Galaxy: ಹೊಸ ಗ್ಯಾಲಕ್ಸಿ ಸೃಷ್ಟಿಯನ್ನು ಕಂಡುಹಿಡಿದ ಭಾರತದ ಖಗೋಳ ವಿಜ್ಞಾನಿಗಳು!

Team Udayavani, Jan 8, 2025, 6:30 AM IST

ನವದೆಹಲಿ: ಬಾಹ್ಯಾಕಾಶದಲ್ಲಿ ಹೊಸ ಗ್ಯಾಲಕ್ಸಿ ಸೃಷ್ಟಿಯಾಗುತ್ತಿರುವುದನ್ನು ಭಾರತದ ಖಗೋಳಶಾಸ್ತ್ರಜ್ಞರು ಪತ್ತೆ ಹಚ್ಚಿದ್ದಾರೆ. ನಕ್ಷತ್ರ ಪುಂಜಗಳು ಹೇಗೆ ಸೃಷ್ಟಿಯಾಗುತ್ತದೆ ಎಂಬುದನ್ನು ಅರ್ಥ ಮಾಡಿಕೊಳ್ಳಲು ಈ ಅಧ್ಯಯನ ಸಾಕಷ್ಟು ಸಹಕಾರಿ ಎಂದು ಅವರು ಹೇಳಿದ್ದಾರೆ.

ಈಗಾಗಲೇ ಗುರುತಿಸಲಾಗಿರುವ ಲಿಯೋ ವಲಯದಲ್ಲಿರುವ ಎನ್‌ಜಿಸಿ 3785 ಗ್ಯಾಲಕ್ಸಿಯ ಬಾಲದ ಬಳಿಕ ಹೊಸ ಗ್ಯಾಲಕ್ಸಿ ಸೃಷ್ಟಿಯಾಗುತ್ತಿದೆ. ಇದು ಭೂಮಿಯಿಂದ ಸುಮಾರು 43 ಕೋಟಿ ಜ್ಯೋತಿರ್ವರ್ಷಗಳಷ್ಟು ದೂರದಲ್ಲಿದೆ ಎಂದು ಖಗೋಳಶಾಸ್ತ್ರಜ್ಞರು ಹೇಳಿದ್ದಾರೆ.

ಎನ್‌ಜಿಸಿ ಗ್ಯಾಲಕ್ಸಿಯ ಸಮೀಪದಲ್ಲಿರುವ ಮತ್ತೂಂದು ಗ್ಯಾಲಕ್ಸಿಯಲ್ಲಿನ ಗುರುತ್ವಾಕರ್ಷಣ ಬಲ ಹೆಚ್ಚಾಗಿರುವುದಿಂದ, ಎನ್‌ಜಿಸಿಯ ಬಾಲ ಅದರತ್ತ ಸೆಳೆಯಲ್ಪಟ್ಟಿದ್ದು, ಹೊಸ ಗ್ಯಾಲಕ್ಸಿ ಸೃಷ್ಟಿಯಾಗುತ್ತಿದೆ ಎಂದು ಹೇಳಿದ್ದಾರೆ. ಮುಂದಿನ ದಿನಗಳಲ್ಲಿ ಮತ್ತಷ್ಟು ನಕ್ಷತ್ರಗಳನ್ನು ಇದು ತನ್ನತ್ತ ಆಕರ್ಷಿಸುವ ಮೂಲಕ ಹೊಸ ಗ್ಯಾಲಕ್ಸಿ ನಿರ್ಮಾಣ ಸಂಪೂರ್ಣವಾಗಲಿದೆ ಎಂದು ಹೇಳಿದ್ದಾರೆ.