸಂಸ್ಥಾನದ ಸಹಾಯದಿಂದ 19ನೇ ಹೈದರಾಬಾದ್‌ ರೆಜಿಮೆಂಟ್‌ ಕಟ್ಟಿ ಬ್ರಿಟಿಷರ ವಿರುದ್ಧ ಸೆಣಸಿದರು.

ಆಗ, ಆ ರೆಜಿಮೆಂಟ್‌ನ ಬಲವರ್ಧನೆಗೆ ಸಾವಿರಾರು ಸಂಖ್ಯೆಯಲ್ಲಿ ಬಿಹಾರಿ ಯೋಧರನ್ನು ಸೇರಿಸಿ ಕೊಳ್ಳಲಾಯಿತು. ಮುಂದೆ, ಹೈದರಾಬಾದ್‌ ಬೆಟಾಲಿಯನ್‌ನಿಂದ ಪ್ರತ್ಯೇಕಗೊಂಡ ಬಿಹಾರಿ ತುಕಡಿಗಳು 1941ರ ಸೆ. 15ರಂದು ಬಿಹಾರಿ ರೆಜಿಮೆಂಟ್‌ ಹೆಸರಿನಲ್ಲಿ ಅಸ್ತಿತ್ವಕ್ಕೆ ಬಂದವು. ಪಾಟ್ನಾದ ದಾನಾಪುರ್‌ ದಂಡು ಪ್ರದೇಶದಲ್ಲಿ (ಕಂಟೋನ್ಮೆಂಟ್‌) ಈಗಲೂ ಇದರ ಕೇಂದ್ರ ಕಚೇರಿಯಿದೆ. ಇದು ಭಾರತದ ಅತ್ಯಂತ ಹಳೆಯ ದಂಡು ಪ್ರದೇಶ.

ಅಡ್ಡ ಹೆಸರು: ವೀರ್‌ ಬಿಹಾರೀಸ್‌, ಕಿಲ್ಲರ್‌ ಮೆಷೀನ್ಸ್‌, ಜಂಗಲ್‌ ವಾರಿಯರ್ಸ್‌, ಬಜರಂಗ್‌ ದಳ ಸೇನೆ, ಬಿರ್ಸಾ ಮುಂಡಾ ಸೇನೆ.

ಪ್ರಮುಖ ಯುದ್ಧಗಳು, ಗೌರವಗಳು, ಹೆಗ್ಗಳಿಕೆಗಳು
– ಬರ್ಮಾ ಲಡಾಯಿಯಲ್ಲಿ ಭಾಗವಹಿಸಿದ್ದಕ್ಕೆ ‘ಹಾಕಾ’, ‘ಗಂಗಾವ್‌’, ‘ಥಿಯೇಟರ್‌ ಆನರ್‌’ ಗೌರವ.